ރައީސް މުހައްމަދު މުއިއްޒުގެ ވެރިކަން، ދައުރު ހަމަވުމުގެ ކުރިން ގާނޫނީ އިމުގެ ތެރެއިން ބަދަލުކުރަންޖެހޭ ކަމަށް ކުރީގެ ރައީސް މުހައްމަދު ނަޝީދު ދެއްކެވި ވާހަކައަށް ވެލިދޫ ދާއިރާގެ މެންބަރު މުހައްމަދު އައްބާސް ފުރިހަމައަށް ތާއިދުކުރައްވައި، ސަރުކާރަށް ބަހުގެ ހަމަލާތަކެއް އަމާޒުކުރައްވައިފިއެވެ.
އެމްޑީއޭއަށް ނިސްބަތްވާ އައްބާސް އެކްސްގައި ކުރެއްވި ޕޯސްޓެއްގައި ވިދާޅުވީ، މުއިއްޒުގެ ވެރިކަން ބަދަލުކުރަން ޖެހޭ ކަމަށް ނަޝީދު ދެއްކެވި ވާހަކަ އަށް "އިންސައްތަ ސަތޭކަ" ތާއިދުކުރައްވާ ކަމަށެވެ.
2028 ގެ ކުރިން މުއިއްޒުގެ ވެރިކަން ބަދަލުކުރަން ޖެހޭ ކަމަށް ނަޝީދު ވިދާޅުވެއްޖެ
ގައުމުގެ ސަލާމަތަށްޓަކައި 2028 ވަނަ އަހަރުގެ ކުރިން ރައީސް މުއިއްޒުގެ ވެރިކަން ބަދަލުކުރަންޖެހޭ ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ. އެމްޑީޕީގެ ޗެއާޕާސަން ކަމަށް ވާދަކުރައްވާ ނަޝީދު ވިދާޅުވީ، އެމަނިކުފާނުގެ އަމާޒަކީ ޕާޓީ ވަރުގަދަކޮށް އެމްޑީޕީގެ ސަރުކާރެއް އަލުން ގާއިމުކުރުން ކަމަށެވެ.
ގައުމުގެ މިހާރުގެ ހާލަތަށް ބަލާއިރު، މިއީ ގައުމުގެ މުސްތަގުބަލަށްޓަކައި ކޮންމެހެން ކުރަންޖެހިފައިވާ ކަމެއްގެ ގޮތުގައި އޭނާ ސިފަކުރެއްވިއެވެ
"އެ ނޫން ގޮތެއް ފެންނާކަށް ނެތް،" އައްބާސް ވިދާޅުވި އެވެ.
ސަރުކާރުގެ ސިޔާސަތުތަކަށް ފާޑުވިދާޅުވަމުން އައްބާސް ވިދާޅުވީ، މިހާރު ރާއްޖެ އޮތް ހާލަތަށް ބަލާއިރު ރައްޔިތުންނަށް އޮތް ހަމައެކަނި ހައްލަކީ ވެރިކަން ބަދަލުވުން ކަމަށެވެ.
"މިހާރު މިއޮތް ހާލަތަށް ބަލާއިރު ޤައުމަށް ރައްޔިތުންނަށް އަދި ގައުމުގެ މުސްތަގުބަލަށް އެނޫންގޮތެއް ފެންނާކަށް ނެތް. ރައީސް ޑރ. މުއިއްޒު ވެރިކަމުގައި ހުންނަ ކޮންމެ ދުވަހެއްގެ ސަބަބުން ގައުމުގެ އިޤްތިސާދަށް ފޫނުބެއްދޭ ވަރުގެ ބޮޑު ލޮޅުންތަކެއް އަރަމުންދަނީ."އައްބާސް
އޭނާ އިތުރަށް ފާހަގަކުރެއްވި ގޮތުގައި، އިގުތިސާދީ މި ދަތިކަމުގެ ސަބަބުން އާންމު ރައްޔިތުންގެ ދިރިއުޅުމުގެ ހާލަތު ދަނީ ދުވަހުން ދުވަހަށް ދަށަށެވެ.
އައްބާސްގެ ބަހުގެ ހަމަލާތައް އެންމެ ބޮޑަށް އަމާޒުވީ ސަރުކާރު ހިންގުމުގެ ނިޒާމަށެވެ. އޭނާ ތުހުމަތުކުރެއްވި ގޮތުގައި ހުރިހާ މައްސަލައެއްގެ އަސްލަކީ ރައީސް މުއިއްޒަށް "ސަރުކާރު ހިންގަން ނޭގުން" ކަމަށެވެ. މިނިސްޓްރީތަކަށް މިނިސްޓަރުން ހަމަޖައްސާ ނުނިމޭ ކަމަށާއި، ކުންފުނިތަކުގެ ވެރިން މެދުނުކެނޑި ބަދަލުކުރަމުންދާ ކަން އޭނާ ފާހަގަކުރެއްވިއެވެ.
ދައުލަތުގެ މާލީ ހާލަތަށް ބެލުމެއް ނެތް "މަތިބަރު" ސަރުކާރެއް އުފަންކޮށްފައިވާ ކަމަށާއި އެހެން މީހުންނަށް އިހުތިރާމު ކުރުމާއި، މަޝްވަރާގެ ރިވެތި އުސޫލުން ކަންކަން ތަރުތީބު ނުކުރާ ކަމަށްވެސް އައްބާސް ވިދާޅުވިއެވެ.
