އިންޑިއާ ސަރުކާރުގެ ހިލޭ އެހީގެ ދަށުން އައްޑޫ ސިޓީގައި އެޅި ޕޮލިސް އެކަޑަމީ (ނެޝަނަލް ކޮލެޖް އޮފް ޕޮލީސިން އެންޑް ލޯ އެންފޯސްމަންޓް) ގައި ރަސްމީކޮށް ތަމްރީނުތައް ފަށައިފި އެވެ.
މިދިޔަ މާޗް މަހު މި ކޮލެޖު ހުޅުއްވައި ދެއްވީ ރައީސް އިބްރާހިމް މުހައްމަދު ސޯލިހު އާއި އިންޑިއާގެ އެކްސްޓާނަލް އެފެއާޒް މިނިސްޓަރު ޑރ. އެސްޖައިޝަންކަރުއާ ދެ ބޭފުޅުންނެވެ.
އެތަނުގައި މިއަދު ފެށީ ފުލުހުންގެ 34 ވަނަ ތަމްރީނު ކޯހެވެ. މި ކޯސް ފަށާފައި ވަނީ 197 ރެކްރޫޓުންނާއެކު އެވެ. މިއީ މި އެކަޑަމީ ހުޅުވި ފަހުން ފުރަތަމަ ފަހަރަށް އެތަނުގައި ބާއްވާނެ ތަމްރީނުތަކެވެ.
"[ތަމްރީނުތައް ފަށާފައި ވަނީ] ކަރިކިއުލަމް މުރާޖާ ކުރުމަށްފަހު ފުލުހުންގެ ހިދުމަތް ދިނުމުގައި ދިމާވާ ދަތިތަކާ ކުރިމަތިލެވޭނެ ގޮތަށް،" މިއަދު ކުރެއްވި ޓްވީޓެއްގައި ކޮމިޝަނާ އޮފް ޕޮލިސް މުހައްމަދު ހަމީދު ވިދާޅުވި އެވެ.
ދިވެހި ފުލުހުންނަށް ތަމްރީންތައް ދިނުމަށް ހާއްސަކޮށްގެން ހުޅުވި މި އެކަޑަމީ އަކީ އިންޑިއާ ސަރުކާރުގެ ހިލޭ އެހީގެ ދަށުން ހުޅުވި އެކަޑަމީއެކެވެ.
އެ އިމާރާތުގައި ހިމެނޭ ތަންތަން:
- އެކޮމަޑޭޝަން ބްލޮކްތައް
- މެޑިކަލް ހިދުމަތް ދޭނެ ކްލިނިކްތައް
- ޕީޓީ ގްރައުންޑް
- ހެލިޕޭޑާއި ޓްރެއިނިން ސެންޓަރު
- 800 މީހުންގެ ޖާގައިގެ ޖިމެއް
- ފުޓްބޯޅަ ދަނޑެއް
- ބާސްކެޓް ކޯޓެއް
- ޓެނިސް ކޯޓެއް
- 400 މީޓަރުގެ ޓްރެކެއް
- 340 މީހުންގެ އޮޑިޓޯރިއަމެއް
- 40 މީހުންގެ ޖާގަ ހިމެނޭ ގޮތަށް 320 މީހުންނަށް ކިޔަވައިދެވޭ ގޮތަށް ކްލާސްރޫމާއި ފަދަ ވަސީލަތްތައް
އައްޑޫ ޕޮލިސް އެކަޑެމީ އަކީ އިންޑިއާ ސަރުކާރުން ރާއްޖޭގައި ހިންގަން ނިންމާފައިވާ މަޝްރޫއުތަކުގެ ތެރެއިން ދެވަނަ އަށް އެންމެ ބޮޑު މަޝްރޫ އެވެ. މި އެކަޑެމީ އަކީ ހިތަދޫގައި ކުރިން ހުރި ފުލުހުންގެ ޓްރެއިނިން ސްކޫލް ފެބްރުއަރީ 8، 2012 ގައި އަންދައިލުމާ ގުޅިގެން އިންޑިއާ ސަރުކާރުން ހިލޭ އެހީގެ ގޮތުގައި ހިންގައިދޭން ނިންމި މަޝްރޫއެކެވެ.
