ބަރުލަމާނީ ނިޒާމެއް ރާއްޖެއަށް ގެންނަން ހުރަހަކަށް ވެއްޖެނަމަ, 2023 ގެ ރިޔާސީ އިންތިހާބުގައި އެކުގައި ނުހުންނަވާނެ ކަމުގެ އިންޒާރު އެމްޑީޕީގެ ރައީސް މުހައްމަދު ނަޝީދު ދެއްވާފައިވީ ނަމަވެސް, އެކަން އެގޮތަށް ނުވާނެ ކަމުގެ ޔަގީންކަން އޮތްކަން ރައީސް އިބްރާހިމް މުހައްމަދު ސޯލިހު ވިދާޅުވީ އިއްޔެ އެވެ.
އަންނަ ރިޔާސީ އިންތިހާބާ ގުޅޭ ގޮތުން އެމްޑީޕީ ތެރޭގައި ހިޔާލު ތަފާތުވުން އެބަ އޮތެވެ. މިހާރު އޮތް ކޯލިޝަންގެ ތެރޭން ރައީސް އިބްރާހިމް މުހައްމަދު ސޯލިހު ދެވަނަ ދައުރަކަށް ކުރިމަތިލައްވަން ނިންމަވާފައިވާއިރު, ނަޝީދު ބޭނުންފުޅު ވަނީ ވެރިކަމުގެ ނިޒާމް ބަދަލު ކުރުމަށެވެ.
ވެރިކަމުގެ ނިޒާމު ބަދަލުކުރަން ފެންނަ ނުފެންނަ ވޯޓަކަށް ދިއުމަށް އެމްޑީޕީގެ ތާއިދު ހޯދަން ނަޝީދު ވަނީ މިހާރު ކުރިއަށްދާ އެމްޑީޕީގެ ހަތަރު ވަނަ ކޮންގްރެސްއަށް ގަރާރެއް ހުށަހަޅުއްވާފަ އެވެ. ނަމަވެސް ރައީސް ސޯލިހު އެ ގަރާރަށް ތާއިދެއް ނުކުރައްވަ އެވެ. އެ މަނިކުފާނު ތާއިދު ކުރައްވަނީ ރިޔާސީ ނިޒާމަށެވެ.
މި ދެ ބަސްވުމުގައި އެއްބަސްވުމަކަށް ނާދެވިއްޖެ ނަމަ ރައީސް ސޯލިހުއާއެކު 2023 ގައި ނުހުންނެވޭނެ ކަމަށް ނަޝީދު އިއްޔެ ވިދާޅުވެފައި ވާއިރު، ރައީސް ސޯލިހު ވިދާޅުވީ ނަޝީދު އަދި އެކަމާ ވިސްނަވާނެ ކަމަށެވެ.
"...އެކީގައި ކުރިއަށްދެވޭ ގޮތަކަށް އަޅުގަނޑުމެން ވިސްނަން ވާނީ, އަޅުގަނޑު ހިތުން ޕާޓީން ހޮވޭ ކޮންމެ ކެންޑިޑޭޓަކާ އެކީގައި މުޅި ޕާޓީ އޮންނާނެ،" ރައީސް ސޯލިހު, "އަދަދު"އަށް ވިދާޅުވި އެވެ.
ރައީސް ސޯލިހު ވިދާޅުވީ ނަޝީދު ހުށަހެޅުއްވި ގަރާރާ ގުޅޭ ގޮތުން މަޝްވަރާ ކުރުން އޮންނާނެ ކަމަށާއި ކޮންގްރެސްމަނުން އެކަމާ ދޭތެރޭ ވަރަށް ފުންކޮށް ވިސްނާނެ ކަމަށެވެ.
"އަޅުގަނޑު ހިތުން، ނިންމާ ކޮންމެ ނިންމުމަކީ އެއާ އެކީގައި ކުރިއަށްދާން ޖެހޭނެ ނިންމުމެއް ކަމަށް އަޅުގަނޑު ދެކެނީ. އަޅުގަނޑު ދެކެނީ ކޮންގްރެސްމަނުން ނިންމާނީ ޕާޓީ އާއި ގައުމަށް އެންމެ ފައިދާހުރި ނިންމުން ކަމަށް،" ރައީސް ވިދާޅުވި އެވެ.
ނިޒާމު ބަދަލުކުރުމުގެ ގަރާރު ހިޔާލު ތަފާތުވުން އޮތް އިރު، އެމްޑީޕީ ދޫކުރައްވައި ވަޑައިނުގަންނަވާނެ ކަމަށާއި، ޑީއާރުޕީ އާއި ޕީޕީއެމްއަށް ވެގެން ދިޔަ ގޮތަށް ޕާޓީ ރޫޅިގެން ނުދާނެ ކަމަށް ވެސް ނަޝީދު ވިދާޅުވެ އެވެ.
އެމްޑީޕީގެ ހަތަރު ވަނަ ކޮންގްރެސް ކުރިއަށް ދާއިރު އިއްޔެ އޮތީ ސަރުކާރުގެ ކާމިޔާބީތައް ކޮންގްރެސްގެ ބައިވެރިންނާ ހިއްސާކުރުމެވެ.
