މާލެ ސަރަހައްދުގެ ތޮއްޖެހުމަށް ހައްލެއް ހޯދުމަށް ފަށާފައިވާ ރަސްމާލެގެ ބިންތައް ޓެންޑަރަށް ލައިގެން ބޭރު އެއްވެސް ބަޔަކަށް ދޫކޮށްލުމާ ދެކޮޅުކަމަށާއި އެ ބިން ހާއްސަ ވެފައި އޮންނަންވާނީ ދިވެހިންނަށް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފްއިން މިރޭ ބޭއްވި ޖަލްސާގައި ރައީސް ޔާމީން ވިދާޅުވީ، ރަސްމާލެ މަޝްރޫއަކީ މާލެއާއި ހުޅުމާލޭގައި ދިވެހިން ތޮއްޖެހިގެން އުޅޭ އުޅުމަށް ހައްލެއް ހޯދައިދިނުމަށް ގެނެވޭ މަޝްރޫއެއް ކަމަށެވެ. އެ މަޝްރޫއު ތަރައްގީކުރަން އެ މަނިކުފާނުގެ ވެރިކަމުގައި ކަނޑައެޅި އަމާޒަކީ 2030 ވަނަ އަހަރާ ހަމައަށް ދާންވާއިރަށް، އުމުރުން 18 އަހަރު ފުރޭ ކޮންމެ ކުއްޖަކަށް މާލޭ ސަރަހައްދުން ބޯހިޔާވަހިކަމެއް ކަށަވަރުކޮށްދިނުން ކަމަށް ޔާމީން ވިދާޅުވި އެވެ.
ރަސްމާލެ ބީލަމަށް ލައިގެން ބޭރުގެ ފަރާތްތަކަށް އެތަން ވިއްކާލަން ބޭނުން ނުވާކަމަށް ވިދާޅުވެ، ރައީސް ޔާމީން ވަނީ ކަންބޮޑުވުން ފާޅުކުރައްވާފަ އެވެ.
"އަޅުގަނޑުމެން ބޭނުމެއް ނެތް ޓެންޑަރަކަށް ލައިގެން ވެސް އަނެއްކާ މިތަން، ޔަހޫދީން ދުރަށް ލާފައި އަނެއްކާ ޓެންޑަރަކަށް ލައިގެން ވެސް ބޭރު މީހުންނަށް ނަގައި ވިއްކާލަން،" އެމަނިކުފާނު ވިދާޅުވި އެވެ.
ރާއްޖޭގެ ރައްޔިތުންނަށް ނުލިބޭ ވަސީލަތްތަކެއް، ދިވެހި ރައްޔިތުންގެ ފައިސާ ހޭދަކޮށްގެން ހިންގާ ޕްރޮޖެކްޓަކުން އެހެން ބަޔަކަށް ލިބުމަކީ ގަބޫލުކުރައްވާނެ ކަމެއް ނޫންކަމަށް ވެސް ޔާމީން ވިދާޅުވިއެވެ. އެއީ ދިވެހި ރައްޔިތުން "ދެވަނަ ދަރަޖައިގެ" ރައްޔިތުންނަށް ވެގެންދާނެ ކަމެއް ކަމަށް ވެސް ޔާމީން ވިދާޅުވި އެވެ.
ރަސްމާލެ ވޯޓާ ފްރޮންޓު އެންޑް މެރީނާ މަޝްރޫއު ހިންގަން ސަރުކާރުން ހަވާލުކުރަން ނިންމާފައިވާ އީގަލް ހިލްސްގެ ވެރިޔާ އަލައްބާރަކީ ޔަހޫދީންގެ އެކުވެރިޔަކަށްވާތީ އެކަމަށް އިޝާރާތް ކުރައްވައި ޔާމީން ވިދާޅުވީ މިހާރު މުއިއްޒުގެ އަތުގައި އޮތީ ޒައިނިސްޓުންގެ ދަންމަރު ކަމަށެވެ.
އީގަލް ހިލްސްއަށް ރަސްމާލެ ދޫކޮށްލަން ސިއްރު އެގްރިމެންޓެއްގައި ސޮއި ކުރީ ސެޕްޓެމްބަރު 21، ގަ އެވެ. ދައުލަތުގެ ފައިސާއިން ހިއްކި ރަސްމާލެ ދޫކޮށްލަނީ އެކުއިޒިޝަން ކޮސްޓެއް އަދި ބިމު ކުއްޔެއް ނުނަގާ ގޮތަށެވެ.
ސަރުކާރުން ބުނަނީ އީގަލް ހިލްސްއަށް ރަސްމާލޭގެ 500 ހެކްޓަރު ވިއްކާލަނީ 99 އަހަރަށް ކަމަށެވެ. ނަމަވެސް އީގަލް ހިލްސް އިން ބުނެފައި ވަނީ ސަރުކާރުން އެ ބުނާ 99 އަހަރުގެ މުއްދަތު ހަމަވުމުގެ ކުރިން ރަސްމާލޭގެ ޕްރޮޕަޓީއެއް ވިއްކާލައިފި ނަމަ ނުވަތަ ހިބައިން ދީފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށެވެ.
