ފުލުހުންގެ އުމްރާނީ ތަރައްގީއަށް 48 މިލިއަން ޑޮލަރުގެ ބިޔަ މަޝްރޫއެއް ފަށައިފި އެވެ.
ފުލުހުންގެ 89 އަހަރުގެ ތާރީހުގައި ހިންގާ އެންމެ ބޮޑު އުމްރާނީ ތަރައްގީގެ މި މަޝްރޫއުގެ ބިންގާ އަޅާފައި ވަނީ މިއަދު ކ. ތުލުސްދޫގައި ބޭއްވި ހާއްސަ ރަސްމިއްޔާތެއްގައި ހޯމް މިނިސްޓަރު އިމްރާން އަބްދުﷲ އެވެ. 48,176,529 ޑޮލަރުގެ މި މަޝްރޫއަކީ 730 ދުވަހުގެ ތެރޭގައި ނިންމަން ހަވާލުކުރި މަޝްރޫއެކެވެ.
މި މަޝްރޫއުގެ ދަށުން 23 ރަށެއްގައި ރަށު ފެންވަރުގެ ޕޮލިސް ސްޓޭޝަން އެޅުމާއި، އަށް އަތޮޅެއްގައި އަތޮޅު ފެންވަރުގެ ޕޮލިސް ސްޓޭޝަން އެޅުމުގެ އިތުރަށް 21 ޕޮލިސް ޕޯސްޓު ގާއިމް ކުރުމަށް ވަނީ ހަމަޖެހިފަ އެވެ.
މީގެ އިތުރުން މި މަޝްރޫއުގެ ދަށުން މާލެ ސަރަހައްދުގައި ގަލޮޅު ޕޮލިސް ސްޓޭޝަނެއް އިމާރާތް ކުރުމާއި، ހުޅުމާލެ ދެވަނަ ފިޔަވަހީގެ ދެ ޕޮލިސް ސްޓޭޝަން އިމާރާތް ކުރުމަށް ހަމަޖެހިފައިވާއިރު، ހދ. ކުޅުދުއްފުއްޓާއި، ލ. ގަމުގައި ހުރި ޕޮލިސް ސްޓޭޝަން ރީޖަނަލް ހެޑްކުއާޓާގެ ގޮތުގައި ތަރައްގީކޮށް، ފަސް ޖަލު ގޮޅި އިތުރު ކުރުމަށް ހަމަޖެހިފައިވާ ކަމަށް ހޯމް މިނިސްޓްރީން ބުނެ އެވެ.
އެ މިނިސްޓްރީން އިތުރަށް ބުނީ މި މަޝްރޫއުގެ ދަށުން ކ. ދޫނިދޫގައި ކަސްޓޯޑިއަލް ފެސިލިޓީއަކާއި، ވިލިމާލޭގައި 400 މީހުންގެ އަދި ދ. ވަނީ ޓްރެއިނިން ސެންޓަރުގައި 100 މީހުންގެ އެކޮމޮޑޭޝަން ބިލްޑިންއެއް އިމާރާތް ކުރާނެ ކަމަށެވެ. އޭގެ އިތުރަށް ގއ. ވިލިގިއްޔާއި، ހއ. ދިއްދޫގެ އިތުރުން މިހާރު ޕޮލިސް ސްޓޭޝަން ހުރި ރަށްތަކުގައި ވެސް އެކޮމޮޑޭޝަން ބިލްޑިން އަޅާނެ ކަމަށް ހޯމް މިނިސްޓްރީން ބުނެ އެވެ.
މި މަޝްރޫއާ ގުޅޭގޮތުން މިނިސްޓަރު އިމްރާން ވިދާޅުވީ ރައްޔިތުންނަށް ހިދުމަތް ދިނުމަށް އެންމެ އެކަށޭނެ ސްޓޭޝަންތަކާއި އެހެނިހެން ވަސީލަތްތައް ފުލުހުންނަށް ހޯދައި ދެއްވުމަށް ރައީސް އިބްރާހިމް މުހައްމަދު ސޯލިހް ކުރައްވާ ބުރަ މަސައްކަތުގެ ނަތީޖާ ފެންނަމުންދާ ކަމަށެވެ.
