ގެދޮރު ގަންނަ އަދި އިމާރާތް ކުރަން ބޭނުންވާ މީހުންނަށް ބޮޑެތި އަދަދުތަކުން ހިލޭ ފައިސާ ދޫކުރުމަށްޓަކައި "ހެލްޕު ޓު ބިލްޑް، ހެލްޕް ޓު ބައި" ކިޔާ ޕްރޮގްރާމުގެ އެއްބަސްވުންތަކުގައި މިއަދު ސޮއިކޮށްފި އެވެ.
އިކުއިޓީ ހިލޭ ކުރުމުގެ ޕްރޮގްރާމުގައި ހައުސިން މިނިސްޓްރީއާއެކު ސޮއި ކުރީ ބޭންކް އޮފް މޯލްޑިވްސް އާއި މޯލްޑިވްސް އިސްލާމިކް ބޭންކް އާއި ހައުސިން ޑިވެލޮޕްމަންޓް ފިނޭންސް ކޯޕަރޭޝަން އާއި މޯލްޑިވްސް ފައިނޭންސް ލީސިން ކޮމްޕެނީ އެވެ.
އެ ޕްރޮގްރާމުގެ ދަށުން މާލޭގައި ގެދޮރު އިމާރާތް ކުރަން ބޭނުންވާ ނަމަ އެއް މިލިއަން ރުފިޔާއާ ހަމައަށް ސަރުކާރުން ހިލޭ ފައިސާ ދޭނެ އެވެ. އަދި ރަށެއްގައި ނަމަ ދެ ލައްކަ ރުފިޔާއާ ހަމައަށް ހިލޭ ފައިސާ ދޭނެ އެވެ.
އެ ޕްރޮގްރާމުގެ ދަށުން 1.5 މިލިއަން ރުފިޔާޣެ އެޕާޓްމަންޓެއް ގަންނަ ނަމަ 250،000 ރުފިޔާއާ ހަމައަށް ހިލޭ ފައިސާ ދޭން ހަމަޖެފައިވެ އެވެ. މިކަމުގެ ފުރިހަމަ ތަފުސީލުތަކެއް އަދި ނުލިބެ އެވެ.
ގެދޮރު އިމާރާތް ކުރާ މީހުންނަށް އަދި ގަންނަ މީހުންނަށް ހިލޭ ފައިސާތަކެއް ދެއްވަން ސަރުކާރުން ނިންމާފައިވާކަން އިއުލާން ކުރެއްވީ ރައީސް މުހައްމަދު މުއިއްޒު ޕީއެސްއެމްގެ ޕްރޮގްރާމެއްގައި ވާހަކަ ދައްކަވަމުން ހޮނިހިރު ދުވަހެވެ.
"މިއީ ލޯނެއް ނޫން، މި ހިލޭ. ސަރުކާރުން ދެނީ އިކުއިޓީ ކޮމްޕޯނަންޓަށް ދޭ މިއީ ހަމަ، އަނބުރާ ދައްކަން ނުޖެހޭ އެއްޗެއް، ދެން 200،000ރ. ވަރު ކޮންމެ މީހަކަށް، ދެން ފައިވް ޕަސެންޓު، ދެން ގޭގެ ތިންހަތަރު މީހުން އެއްކޮށްލައިގެން ވެސް މިސާލަކަށް އެއް މިލިއަނެއްހައި ރުފިޔާ ވެސް ލިބިދާނެ ކަންނޭނގެ، ފަސް މީހުން ތިބެއްޖެއްޔާ ދެއްތޯ؟" ރައީސް އޮފީހުން ގެނެސްދޭ ޕްރޮގްރާމެއްގައި ވާހަކަ ދައްކަވަމުން މުއިއްޒު ވިދާޅުވި އެވެ.
