މާލޭގައި ފިރިހެނެއްގެ ކަރަށް ވަޅި ހަރައި ޒަހަމްކޮށްލި މައްސަލާގައި މީހަކު ހައްޔަރު ނުކުރާ ކަމަށް ފުލުހުން މިއަދު ބުނެފި އެވެ.
މިދިޔަ އާދީއްތަ ދުވަހުގެ ރޭ ހިނގައިދިޔަ ހާދިސާއާ ގުޅިގެން ނޫސްވެރިން ސުވާލު ކުރުމުން ފުލުހުން ބުނީ އެ މައްސަލައިގައި "ބަލަންޖެހޭ ކަންކަން" ބަލަމުންދާ ކަމަށެވެ. އެއީ ކޮން ކަމެއްކަން ފުލުހުން ނުބުނެ އެވެ.
މީހުން ހައްޔަރު ކުރުމުގައި ފުލުހުން ބަލަނީ ގާނޫނުގައި ލިޔެފައި އޮތް އެއްޗަކަށް ކަަމަށާއި އެ މައްސަލައިގައި ވެސް އަމަލު ކުރާނީ އެގޮތަށް ކަމަށް ފުލުހުން ބުންޏެވެ.
"މައްސަލައަކާ ގުޅިގެން މީހުން ހައްޔަރު ކުރުމުގައި ފުލުހުން އަމަލު ކުރާނީ ޖިނާއީ އިޖުރާއަތުގެ ގާނޫނާ އެއް ގޮތަށް،" ނޫސްވެރިންނަށް ފުލުހުން މައުލޫމާތު ދިނުމަށް އޮންނަ ވަޓްސްއެޕް ގްރޫޕަށް ފޮނުވި މެސެޖްގައިވެ އެވެ.
ކަރަށް ލިބުނު ޒަހަމްތަކަކާ އެކު އާދީއްތަ ދުވަހުގެ މެންދަމު ގާތްގަނޑަކަށް 3:15 ހާއިރު ފިރިހެން މީހާ އޭޑީކޭ ހޮސްޕިޓަލަށް ގެންގޮސް ފަރުވާ ދިނެވެ. ހޯމަ ދުވަހު އާއިލާއިން އެދިގެން އޭނާ ހޮސްޕިޓަލުން ދޫކޮށްލި އެވެ.
