ސްރީލަންކާގެ ކުޑަކުދިންގެ ހޮސްޕިޓަލަކަށް އެހީގެ ގޮތުގައި އެއްކުރި ފައިސާއަށް ޚިޔާނާތްތެރިވި ކަމުގެ ތުހުމަތުގައި، އެ ގައުމުގެ ކުރީގެ ފަސްޓް ލޭޑީ ޝިރާންތީ ރާޖަޕަކްސަ އެ ގައުމުގެ އެންޓި-ކޮރަޕްޝަން އިދާރާއިން ބުދަ ދުވަހު ހައްޔަރުކޮށްފި އެވެ.
ސްރީލަންކާގެ ސިޔާސީ މަސްރަހުގައި ގާތްގަނޑަކަށް ވިހި އަހަރު ވަންދެން ބާރުގަދަކޮށް އޮތް ރާޖަޕަކްސަ އާއިލާގެ މެންބަރުންގެ މައްޗަށް ހިންގާ ކޮރަޕްޝަނުގެ ތަހުގީގުތައް ރައީސް އަނޫރާ ކުމާރާ ދިސާނަޔަކަގެ ސަރުކާރުން މިހާރު ވަނީ އަލުން ފަށާފަ އެވެ.
ކުރީގެ ރައީސް މަހިންދަ ރާޖަޕަކްސަގެ އަނބިކަނބަލުން، އުމުރުން 73 އަހަރުގެ ޝިރާންތީ ރާޖަޕަކްސަ ހައްޔަރުކުރީ ކޮލަމްބޯއިން ކަމަށާއި، އޭނާ މެޖިސްޓްރޭޓް ކޯޓަކަށް ހާޒިރުކުރާނެ ކަމަށް ކޮމިޝަން ޓު އިންވެސްޓިގޭޓް އެލިގޭޝަންސް އޮފް ބްރައިބަރީ އޯ ކޮރަޕްޝަން (ސީއައިއޭބީއޯސީ) އިން ބުނެފައިވެ އެވެ.
ކޮލަމްބޯގައި ހުންނަ ރާޖަޕަކްސަގެ ގެކޮޅުގައި ނޫސްވެރިންނާ ވާހަކަދައްކަވަމުން ސީ.އައި.އޭ.ބީ.އޯ.ސީގެ އޮފިޝަލަކު ވިދާޅުވީ، ޝިރާންތީ ހައްޔަރުކުރީ އޭނާ ހިންގަވާ "ސިރިލިޔާ ސަވިޔާ ފައުންޑޭޝަން" އާ ގުޅޭ މައްސަލައެއްގައި ކަމަށެވެ.
ބޭސްފަރުވާއަކަށް ސެޕްޓެމްބަރު މަހުގެ 16 ވަނަ ދުވަހު ސިންގަޕޫރަށް ވަޑައިގަތުމަށް ފަހު، އެނބުރި ވަޑައިގަތުމުން ކޮލަމްބޯ އެއާޕޯޓުން ވަނީ އޭނާގެ ޗެރިޓީއާ ގުޅޭ ގޮތުން ފުލުހުންނަށް ބަޔާން ދިނުމަށް އަމުރެއް ހަވާލުކޮށްފަ އެވެ.
ހައްޔަރުކުރުން ހުއްޓުވުމުގެ އަމުރަކަށް އެދި ކޯޓަށް މައްސަލައެއް ހުށަހެޅުމަށް ފަހު އޭނާ އެނބުރި ގައުމަށް ވަޑައިގަތީ މިދިޔަ ހޯމަ ދުވަހު އެވެ. ނަމަވެސް، ކޯޓުން ވަނީ ކަފާލާތުގެ ދަށުން ދޫކޮށްލުމާ މެދު ގޮތެއް ނިންމުމުގެ އަޑުއެހުން އޮކްޓޫބަރު 12 ވަނަ ދުވަހަށް ތާވަލުކޮށްފަ އެވެ.
