އެމެޖެންސީ ލޯނެއް ފޯރުކޮށްދިނުމާ ގުޅޭ ގޮތުން ސްރީލަންކާ ސަރުކާރާ އެކު އިންޓަނޭޝަނަލް މަނިޓަރީ ފަންޑް (އައިއެމްއެފް) އިން އެއްބަސްވުމަކަށް ގޮސްފައިވާ ކަމަށް ބުނެފި އެވެ.
ރޮއިޓާޒް ނޫހުން ބުނީ އެ އެއްބަސްވުމާ ގުޅޭ މައުލޫމާތު ބުރާސްފަތި ދުވަހު ހާމަކުރާނެ ކަމަށެވެ. ލަންކާ ސަރުކާރާ އެކު މަޝްވަރާ ކުރުމަށް އައިއެމްއެފްގެ ވަފުދެއް މި ވަގުތު އުޅެނީ ކޮލޮމްބޯގަ އެވެ.
މަރުކަޒީ ބޭންކުގެ ގަވަރުނަރު ޑރ. ނަންދަލާލް ވީރަސިންގެ ވެސް ވިދާޅުވެފައި ވަނީ މަޝްވަރާއިން ރަނގަޅު ކުރިއެރުންތަކެއް ހޯދިފައިވާ ކަމަށެވެ.
"އައިއެމްއެފްގެ މަޝްވަަރާއިން ރަނގަޅު ކުރިއެރުންތަކެއް ހޯދިއްޖެ. އުއްމީދަކީ ވަރަށް އަވަހަށް ސްޓާފް ލެވެލް އެއްބަސްވުމެއްގައި ސޮއިކުރުން،" އޭނާ ވިދާޅުވި އެވެ.
ލަންކާގެ 51 ބިލިއަން ޑޮލަރުގެ ބޭރުގެ ދަަރަނި ޑީފޯލްޓްވެފައިވާ އިރު، ކާބޯތަކެއްޗާއި ތެލާާއި ބޭހުގެ ދަތިކަން އިންތިހާއަށް ކުރިމަތިވަމުން ދާތީ ލަންކާއިން އެދެނީ އައިއެމްއެފްގެ އެހީއަށެވެ.
އިންފްލޭޝަން ހިފެހެއްޓުމެއް ނެތި މައްޗަށް ޖެހެމުންދާކަން ފާހަގަކޮށް، މަރުކަޒީ ބޭންކުން މިދިޔަ ހަފްތާގައި ބުނީ މި އަހަރު އިގްތިސާދު ރެކޯޑް ނިސްބަތުން އަށް ޕަސެންޓުން ކުޑަވުމުގެ ނުރައްކާ އެބަ އޮތް ކަމަށާއި އިންފްލޭޝަން 65 ޕަސެންޓަށް އެރުން އެކަށީގެންވާ ކަމަށެވެ.
