މޯލްޑިވްސް ޑިމޮކްރެޓިކް އެލަޔަންސް (އެމްޑީއޭ)އިން ވެރިކަމަށް އައުމަށް ކޯލިޝަނެއް ބޭނުމެއް ނުވާ ކަމަށް އެ ޕާޓީގެ ރައީސް ރައްޔިތުންގެ މަޖިލީހުގެ މީދޫ ދާއިރާގެ މެމްބަރު އަހުމަދު ސިޔާމް މުހައްމަދު (ސަން ސިޔާމް) މިއަދު ވިދާޅުވެއްޖެ އެވެ.
އަންނަ ރިޔާސީ އިންތިހާބުގައި ވާދަކުރައްވާނެކަން ސިޔާމް އިއުލާނު ކުރައްވާފައިވާއިރު، އެ ޕާޓީގެ ކޮންގްރެސްއަށްފަހު ވާހަކަދައްކަވަމުން ސިޔާމް ވިދާޅުވީ ރާއްޖެ މިހާރު އޮތް ހާލަތުން، "ރައްޔިތުން އުފާވާނެ ހާލަތަކަށް" ގެންދެވޭނެ ހަމައެކަނި ބަޔަކީ އެމްޑީއޭ ކަމަށެވެ.
"އިތުރަށް އަޅުގަނޑު ދެކޭ ގޮތުގައި ކުރިއަށް އޮތް ތަނުގައި މި ޕާޓިއަކުން ކޮންމެހެން ކޯލިޝަނެއް ބޭނުމެއް ނުވޭ ދިވެހިރާއްޖޭގެ ވެރިކަން މިވަގުތު އަންނާކަށެއް، އެއީ އަޅުގަނޑުމެންނަކީ ވަރަށް ސާފުތާހިރު ބައެއް،" ސިޔާމް ވިދާޅުވި އެވެ.
"އަޅުގަނޑުމެން ވިސްނުން މިހުރީ ފުރަތަމަ ބުރުގައި ވެސް ބޮޑު އަގުލަބިއްޔަތަކުން ވެރިކަން ކާމިޔާބު ކުރެވޭނެ ކަމަށް،"
ސިޔާމް ވިދާޅުވި ގޮތުގައި އެ ޕާޓީ އާއި އެ ބޭފުޅާގެ "ފަސްބައި ވަރަށް ސާފު" ވާނެ ކަމަށާއި ރައްޔިތުންނަށްޓަކައި ސިޔާމް ކޮށްދީފައިވާ ކަންކަން ވެސް ވަރަށް ސާފު ކަމަށާއި އެ ގާބިލްކަން ވެސް އެބަހުރި ކަމަށެވެ.
"[ރައްޔިތުންނަށް އެނގޭނެ] އަޅުގަނޑުމެންނަކީ ރައްޔިތުންނަށް ކިހާ ފައިސާއެއް ދޭ ބައެއް ކަން، ދިވެހިރާއްޖޭގައި އެންމެ ގިނަ ފައިސާ ދޭ ބައެއްގެ ގޮތުގައި ހަމަ ގައިމު ވެސް ދިވެހި ދައުލަތަށް އާސަންދަ އާއި އެހެނިހެން ކަންތައްތައް ކުރުމަށް ދިވެހި ދައުލަތަށް އެންމެ ގިނަ ފައިސާ ދޭ ބަޔަކީ އަޅުގަނޑުމެން، އެހެންވީމާ އަޅުގަނޑުމެންނަކީ ރައްޔިތުންނަށް ކަންކަން ކޮށްދެވޭނެ ބައެއް،" ސިޔާމް ވިދާޅުވި އެވެ.
ބަރުލަމާނީ ނިޒާމަށް ތާއީދު ނުކުރައްވާ ކަމަށާއި ވިސްނުން ހުރީ މިހާރު އޮތް ރިޔާސީ ނިޒާމުގައި ވެރިކަން ހިންގުމަށް ކަމަށް ވެސް ސިޔާމް ވިދާޅުވި އެވެ.
އެ ޕާޓީން މިއަދު ބޭއްވި އެކްސްޓްރާ އޯޑިނަރީ ކޮންގްރެސްގައި ވަނީ އެމްޑީއޭގެ ލީޑަރުގެ ނަން، ރައީސްއަށް ބަދަލު ކުރުމަށް ފާސްކޮށްފަ އެވެ.
ރިޔާސީ އިންތިހާބަށް ތައްޔާރުވުމުގެ ގޮތުން ރާއްޖޭގެ ރަށްރަށަށް އެ ޕާޓީން ދަތުރުކުރަމުން އަންނައިރު، އަމާޒަކީ އަހަރު ނިމުމުގެ ކުރިން ޕާޓީއަށް 50،000 މެންބަރުން ހަމަކުރުން ކަމަށް ވެސް މިއަދު ވަނީ ބުނެފަ އެވެ.
ސަން ސިޔާމް އިސްވެ ހުންނަވައި އުފެއްދި އެމްޑީއޭ އިލެކްޝަންސް ކޮމިޝަނުގައި ރަޖިސްޓްރީ ކުރީ ޑިސެމްބަރު 20، 2012 ގަ އެވެ. އޭގެ ކުރިން ވެސް ކުރީގެ ރައީސް އަބްދުﷲ ޔާމީނާއެކު ސިޔާސީ މަސައްކަތް ކުރެއްވި އެވެ. ޕާޓީ ހެދުމަށްފަހު ރައީސް ޔާމީން ވެރިކަން ކުރެއްވި ފަސް އަހަރު އެމްޑީއޭ އޮތީ ސަރުކާރު ކޯލިޝަން ޕާޓީއެއްގެ ގޮތުގަ އެވެ.
ރާއްޖޭގައި ސިޔާމް ހިންގާ ފަސް ރިސޯޓަކީ ސިޔާމް ވޯލްޑާއި އިރުފުއްޓާއި އިރުވެއްޔާއި ވިލު ރީފާއި އޮޅުވެއްޔެވެ. އަދި އޭގެ އިތުރުން ސްރީ ލަންކާގައި ސަން ސިޔާމް ޕަސިކޫޑާގެ ނަމުގައި ވެސް ރިސޯޓެއް ހިންގަ އެވެ. ނުވަދިހައިގެ އަހަރުތަކުގައި ޓުއާ އޮޕަރޭޓަރެއްގެ ގޮތުގައި މަސައްކަތް ފެށި ސަން ކުންފުނީގެ ފުރަތަމަ ރިސޯޓު ވިލު ރީފް ހުޅުވީ 1998 ވަނަ އަހަރެވެ.
އޭގެ އިތުރުން ސިޔާމަކީ ރާއްޖޭގައި ދިވެހި އަދި އިނގިރޭސި ބަހުން ނެރޭ ނޫސް "ސަން އޮންލައިން" ގެ ޗެއާމަނެވެ.
