ގިނަ އަދަދެއްގެ މީހުންނާއެކު އެއް ޖިންސުން ގުޅުން ހިންގި ކަމަށް އިއުތިރާފުވެފައިވާ ބަންގްލަދޭޝްގެ އަލަމްގީރާ އެކު އެ ގުޅުން ހިންގި ކަމަށް ތުހުމަތު ކުރެވޭ ބައެއް މީހުންގެ ޕާސްޕޯޓު ހިފެހެއްޓުމުގެ މަރުލަހާ ކުރިއަށް ދަނިކޮށް އޭގެ ތެރެއިން ބައެއް މީހުން ރާއްޖެއިން ބޭރަށް ފުރާފައިވާ ކަން އެނގިއްޖެ އެވެ.
ބަދުއަހުލާގީ އަމަލު ހިންގާ ވީޑިއޯތައް އާންމުވުމަށް ފަހު ފުލުހުން ބުނެފައި ވަނީ އެ ވީޑިއޯތަކުގައި ހިމެނޭ މީހުންގެ މައްސަލަތައް ބަލަމުންދާ ކަމަށެވެ. އަދި، އެ ވީޑިއޯތައް ބޭނުންކޮށްގެން ބްލެކްމެއިލް ކުރި ކަމަށް ބުނެ ހުށަހަޅާފައިވާ މައްސަލަަތަކެއް ވެސް ފުލުހުން ގެންދަނީ ބަލަމުންނެވެ.
ފުލުހުން މި މައްސަލައިގެ ތަހުގީގު ކުރިއަށް ގެންދާއިރު، ފުލުހުންގެ އިސް އޮފިޝަލަކު "އަދަދު"އަށް މިއަދު ވިދާޅުވީ، އަލަމްގީރާއެކު އެއް ޖިންސުން ގުޅުން ހިންގި ކަމަށް ފާހަގަވެފައިވަނީ 40 އެއްހާ މީހުން ކަމަށާއި އޭގެ ތެރެއިން ބައެއް މީހުންގެ އެއް ވީޑިއޯއަށް ވުރެ ގިނަ ވީޑިއޯ ވެސް ހުރި ކަމަށެވެ.
"ބައެއް ފަރާތްތަކުން ހަބަރު ފަތުރާފައިވޭ މި މައްސަލައިގައި 200 އަށް ވުރެ ގިނަ މީހުންގެ ވީޑިއޯ އުޅޭ ކަަމަށް، އެހެންނަމަވެސް އެއީ ސައްހަ އަދަދެއް ނޫން، ފުލުހުންގެ ތަހުގީގަށް މިހާތަނަށް ފާހަގަވެފައިވަނީ 50 އަށްވުރެ މަދު މީހުންގެ ބައިވެރިވުން،" އޮފިޝަލް ވިދާޅުވި އެވެ.
މި މައްސަލައިގައި ތުހުމަތު ކުރެވޭ 20 އަށް ވުރެ ގިނަ މީހުންގެ ޕާސްޕޯޓު ފުލުހުން މިހާތަނަށް ވަނީ ހިފަހައްޓާފަ އެވެ.
އެހެންނަމަވެސް މައްސަލައިގައި ތުހުމަތު ކުރެވޭ ބައެއް ފަރާތްތަކުގެ ޕާސްޕޯޓު ހިފެހެއްޓުމުގެ މަރުހަލާ ކުރިއަށް ދަނިކޮށް، އޭގެ ތެރެއިން ބައެއް މީހުން ރާއްޖެއިން ބޭރަށް ފުރައިގެން ގޮސްފައިވާ ކަން ފާހަގަކުރެވިފައިވާ ކަމަށް ވެސް އޮފިޝަލް ވިދާޅުވި އެވެ.
"ޖިނާއީ އިޖުރާއަތުގެ ގާނޫނު އޮންނަ ގޮތުން ކުށެއްގެ ތުހުމަތުވާ ހިސާބުން އަދި ޕާސްޕޯޓު ހިފެހެއްޓެން ނޯވޭ، ޕާސްޕޯޓު ހިފެހެއްޓުމުގެ އަމުރަކަށް މި އެދެވެނީ އޭނާ ފިލައިގެން ދާންއުޅޭ ކަމަށް ބެލުމުގައި އެކަށީގެންވާ ހެކި ލިބިފައިވާ ނަމަ،" އޭނާ ވިދާޅުވި އެވެ.
titledesc
އޭނާ ވިދާޅުވި ގޮތުގައި މައްސަލަ ފެންމަތިވުމާއެކު ބައެއް މީހުން ފުރައިގެން ދިޔަ ނަމަވެސް އޭގެ ތެރެއިން ބައެއް މީހުން އަނބުރާ ރާއްޖެ އައިސްފައި ވެސްވެ އެވެ.
ފުލުހުން މީގެ ކުރިން ބުނެފައިވާ ގޮތުގައި، ތަހުގީގަށް މީހުން ހައްޔަރުކުރުމާއި މިފަދަ މައްސަލަތަކުގައި އެކަށީގެންވާ މީންވަރަށް ހެއްކާއި ގަރީނާ ހޯދިފައިވާ ދައުލަތުގެ އެކި އިދާރާތަކުގައި މަސައްކަތްކުރާ ފަރާތްތައް ނިސްބަތްވާ އޮފީސްތަަކަށް އެމީހުންގެ މައްސަލަތައް ތަހުގީގު ކުރަމުންދާކަން އަންގަމުންދާ ކަމަށް ވަނީ ބުނެފަ އެވެ.
އެއާއެކު، ގިނަ އިދާރާތަކުން އަންނަނީ ވީޑިއޯތަކުގެ މައްސަލައިގައި ހިމެނޭ މީހުން ސަސްޕެންޑުކުރަމުންނެވެ. މިގޮތުން މިހާތަނަށް ކަސްޓަމްސް ދެ މުވައްޒަފަކާއި ބައެއް މިނިސްޓްރީތަކުގެ މުވައްޒަފުންނާއި އިމާމެއްގެ އިތުރުން ޓީޗަރަކާއި ސިފައިންގެ މީހެއް ވެސް ވަނީ ސަސްޕެންޑުކޮށްފަ އެވެ.
މި މައްސަލައާ ގުޅިގެން މިހާތަނަށް ފުލުހުން ވަނީ ހަތަރު މީހަކު ހައްޔަރުކޮށްފަ އެވެ. އެއީ އަލަމްގީރުގެ އިތުރުން އަލަމްގީރާ އެކު ދައުރުވެފައިވާ ވީޑިއޯތަކުން ފެނިފައިވާ ރައްޔިތުންގެ މަޖިލީހުގެ ނޮޅިވަރަމް ދާއިރާގެ ކުރީގެ މެންބަރު މުހައްމަދު ނަޝީދު (ކާނަލް) އާއި ގާނޫނީ ވަކީލު ނާޒިމް އަބްދުއްސައްތާރު އަދި ފުލުހެކެވެ.
