ޔާމީން ސަރުކާރުގައި ހަރުކަށި ފިކުރު ނައްތާލަން މަސައްކަތް ނުކުރާކަމަށް ތުހުމަތުކޮށް، މި ސަރުކާރު އައި ފަހުން ކުރިއެރުން ތަކެއް ހޯދިއްޖެކަމަށް ޑިފެންސް މިނިސްޓަރު މާރިޔާ އަހުމަދު ދީދީ ވިދާޅުވެއްޖެ އެވެ. އެކަމަނާ ވިދާޅުވީ، ރައީސް ސޯލިހު ވެރިކަމަށް ވަޑައިގަތް ފަހުން މިހާތަނަށް ދިވެއްސަކު ބޭރު ގައުމެއްގެ ހަނގުރާމައަކަށް ގޮސްފައި ނުވާ ކަމަށެވެ.
މިހާރު ކުރިއަށްދާ އެމްޑީޕީގެ ކޮންގްރެސްގައި ވާހަކަދައްކަމުން މާރިޔާ ވިދާޅުވީ ކުރީގެ ރައީސް އަބްދުﷲ ޔާމީނުގެ ސަރުކާރުން އަމަލުކުރި ގޮތަކީ، ހަރުކަށި ފިކުރަކީ މި ގައުމުގައި ނެތް އެއްޗަކަށް ހަދައިގެން އެކަމާ އަޅާވެސް ނުލައި ތިބުން ކަމަށެވެ. އެގޮތަށް ކަންތައް ކުރީ ސިޔާސީ ބޭނުންތަކެއް ހާސިލުކުރަން ކަމަށް ވެސް ތުހުމަތު ކުރެއްވި އެވެ.
ރައީސް ރައީސް އިބްރާހިމް މުހައްމަދި ސޯލިހުގެ ސަރުކާރު އައިސް، ރަށްރަށުގައި އުޅޭ މީހުންނަށް ހަރުކަށި ފިކުރަކީ ކޯއްޗެއް ކަމަށާއި އެއީ ކިހާވަރެއްގެ ކަމެއްކަމަށް އަހުލުވެރި ކުރުވި ކަމަށްވެސް އޭނާ ވިދާޅުވި އެވެ.
"މި ސަރުކާރު އައި އިރު، ޓެރަރިޒަމާއި ހަރުކަށި ފިކުރަކީ މި ރާއްޖޭގަ ނެތް އެއްޗެއް ކަމަށް ހަދައިގެން ތިބި ބަޔަކު އޭރު ވެރިކަމުގަ ތިބީ. ހަނގުރާމަވެރި ޒޯނުތަކަށް އަޅުގަނޑުމެންގެ ޅަ ކުދިންނާއި އެ ކުދިންގެ އާއިލާ ތަކާއި ކުޑަކުޑަ ކުދިން ފުރައިގެން ދިޔަ އިރުވެސް ނުވާ ކަމަކަށް ހަދާލައިގެން ތިބީ އެ މީހުންގެ ސިޔާސީ ބޭނުމަށްޓަކައި،" މާރިޔާ ވިދާޅުވި އެވެ.
އިތުރަށް ވިދާޅުވީ ރައީސް ސޯލިހް، ޓެރަރިޒަމާ ދެކޮޅަށް ގެންގުޅުއްވަނީ "ޒީރޯ ޓޯލަރެންސް"ގެ ސިޔާސަތެއް ކަމަށާއި އެކަމަށް ދިވެހިން ހޭލުންތެރި ކުރުވުމަށް 4884 ތަމްރީނު ޕްރޮގްރާމް ހިންގާފައިވާނެ ކަމަށް މާރިޔާ ވިދާޅުވި އެވެ.
"ހަރުކަށި ފިކުރޭ ކިޔައިގެން ގޮސް އެހެން ތަންތާ ހަނގުރާމަ ކުރެވި، އަނބިދަރީން ނިކަމެތިވެ، ދަރީން މަރުވެ، މިހިން ވެގެން ދާއިރު އެއީ އަޅާ ނުލާ ތިބެވޭ ވަރުގެ ކަމެއް ނޫން،" އޭނާ ވިދާޅުވި އެވެ.
"މި ސަރުކާރުން ކުރިއަށް ގެންދިޔަ އެ ޕްރޮގްރާމްތަކުގެ ނަތީޖާއެއްގެ ގޮތުން މިދިޔަ ތިން އަހަރާއި ބައިގެ ތެރޭގައި ހަނގުރާމަވެރި ސަރަހައްދެއްގެ ގޮތުގައި މި ސަރުކާރުން ކަނޑައެޅި އެއްވެސް ތަނަކަށް ރާއްޖޭގެ އެއްވެސް މީހަކު ނުދޭ،"
ސީރިޔާގެ ދާހިލީ ހަނގުރާމައިގައި ބައިވެރިވުމަށް ރާއްޖެއިން 173 މީހުން ދިޔަ ކަމަށް ޕޮލިސް ކޮމިޝަނަރު މުހައްމަދު ހަމީދު ޑިސެމްބަރު، 2019، ގައި ވިދާޅުވެފައިވެ އެވެ. އޭނަ ވިދާޅުވީ އޭގެ ތެރެއިން މިހާރު ސީރިޔާގައި ތިބީ 59 މީހުންނެވެ. އަދި އޭގެ ތެރެއިން 91 ޕަސެންޓު މީހުންނަކީ އަންހެނުންނާއި ކުޑަކުދިން ކަމަށް ހަމީދު ވިދާޅުވި އެވެ.
