ހެލިފެލިވެ އުޅުމާއި ކަސްރަތު ކުރުމުގެ ސިޔާސަތާއި މިންގަނޑުތައް މިއަދު ރަސްމީކޮށް ލޯންޗުކޮށްފި އެވެ.
މިކަމަށް ޓަކައި މިއަދު ހެނދުނު ބޭއްވި ރަސްމިއްޔާތުގައި ރައީސުލްޖުމްހޫރިއްޔާ އޮފީހުގެ ސެކްރެޓަރީ، ކެބިނެޓް އެފެއާޒް، އަހުމަދު ހަސަންދީދީއާއި ކުޅިވަރާ ބެހޭ މިނިސްޓަރު އަހުމަދު މަހުލޫފާއި އެޑިއުކޭޝަން މިނިސްޓަރުގެ އިތުރުން ހެލްތު މިނިސްޓަރު އަހުމަދު ނަސީމް ބައިވެރިވެވަޑައިގެންނެވި އެވެ.
ހެލްތު މިނިސްޓްރީން ބުނި ގޮތުގައި މިފަދަ މިންގަނޑެއް ލޯންޗުކުރުމުގެ މަގުސަދަކީ ގައިންގަޔަށް ނާރާ ބަލިތައް ކޮންޓްރޯލްކޮށް ބަލިތައް ގިނަވާން ދިމާވާ ހިރާސްތަކުން ރައްކާތެރިވުމާއި ސިއްހީ ދުޅަހެޔޮ ދިރިއުޅުމަކަށް ހެލިފެލިވެ އުޅުމާއި ކަސްރަތު ކުރުމަށް އާންމުން ހޭލުންތެރިކޮށް އަހުލުވެރިކުރުވުމެވެ.
މި ރަސްމިއްޔާތުގައި ހެލްތު މިނިސްޓަރު ނަސީމް ވިދާޅުވި ގޮތުގައި ގައިން ގަޔަށް ނާރާ ބަލިތަކަށް ކުރަމުން އަންނަ ބޮޑު ހޭދަ ކުޑަކުރެވޭނެ އެއްގޮތަކީ ގަވައިދުން ކަސްރަތު ކޮށް، މީހާގެ ބަރުދަން އެއްވަރެއްގައި ހިފެހެއްޓުމެވެ.
"މިއީ ކޮންމެ އުމުރެއްގެ މީހަކު ވެސް ކުރަން ޖެހޭ ކަމެއް ކަމަށް އަޅުގަނޑު ގަބޫލުކުރަން، އަދި ތިޔަ ހުރިހާ ބޭފުޅުން ވެސް ގަބޫލުކުރައްވާނެ ހެލިފެލިވެ އުޅުމަކީ ކޮންމެހެން ކުރަން ޖެހޭ ކަމެއް ކަމަށް،" ނަސީމް ވިދާޅުވި އެވެ.
މި ސިޔާސަތުތަކާއެކު މިނިސްޓްރީން އަމާޒު ހިފާފައިވަނީ އެކަށީގެންވާ މިންވަރަށް ހެލިފެލިވެ ކަސްރަތުގައި ޝާމިލްވެ ނޫޅޭ މީހުންގެ ނިސްބަތް 2030ގެ ނިޔަލަށް މިހާރު ހުރި ވަރަށް ވުރެ 10 ޕަސެންޓު ދަށް ކުރުމަށެވެ. މިހާރު މި އަދަދު ހުރީ އަންހެނުންގެ 49 ޕަސެންޓު އަދި ފިރިހެނުންގެ 35 ޕަސެންޓުގަ އެވެ.
ހެލިފެލިވެ އުޅުމާއި ކަސްރަތު ކުރުމުގެ ސިޔާސަތު ބިނާކޮށްފައިވަނީ މައިގަނޑު ހަތަރު ކަމެއްގެ މައްޗަށެވެ. އެގޮތުން، ކަސްރަތު ކުރުމާ މެދު ރައްޔިތުން ދެކޭގޮތް ބަދަލުކޮށް ކަސްރަތު ކުރުމަށް މަގުފަހިވާނޭ ގޮތްތައް ހޯދައި ދިނުމާއި ހެލިފެލިވެ ކަސްރަތުކުރުމަށް ހޭލުންތެރިކަން އިތުރުކުރުމާއި ކަމާ ގުޅޭގޮތުން މީހުން ތަމްރީނު ކުރުމަށް ދާއިރާތައް އެކުގައި މަސަައްކަތް ކުރުން ހިމެނެ އެވެ.