ފުލުހުން ބުނި ގޮތުގައި، ކެންސަރު ހޮސްޕިޓަލަކަށް ޕެޓް ސްކޭނަރެއް ގަތުމަށް "ސިރިލިޔާ ސަވިޔާ" ޖަމިއްޔާއިން އެހީގެ ގޮތުގައި އެއްކުރި 10 މިލިއަން ރޫޕީޒް (30,300 އެމެރިކާ ޑޮލަރު) އާ ގުޅޭ ގޮތުން ޝިރާންތީއާ ސުވާލުކުރަން ކަމާބެހޭ ފަރާތްތަކުން ބޭނުންވެ އެވެ.
ތަހުގީގު ކުރާ ފަރާތްތަކުން ކޯޓުގައި ބުނެފައިވަނީ، އެ ސްކޭނަރަކީ ޗައިނާ ސަރުކާރުން ހަދިޔާކޮށްފައިވާ އެއްޗެއް ކަމަށާއި، ނަމަވެސް އެ ޖަމިއްޔާއިން އެހީ ހޯދުން ކުރިއަށް ގެންގޮސް، އެ ފައިސާ ނަހަމަ ގޮތުގައި ބޭނުންކޮށްފައިވާ ކަމަށެވެ.
ޝިރާންތީ ވަނީ އެއްވެސް ގޯސް ކަމެއް ކުރައްވާފައި ނުވާނެ ކަމަށް ވިދާޅުވެ، ފައިސާއަށް ޚިޔާނާތްތެރިވެފައިވާ ކަމަށް ކުރެވޭ ތުހުމަތުތައް ދޮގުކުރައްވާފަ އެވެ.
ރާޖަޕަކްސަ އާއިލާގެ އެހެން މެންބަރުންނަށް ވެސް ވަނީ ގާނޫނީ ގޮތުން ބޮޑެތި ގޮންޖެހުންތަކަކާ ކުރިމަތިލާން ޖެހިފަ އެވެ.
ކުރީގެ ފަސްޓް ލޭޑީގެ ދޮށީ ދަރިކަލުން އަދި އިދިކޮޅު މަޖިލިސް މެންބަރު ނާމަލް ރާޖަޕަކްސަ މިހާރު ހުންނެވީ ބަންދުގަ އެވެ. އޭނާ ހައްޔަރުކޮށްފައިވަނީ ބައްޕާފުޅުގެ ރިޔާސަތުގައި 2013 ވަނަ އަހަރު އެއާބަސް މަތިންދާބޯޓު ގަތުމަށް ވެވުނު އެއްބަސްވުމަކާ ގުޅޭ ކޮރަޕްޝަނުގެ ތުހުމަތުގަ އެވެ.
ރާޖަޕަކްސަ އާއިލާއިން އަބަދުވެސް ކޮރަޕްޝަނުގެ ތުހުމަތުތަކަށް އިންކާރު ކުރެ އެވެ. އަދި އެ އާއިލާއާ ދެކޮޅަށް ހިންގާ މައްސަލަތަކަކީ ސިޔާސީ މަގްސަދެއްގައި ހިންގާ ކަންކަން ކަމަށް އެ އާއިލާއިން ސިފަކުރެ އެވެ.
މަހިންދަ ރާޖަޕަކްސަ 2005 އިން 2015 އަށް ރައީސްކަން ކުރެއްވިއިރު، އޭނާއަކީ އަދިވެސް ސްރީލަންކާގެ ސިޔާސީ މަސްރަހުގައި ނުފޫޒުގަދަ ބޭފުޅެކެވެ. ނަމަވެސް، 2022 ވަނަ އަހަރު އާންމުން ނުކުމެ ކުރި މުޒާހަރާތަކާ ގުޅިގެން އޭނާގެ ކޮއްކޯފުޅު ގޮތާބަޔާ ރާޖަޕަކްސަ ވެރިކަމުން ދުރުވުމަށް ފަހު، އެ އާއިލާގެ ސިޔާސީ ބާރުވެރިކަން ވަނީ ވަރަށް ބޮޑަށް ދަށަށް ގޮސްފަ އެވެ.
