އެމްޓީސީސީ ނޯތު ލީގުގެ ދެ ވަނަ ޑިވިޝަނުގެ ގްރޫޕް ޑީގައި މިއަދު ކުޅުނު މެޗުން ހޯސްޓް, ރ. އަލިފުށިން 3-1 އިން ދުވާފަރު ސްޕޯޓްސް ކްލަބް ބަލިކޮށް މުބާރާތުގައި ކުރިއަށް ދިއުމުގެ އުންމީދު އާ ކޮށްފި އެވެ.
އެމްޓީސީސީ ނޯތު ލީގުގެ ދެ ވަނަ ޑިވިޝަނުގެ ގްރޫޕް ޑީގައި އަލިފުށި ކުޅުނު ފުރަތަމަ ދެ މެޗު ނިމުނީ މޮޅެއް ނުލިބި އެވެ. ފުރަތަަމަ މެޗުގައި ދުވާފަރާ 2-2 އިން އެއްވަރުވިއިރު، ދެ ވަނަ މެޗުން ވަނީ އުނގޫފާރު އަތުން 1-0 އިން ބަލިވެފަ އެވެ. އަލިފުށި ފުރަތަމަ މޮޅު ހޯދުމާ އެކު ކުރިއަށްދިއުމަށް ޓީމަށް ވަނީ ދިރުމެއް ލިބިފަ އެވެ.
އިއްޔެ ދުވާފަރު އަތުން ހޯދި މޮޅާ އެކު އަލިފުށްޓަށް ވަނީ ހަތަރު ޕޮއިންޓް ލިބިފަ އެވެ. ތިން ޓީމު ވާދަކުރާ މި ގްރޫޕްގައި އުނގޫފާރުން ވެސް ވަނީ އަލިފުށްޓަށް ވުރެ އެއް މެޗު މަދުން ކުޅެގެން ހަތަރު ޕޮއިންޓް ހޯދައިފަ އެވެ. ދުވާފަރުގެ އޮތީ ދެ ޕޮއިންޓެވެ.
އަލިފުށީ ޓާފް ދަނޑުގައި އިއްޔެ ހަވީރު ކުޅުނު މެޗުގައި އެ ޓީމުން ވަނީ ފުރަތަމަ ހާފުގައި ދެ ގޯލުގެ ލީޑެއް ނަގައިފަ އެވެ. މެޗުގެ 15 ވަނަ މިނިޓްގައި އަލިފުށީ އަބްދުﷲ އާދަމް އެ ޓީމަށް ލީޑުނަގައިދިންއިރު، މެޗުގެ 37 ވަނަ މިނިޓްގައި އިސްމާއިލް ނަސީމް ވަނީ އަލިފުށީގެ ލީޑުފުޅާކޮށްދީފަ އެވެ. ދެ ވަނަ ހާފުގެ ކުޅުން ފެށިގެން މެޗުގެ 61 ވަނަ މިނިޓްގައި އަބްދުﷲ ފާރިޝް ވަނީ އަލިފުށީގެ ތިން ވަނަ ގޯލު ޖަހައިފަ އެވެ.
މެޗުގެ އިތުރު ވަގުތުގައި ދުވާފަރުގެ ހަމައެކަނި ގޯލު ޖެހީ އަހުމަދު މައިސޫން އެވެ.
ގްރޫޕް ޑީގައި ބާކީ އޮތީ ދެ މެޗެވެ. އެއީ މާދަމާ ހަވީރު ދުވާފަރާއި އުނގޫފާރު ކުޅޭ މެޗާއި ހޮނިހިރު ދުވަހު އުނގޫފާރާއި އަލިފުށި ކުޅޭ މެޗެވެ. މެޗުތައް ނިމޭއިރު، މި ގްރޫޕްގެ އެއް ވަނަ އާއި ދެ ވަނަ އަށް ދާ ޓީމެއް، އެމްޓީސީސީ ނޯތު ލީގުގެ ފުރަތަމަ ޑިވިޝަނަށް ޕްރޮމޯޓްވާނެ އެވެ.
އިއްޔެ އަލިފުށްޓާއި ދުވާފަރު ކުޅުނު މެޗު ފެށުމުގެ ކުރިން ވަނީ ދާދި ފަހުން ގެނބިގެން މަރުވި، އުނގޫފާރު ޓީމުގެ ފޯވާޑް، އަލީ މިމްރާހުގެ ހަނދާނުގައި ސުކޫނތެއް ގެނެސްފަ އެވެ.
