ތިލަމާލެ ބްރިޖު މަސައްކަތް ކުރާ ޕްލެޓްފޯމެއް ވިލިމާލެ ފަރަށް އެރި ނަމަވެސް، ބްރިޖުގެ މަސައްކަތަށް އެއްވެސް މަޑުޖެހުމެއް ނާންނާނެ ކަމަށް ޕްލޭނިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
މި ހާދިސާ ހިނގީ ވިލިމާލޭގެ އިރު ދެކުނު ކަންމަތީގައި ޖަހާ ބްރިޖު ތަނބުގެ މަސައްކަތް ކުރުމަށް ޕްލެޓްފޯމް ބެހެއްޓުމުގެ މަސައްކަތް ކުރަމުން ދަނިކޮށް ކަމަށާއި ޕްލެޓްފޯމް އެންކާ ކުރަން އުޅުމުގެ ތެރޭގައި އެންކާއަށް ޓެކްނިކަލް މައްސަލައެއް ދިމާވެގެން ކަމަށް ޕްލޭނިން މިނިސްޓްރީން އިއްޔެ ވަނީ ބުނެފަ އެވެ.
ފަރަށް އެރުމާއި ފަރަށް ލިބުނު ގެއްލުމުގެ މައްސަލަ ނުނިމި އޮތަސް، ބްރިޖުގެ މަސައްކަތަށް މަޑުޖެހުމެއް ނާންނޭނެ ކަމަށް މިނިސްޓަރު އަސްލަމް މިއަދު ވިދާޅުވީ ރައްޔިތުންގެ މަޖިލީހުގެ ޖަލްސާގައި މެމްބަރަކު ކުރެއްވި ސުވާލެއްގެ ޖަވާބުގަ އެވެ.
"އެ ޕްރޮސެސް ކުރިއަށް ދިޔަ ކަމުގައި ވިޔަސް އަޅުގަނޑުމެންނަށް ބްރިޖުގެ މަސައްކަތަށް ލަސްވާން ޖެހޭ ސަބަބެއް ނޫން އެއީ، ޑިސްޕިއުޓެއް އޮވެދާނެ، ތިމާވެއްޓަށް ގެއްލުމެއް ވީ ކަމަށް ވަންޏާ އެވީ ގެއްލުމުގެ ބަދަލާ ގުޅޭ ގޮތުން،" އަސްލަމް ވިދާޅުވި އެވެ.
މަޖިލީހުގެ މިއަދުގެ ޖަލްސާގައި މިނިސްޓަރު އަސްލަމް-- ފޮޓޯ: މަޖިލިސް
އަސްލަމް ވިދާޅުވި ގޮތުގައި ފަރަށް ލިބުނު ގެއްލުން ދެނެގަތުމަށް މިހާރު އަންނަނީ އެސެސްމެންޓެއް ހަދަމުންނެވެ. އެ އެސެސްމެންޓުގެ ނަތީޖާ ލިބުމުން ފަރަށް ލިބުނު ގެއްލުމާއި ކުރާނެ ޖޫރިމަނާ އެނގޭނެ ކަމަށް ވިދާޅުވި އެވެ.
މައްސަލަ ދިމާވި ޕްލެޓްފޯމަކީ އާންމުކޮށް މިފަދަ މަސައްކަތްތަކުގައި ގެންގުޅޭ "ސެލްފް އެލެވޭޓިން ޕްލެޓްފޯމް" އެކެވެ. ހަމަ މި ސަރަހައްދުގައި މީގެ ކުރިން ވެސް މީގެ ޕްލެޓްފޯމްތައް ބަހައްޓައިގެން މަސައްކަތްކޮށްފައިވާ ކަމަށް ޕްލޭނިން މިނިސްޓްރީން ބުންޏެވެ.
އުރިފައިވާ ޕްލެޓްފޯމް އަދިވެސް ނުނެގެ އެވެ.