އިތުރު ހަބަރުތައް
ކުރީގެ ރައީސް އަބްދުﷲ ޔާމީންގެ ސަރުކާރުގައި ހަރުކަށި ފިކުރު ނައްތާލަން މަސައްކަތް ނުކުރާ ކަމަށް ތުހުމަތުކޮށް، މި ސަރުކާރު އައި ފަހުން ކުރިއެރުން ތަކެއް ހޯދިއްޖެކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވީ އިއްޔެ އެވެ. އެކަމަނާ ވިދާޅުވީ، ރައީސް ސޯލިހު ވެރިކަމަށް ވަޑައިގަތް ފަހުން މިހާތަނަށް ދިވެއްސަކު ބޭރު ގައުމެއްގެ ހަނގުރާމައަކަށް ގޮސްފައި ނުވާ ކަމަށެވެ.
ރައީސް ޔާމީންގެ ފަހުރެއްގެ ގޮތުގައި ހިޔާ ފްލެޓް މަޝްރޫހު ފާހަގަ ކުރާއިރު، މި ސަރުކާރު ވެރިކަމަށް އައިއިރު ބައެއް ފްލެޓްތަކުގައި އަޅާފައި ހުރީ ބިންގާ އެކަނި ކަމަށާއި ބައެއް ފުލެޓް ތަކުގެ ބޮޑު ބައެއް ނިންމީ މި ސަރުކާރުން ކަމަށް ޕްލޭނިން މިނިސްޓަރު މުހައްމަދު އަސްލަމް ވިދާޅުވީ އިއްޔެ އެވެ.
މިހާރު ސޯޝަލް ސެންޓަރުގައި ފަށައިގެން ކުރިއަށްދާ އެމްޑީޕީގެ ހަތަރު ވަނަ ކޮންގްރެސްއާ ހުށަހަޅާފައިވާ ޝަކުވާތަކުގައި ކޮންގްރެސް ފަސްކުރަންޖެހޭ ވަރުގެ ޝަކުވާއެއް ނެތް ކަމަށް އެމްޑީޕީން ބުނީ އިއްޔެ އެވެ. ކޮންގްރެސް އާ ގުޅިގެން ހުށަހެޅިފައިވަނީ ތިން ގޮތްޕަކާ ގުޅޭ 17 މައްސަލައެކެވެ.
ކޮވިޑާ ގުޅިގެން ސަރުކާރަށް ވެންޓިލޭޓަރުތައް ހޯދުމުގައި ކޮރަޕްޝަނުގެ އަމަލުތައް ހިންގާފައިވާ ކަމަށް ބުނާ މައްސަލައިގައި ތުހުމަތުކުރާ ގިނަ ބައެއްގެ މައްޗަށް ދައުވާނުކޮށް މައްސަލަ ފައިލްކޮށްފައިވާކަން ރިޕޯޓްކުރީ އިއްޔެ އެވެ.
ރާއްޖޭގައި ބާއްވާ އެންމެ ފުރަތަމަ ބާ އިމްތިހާނުގައި ބައިވެރިވާ ދަރިވަރުންގެ އިންތިހާނު ފީ 10،000 ރ. އިން 6،500 ރ. އަށް ކުޑަކުރިކަން ރިޕޯޓްކުރީ އިއްޔެ އެވެ.
ދުވަހުގެ ކޯޓޭޝަން
މި ދެ ބަސްވުމުގައި އެއްބަސްވުމަކަށް ނާދެވިއްޖެ ނަމަ ރައީސް ސޯލިހުއާއެކު 2023 ގައި ނުހުންނެވޭނެ ކަމަށް ނަޝީދު އިއްޔެ ވިދާޅުވި ނަމަވެސް އެކަމާ އެކަމާ ނަޝީދު ވިސްނަވާނެ ކަމަށް ރައީސް ސޯލިހު ވިދާޅުވި އެވެ.
...އެކީގައި ކުރިއަށްދެވޭ ގޮތަކަށް އަޅުގަނޑުމެން ވިސްނަން ވާނީ, އަޅުގަނޑު ހިތުން ޕާޓީން ހޮވޭ ކޮންމެ ކެންޑިޑޭޓަކާ އެކީގައި މުޅި ޕާޓީ އޮންނާނެ،"
ދުވަހުގެ ފޮޓޯ
މިހާރު ކުރިއަށްދާ އެމްޑީޕީގެ ކޮންގްރެސް ބައްވާ ޒުވާނުންގެ މަރުކަޒު ބޭރުގައި ދައްކާލަން ބަހައްޓާފައިވާ އެމްޑީޕީގެ ކުރީގެ ފޮޓޯތަކުގެ ތެރެއިން ފޮޓޯއެއް، ޕާޓީގެ ޗެއާޕާސަން ފައްޔާޒު އިސްމާއީލް ޕާޓީގެ ރައީސް ނަޝީދަށް ދައްކާލައްވަނީ. -- ފޮޓޯ: މުހައްމަދު ޝާބިން/ އަދަދު
