ސަބްސިޑީތަކަށް މި އަހަރު ހޭދަ ކުރަން ބަޖެޓު ކުރި އަދަދަށް ވުރެ އިތުރަށް 1.4 ބިލިއަން ރުފިޔާ މިހާރު ވެސް ހަރަދުވެއްޖެ ކަމަށް ފިނޭންސް މިނިސްޓަރު ޒަރީރު ވިދާޅުވެއްޖެ އެވެ.
ސަބްސިޑީތަކަށް ބަޖެޓު ކުރީ 2.9 ބިލިއަން ރުފިޔާ ނަމަވެސް މި އަހަރުގެ މިހާތަނަށް 4.3 ބިލިއަން ރުފިޔާ ސަބްސިޑީތަކަށް ހަރަދުވެފައިވާ ކަމަށް ޒަރީރު ވިދާޅުވީ ޕީއެސްއެމްގެ "އަހާ" ޕްރޮގްރާމުގައި ވާހަކަ ދައްކަވަމުންނެވެ.
"އެގޮތުން އަޅުގަނޑުމެން މި އަހަރަށް ބަޖެޓުކޮށްފައި ވަނީ 2.9 ބިލިއަން. އެހެން ނަމަވެސް މިހާތަނަށް 4.3 ބިލިއަން ސަބްސިޑީޒްގެ ގޮތުގައި އަޅުގަނޑުމެންނަށް ހަރަދު ކުރަންޖެހިފައިވޭ،" ޒަރީރު ވިދާޅުވި އެވެ.
ސަބްސިޑީއަށް ކުރަންޖެހޭ ހޭދަ އިތުރުވީ، މެދުއިރުމަތީގެ ހަނގުރާމައާއެކު ތެލާއި ދަތުރުފަތުރުގެ އަގުތައް ބޮޑުވުމުންނެވެ. ޒަރީރު ވިދާޅުވީ ރައްޔިތުންނަށް އަތްފޯރާ ފަށުގައި ތެލުގެ އަގުު ހިފަހައްޓަން ވަރަށް ބޮޑު ހޭދައެއް ސަބްސިޑީއަށް ކުރަންޖެހޭ ކަމަށެވެ.
"ހާއްސަ ގޮތެއްގައި ދައުލަތުން ސަބްސިޑައިޒް ކުރަންޖެހޭ މިންވަރު، ތެލުގެ އަގު ހިފަހައްޓާ، ރައްޔިތުންނަށް ދިމާވެދާނެ އުނދަގޫތަކާއި ގޮންޖެހުންތަކަށް ހައްލުތަކެއް ހޯދައިދީ ރައްޔިތުންނަށް ކަންކަން ފަހިކޮށްދިނުމުގެ ގޮތުން ސަބްސިޑީޒްގެ ގޮތުގައި ދައްކަންޖެހޭ އަދަދުތައް އިތުރުވެގެން ގޮސްފައިވޭ،" އޭނާ ވިދާޅުވި އެވެ.
އިރާނަށް، އެމެރިކާ އާއި އިޒްރޭލުން ހަމަލާ ދޭން ފެށީ ފެބްރުއަރީ 28، 2026، ގަ އެވެ. އެކަމަކު ހަރަދު ކުޑަކުރުމުގެ އެއްވެސް ފިޔަވަޅެއް އެއިރު ސަރުކާރުން ނޭޅި އެވެ. އޭގެ މައިގަނޑު އެއް ސަބަބަކީ ލޯކަލް ކައުންސިލްތަކުގެ އިންތިހާބު ބޯމަތިވެފައި އޮތުމެވެ.
"އިންތިހާބު ނިމިގެން އަޅަން ބަހައްޓާފައި ހުރި ފިޔަވަޅެއް ނުހުންނާނެ، އަޅުގަނޑުމެން މިދަނީ ވީކްލީ މީޑިއާ މެދުވެރިކޮށް ފިޔަވަޅުތައް، އަޅަން ގަސްތުކުރާ ސިޔާސަތުތައް އިއުލާން ކުރަމުން،" މާޗް 30، ގައި މުއިއްޒު ވިދާޅުވި އެވެ.
ހަރަދު ކުޑަ ކުރުމުގެ ފިޔަވަޅުތައް މުއިއްޒު އިއުލާން ކުރެއްވީ އޭޕްރީލް 3، ގައި ބޭއްވި އިންތިހާބުން ނާކާމިޔާބީ ލިބިވަޑައިގަތާ ހަ ދުވަސް ފަހުން އޭޕްރީލް 6، ގަ އެވެ. އެ ފިޔަވަޅުތަކުގެ ތެރޭގައި ސަރުކާރުގެ އެސްއޯއީތަކުން މުވައްޒަފުން ކެނޑުން ހިމެނެ އެވެ.