މިފަދަ މައްސަލަތައް ބަލާ ދައުލަތުގެ އިދާރާ އެންވަޔަރަމެންޓަލް ޕްރޮޓެކްޝަން އެޖެންސީ (އީޕީއޭ)ން ވަނީ ފަރަށް ލިބުނު ގެއްލުން ދިރާސާ ކުރަމުންދާ ކަމަށް ބުނެފަ އެވެ.
މާލެ-ތިލަފުށި ބްރިޖު މަޝްރޫއުގެ ހުލާސާ
މާލެ-ތިލަފުށި ބްރިޖް މަޝްރޫއަކީ މިހާތަނަށް އެންމެ ބޮޑު ހޭދައެއްކޮށްގެން ސަރުކާރުން ހިންގާ ޕްރޮޖެކްޓެވެ. މުޅި ޕްރޮޖެކްޓަށް 7.7 ބިލިއަން ރުފިޔާ ހަރަދުވާނެ ކަމަށް ބެލެވޭ މި ބްރިޖުގެ ކޮންޓްރެކްޓަރަކީ އިންޑިއާގެ އެފްކޮންސް ކުންފުންޏެވެ.
މި ބިޔަ ޕްރޮޖެކްޓަށް ހަރަދުކުރަނީ އިންޑިއާ އެގްޒިމް ބޭންކު މެދުވެރިކޮށް ހަމަޖައްސާފައިވާ 400 މިލިއަން ޑޮލަރުގެ ކްރެޑިޓް ފެސިލިޓީގެ ތެރެއިންނާއި އިންޑިއާ ސަރުކާރުން ދޭ 100 މިލިއަން ޑޮލަރުގެ ހިލޭ އެހީންނެވެ.
ބްރިޖު ނިމުމުން ގްރޭޓާ މާލޭ ސަރަހައްދުގައި ހިމެނޭ ތިލަފުއްޓާއި ގުޅީފަޅާއި ވިލިމާލެ މާލެއާ ގުޅާލެވޭނެ އެވެ. އެއާއެކު ތިލަފުށިން ހުޅުމާލެއާ ހަމައަށް އެއްގަމު މަގުން ދަތުރުކުރެވޭނެ މަގުފަހި ވާނެ އެވެ.
މި ރަށްތައް ގުޅާލަން އަޅާ ބްރިޖާއި ކޯސްވޭ އަދި މަގުތަކުގެ ނެޓްވާކުގެ ދިގުމިނުގައި 6.7 ކިލޯމީޓަރު ހުންނާނެ އެވެ. މި ލިންކުގެ ބައިތަކުގެ ތެރޭގައި ތިން ބްރިޖާއި، ދެ މަގާއި، ކޮންމެ ރަށަކަށް އަރާ ފޭބުމަށް އިންޓަޗޭންޖް ޕޮއިންޓްތަކާއި، ޕާކިން ސަރަހައްދުތައް ގާއިމުކުރެވޭނެ އެވެ.
މާލެ-ތިލަފުށި ބްރިޖަކީ މި ސަރުކާރުގެ އިގުތިސޯދީ ތަސައްވުރާއި ސިޔާސަތުގެ މުހިންމު ބަޔެކެވެ. ނަމަވެސް މި ރިޔާސީ ދައުރު ނިމެންވާއިރަށް ބްރިޖުގެ މަސައްކަތް މުޅީން ނުނިމޭނެ އެވެ. މި ބްރިޖުގެ މަސައްކަތް އެއްކޮށް ނިންމާލެވެނީ މޭ 2024 އަށެވެ.
އެކަމަކު އަންނަ އަހަރުގެ މެދުތެރޭގައި މާލެއާ ވިލިމާލެއާ ގުޅާލެވި، އޮގަސްޓު ހިސާބުގައި ދަތުކުރަން ފެށޭނެ ކަމަށް ސަރުކާރުން އަންނަނީ ބުނަމުންނެވެ.
