ރާއްޖޭގެ ޒުވާނުންގެ އާބާދީގެ 53 ޕަސަންޓަކީ ބިދޭސީން ކަން މޯލްޑިވްސް ބިއުރޯ އޮފް ސްޓެޓިސްޓިސް އިން ހާމަކޮށްފި އެވެ.
ބައިނަލްއަގްވާމީ ޒުވާނުންގެ ދުވަހުގެ މުނާސަބާގައި ސްޓެޓިސްޓިސް ބިއުރޯއިން އާންމުކުރި ތަފާސްހިސާބުތަކުން ދައްކާ ގޮތުގައި, ރާއްޖޭގެ 579,000 މީހުންގެ އާބާދީގެ 45 ޕަސަންޓަކީ ޒުވާނުންނެވެ. ރާއްޖޭގައި ޒުވާނުންގެ ގޮތުގައި ބަލަނީ އުމުރުން 18 އަހަރާއި 35 އަހަރާ ދެމެދު މީހުންނެވެ.
ސްޓެޓިސްޓިކަލް ބިއުރޯއިން ހާމަކޮށްފައިވާ ގޮތުގައި ރާއްޖޭގައި 18 އަހަރާއި 35 އަހަރާ ދެމެދުގެ 258,923 މީހުން ދިރިއުޅެ އެވެ. އޭގެ ތެރެއިން 53 ޕަސަންޓަކީ ބިދޭސީން ކަމަށްވާއިރު, ދިވެހިންނަކީ ޒުވާނުންގެ އާބާދީގެ 47 ޕަސަންޓް މީހުން ކަމަށް ވެސް އެ ތަފާސްހިސާބުތަކުން ހާމަވެ އެވެ.
މީގެ އިތުރުން ރާއްޖޭގައިި 15 އަހަރާއި 24 އަހަރާ ދެމެދުގެ 97,039 މީހުން ދިރިއުޅޭކަން ވެސް ސްޓެޓިސްޓިކަލް ބިއުރޯއިން ހާމަކޮށްފައި ވެއެވެ.
ބައިނަލްއަގްވާމީ ޒުވާނުންގެ ދުވަސް ފާހަގަކުރަމުންދާއިރު, މިއަހަރު ޒުވާނުންގެ ދުވަހުގެ ޝިއާރަކީ “ޖީލްތަކުގެ މެދުގެ އެއްބައިވަންތަކަން” މިއެވެ.
