ޕާކިސްތާނުގެ ވައިގެ ސަރަހައްދު ބޭނުންކޮށް އެމެރިކާއިން އަފްގާނިސްތާނަށް ހަމަލާ ދިނުމަށް ޕާކިސްތާނުން ހުއްދަ ދީފައިވާ ކަމަށް އަފްގާނިސްތާނުގެ ތާލިބާން ސަރުކާރުން ތުހުމަތުކޮށްފި އެވެ.
އެގޮތަށް ތުހުމަތު ކުރީ އެމެރިކާއިން ދާދި ފަހުން އަފްގާނިސްތާނުގެ ވެރިރަށް ކާބުލްއަށް ދިން ޑްރޯން ހަމަލާއަކާ ގުޅިގެންނެވެ. އެކަމަކު ޕާކިސްތާނުން އެ ތުހުމަތު ދޮގުކުރެ އެވެ.
އަފްގާނިސްތާނުގެ ޑިފެންސް މިނިސްޓަރު މުއްލާ މުހަައްމަދު ޔައުގޫބް ވިދާޅުވީ އެމެރިކާގެ ޑްރޯންތައް އަފްގާނިސްތާނުގެ ސަރަހައްދަށް ހަމަލާދެނީ ޕާކިސްތާން މެދުވެރިކޮށް ކަމަށެވެ.
"އަޅުގަނޑުމެންނަށް ލިބޭ މައުލޫމާތުން އެނގޭ ގޮތުގައި އެމެރިކާގެ ޑްރޯންތައް އަފްގާނިސްތާނުގެ ސަރަހައްދަަށް ވަންނަނީ ޕާކިސްތާނުގެ ވައިގެ ސަރަހައްދު ބޭނުންކޮށްގެން. އަޅުގަނޑުމެން ޕާކިސްތާނުގަައި މި އެދެނީ، އެ ގައުމުގެ ވައިގެ ސަރަހައްދު އަަޅުގަނޑުމެންނާ ދެކޮޅަށް ބޭނުން ނުކުރުމަށް،" އޭނާ ވިދާޅުވި އެވެ.
އެމެރިކާއިން ޖުލައި މަހު ދިން ޑްރޯން ހަމަލާއެއްގައި އަލް ގައިދާގެ ލީޑަރު އައިމަން އަލް ޒަވާހިރީ މަރުވީ ކާބުލްގެ ގެޔެއްގައި ހުއްޓަ އެވެ. ޕާކިސްތާނުން ބުނީ އެ ހަމަލާގައި ބައިވެރި ނުވާ ކަމަށާއި ހަމަލާއެއް ދޭން އުޅޭކަން ވެސް ނޭނގޭ ކަމަށެވެ.
ސެޕްޓެމްބަރު 11، 2001 ގައި އެމެރިިކާގައި ދިން ޓެރަރިސްޓް ހަމަލާތައް ރޭވުމުގެ ފަހަތުގައި ވަނީ އައިމަން އަލް ޒަވާހިރީ އާއި އުސާމާ ބިން ލާދިން އެވެ. އަދި އޭނާއަކީ އެމެރިކާއިން ހޯދާ އެންމެ ބޮޑު ޓެރަރިސްޓުންގެ ތެރޭގައި ހިމެނޭ މީހެކެވެ.
