ރާއްޖޭގެ އުތުރުގައި މިހާރު އިންޑިއާގެ ރަށެއްގެ ގޮތުގައި އޮތް މަލިކަކީ އެއްވެސް އިރެއްގައި ރާއްޖޭގެ ރަށެއް ނޫން ކަމަށް ޕްލޭނިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ކާށިދޫ ދާއިރާގެ މެމްބަރު އަބްދުﷲ ޖާބިރު އަސްލަމާ ސުވާލުކުރެއްވީ މަލިކު ރާއްޖޭގެ ތަނަކަށް ނުވެ ދިޔައީ ކީއްވެތޯ އެވެ. އެ ސުވާލަށް ޖަވާބު ދެއްވަމުން އަސްލަމް ވިދާޅުވީ ރާއްޖޭގެ ސިޔާދަތީ ސަރަހައްދާ ބެހޭ ގޮތުން އެއްވެސް ހިޔާލުތަފާތުވުމެއް ނެތް ކަމަށެވެ. ރާއްޖޭން އެފަދަ އެއްވެސް މައްސަލަައެއް ރާއްޖޭން ނަގާފައި ނެތް ކަމަށާއި މަލިކާ ބެހޭ ގޮތުން ވެސް އެފަދަ މައްސަލައެއް ނެތް ކަމަށެވެ.
ޕްލޭނިން މިނިސްޓަރު މުހައްމަދު އަސްލަމް ރައްޔިތުންގެ މަޖިލީހުގެ ޖަލްސާއެއްގައި މެމްބަރުންގެ ސުވާލުތަކަށް ޖަވާބު ދެއްވަނީ. އޭނާ މިއަދު ވިދާޅުވީ މަލިކަކީ އެއްވެސް އިރަކު ރާއްޖޭގެ ތަނެއް ނޫން ކަމަށް
"ސާފުކޮށް އަޅުގަނޑު މި ދެންނެވީ ދިވެހިރާއްޖޭގެ ޓެރިޓަރީގައި ހިމެނޭ ރަށެއްގެ ގޮތުގައި ދުވަހަކު ވެސް އަޅުގަނޑުމެން ހިމަނާފައި އޮތް ރަށެއް ނޫން މަލިކަކީ،" އަސްލަމް ވިދާޅުވި އެވެ.
އެެހެން ނަަމަވެސް ތާރީހު ދިރާސާކުރައްވާ ބޭފުޅުން ވިދާޅުވާ ގޮތުގައި ރާއްޖެއަށް އެންމެ ފަހުން މަލިކު ގެއްލުނުތާ އަދި 500 އަހަރު ވެސް ނުވެ އެވެ. ޒަމާނުއްސުރެ ރާއްޖޭގެ ރަށެއްގެ ގޮތުގައި އޮތް މަލިކު ރާއްޖެއަށް ގެއްލުނީ އިންޑިއާގެ މަލާބާރު އައްްސޭރީގައި ވެރިކަން ކުރީ ހޮޅިން ރާއްޖެ ހިފި އިރުގައި ކަމަށް ތާރީހުން އެނގެން އެބަ އޮތް ކަމަށް ހެރިޓޭޖް މިނިސްޓްރީގެ ރިސާޗް އެނަލިސްޓް އަދި ޒުވާން ތާރީހު އިލްމުވެރިޔާ އަހުމަދު އަލާ ދީދީ ވިދާޅުވި އެވެ.
"ރާއްޖޭގެ ސަރަހައްދު ބަޔާން ކުރާ އިރު މަލިކައްޑޫ މިދެމެދު، އެހެން ވެސް އެބަހުރި ލިޔެފައި. އެހެރީ ފަތްފަތްކޮޅުތަކުގައި ވެސް ފެންނަން،" އަލާ ވިދާޅުވި އެވެ.
އޭނާ ވިދާޅުވި ގޮތުގައި އަލީ ރާޖާއިންނާ (މަލާބާރުގައި ވެރިކަން ކުުރި ރަސްރަސްކަލުންނަށް ކިޔާ ލަގަބެއް) ރާއްޖެއާ ދެމެދު ހިނގި ހަނގުރާމަތަކުގައި އެކި ފަހަރު މަތިން މަލިކުގެ ކޮންޓްރޯލް ރާއްޖެއަށް ގެއްލުނު ނަމަވެސް އޭރު ރާއްޖޭން އެ ކޮންޓްރޯލް އަލުން ހޯދި އެވެ. އެހެން ނަމަވެސް އެންމެ ފަހުން ހޮޅިން ރާއްޖެއަށް އަރައި މާލެ ހިފި ފަހަރު މަލިކުގެ ކޮންޓްރޯލް ރާއްޖެއަށް ގެއްލުނު ފަހުން އެރަށް ހޯދަން މަސައްކަތެއް ކޮށްފައި ނުވާ ކަމަށް ތާރީހީ ހޯދުންތަކާ ހަވާލާދެއްވައި އޭނާ ވިދާޅުވި އެވެ.
"ހޮޅީން ރާއްޖެ އަރާ ރާއްޖެ އަޅުވެތިކުރުމާ ހަމައަށް މަލިކު އޮތީ ދިވެހީންގެ އަތްދަށުގައި. އެހެން އޮވެފައި 1752 ގައި ރާއްޖޭގެ އަތްދަށުން މަލިކު އަަސްލުގައި މި ނެއްޓުނީ،" އަލާ ވިދާޅުވި އެވެ.
އޭނާ ވިދާޅުވި ގޮތުގައި ތާރީހުން ފެންނަން އޮތީ މަލިކު ރާއްޖޭގެ އަތްދަށުގައި އެއްބައި އިރެއްގައި އޮވެފައި އަނެއްބައި އިރެއްގައި ނޯންނަ ކަމަށެވެ.
