ކ. ހިންމަފުށީގައި ގެސްޓް ހައުސް އަކަށް ވަދެ އެ ތަނުގެ ތަކެއްޗަށް ގެއްލުންދިން މީހަކާއި އެ ރަށުގައި ހަމަނުޖެހުން ހިންގި އިތުރު ހަތަރު މީހަކު ހައްޔަރުކޮށްފި އެވެ.
ގެއްލުން ދީފައި ވަނީ އެ ރަށުގެ ނޯވާ ގެސްޓް ހައުސް އަށެވެ.
ފުލުހުން ބުނީ ހިންމަފުށީ ގެސްޓްހައުސަކަށް ގެއްލުންދިން ކަމަށް ހަވީރު ރިޕޯޓުކޮށްފައިވާ ކަމަށެވެ. އެ މައްސަލައިގެ ތުހުމަތަށް ކޯޓު އަމުރެއްގެ ދަށުން ރޭ ވަނީ 32 އަހަރުގެ ފިރިހެނަކު ހައްޔަރުކޮށްފަ އެވެ.
އޭނާ ހައްޔަރު ކުރުމާ ގުޅިގެން އިތުރު ބަޔަކު ރޭ ދަންވަރު ވަނީ ނިކުމެ ގެސްޓްހައުސް ކައިރީ ހަމަނުޖެހުން ހިންގާފަ އެވެ.
ފުލުހުން ބުނީ ރޭ ދަންވަރު ވަގުތެއްގައި އެ ރަށުތެރޭގައި ހަމަނުޖެހުން ހިންގި މައްސަލައަކާ ގުޅިގެން ހަތަރު މީހަކު ހައްޔަރުކޮށްފައިވާ ކަމަށެވެ. އެއީ 20އ، 27އ، 29އ އަދި 37އ ގެ މީހުން ކަމަށެވެ.
މި މައްސަލަ ފުލުހުން ތަހުގީގު ކުރަމުންދާއިރު، ގެސްޓްހައުސް އިން ވާހަކަ ދެއްކި މީހަކު ބުނީ އޭނާ ގެސްޓްހައުސްއަށް ވަދެ ތަކެއްޗަށް ގެއްލުން ދީފައި ވަނީ އެއްވެސް ކަމަކާ ނުލާ ކަމަށެވެ.
އަދި ރޭ ދަންވަރު އެ ގެސްޓްހައުސް ކައިރިއަށް އެއްވީ އޭނަގެ އާއިލާ މީހުން ކަމަށްވެސް އޭނާ ބުންޏެވެ.
