ހެއްކާބެހޭ ގާނޫނުގައި މަސްދަރު ހާމަކުރަން މަޖުބޫރު ކުރެވޭ ހާލަތްތަކެއް ކަނޑައަޅާފައިވާ މާއްދާ އިސްލާހުކޮށްދިނުމަށް އެދި، ގެންނަން ބޭނުންވާ އިސްލާހުތައް މޯލްޑިވްސް ޖާނަލިސްޓްސް އެސޯސިއޭޝަން (އެމްޖޭއޭ)އިން ރައީސް އިބްރާހިމް މުހައްމަދު ސޯލިހަށް މިއަދު ހުށަހަޅައިފި އެވެ.
ރައީސް އޮފީހުގައި މިއަދު ބޭއްވި ބައްދަލުވުމުގައި ހެއްކާ ބެހޭ ބިލާ ގުޅިގެން ނޫސްވެރިންގެ ކަންބޮޑުވުންތައް ރައީސްއާ ހިއްސާކޮށްފައިވަނީ އެމްޖޭއޭ އާއި އެޑިޓާޒް ގިލްޑްގެ ހިންގާ ކޮމިޓީގެ މެމްބަރުންނެވެ. މި ބައްދަލުވުމުގައި އެޓާނީ ޖެނެރަލް އިބްރާހިމް ރިއްފަތު ވެސް ބައިވެރިވެވަޑައިގެންނެވި އެވެ.
އެމްޖޭއޭއިން ބުނި ގޮތުގައި ބައްދަލުވުމުގައި އެ ޖަމިއްޔާއިން ވަނީ ހެއްކާބެހޭ ގާނޫނުގެ 136 ވަނަ މާއްދާއާ ގުޅޭ ގޮތުން ނޫސްވެރިން ކަންބޮޑުވާ ކަންކަން ރައީސަށް ވަރަށް ތަފްސީލީ ގޮތެއްގައި ދަންނަވައި, މިހާރު އެ މާއްދާ އޮތް ގޮތާ މެދު އެމްޖޭއޭއިން ދެކޭ ގޮތް ހާމަކޮށްފަ އެވެ.
އަދި، މިހާރު އެ މާއްދާ އޮތް ގޮތާ މެދު ދެކޮޅު ހަދާ ކަމާއި އެ މާއްދާ އިސްލާހު ކުރަން ބޭނުންވާ ކަން ހާމަކޮށް، އެ މާއްދާއަށް ގެންނަން ބޭނުންވާ އިސްލާހުތައް މި ބައްދަލުވުމުގައި ވަނީ ހުށަހަޅައިފަ އެވެ.
އެމްޖޭއޭއިން އިސްލާހު ކުރަން ހުށަހެޅިކަންކަމުގެ ތެރޭގައި ހިމެނެނީ:
- ޓެރަރިޒަމްގެ ކުށްތަކަކީ ކޮބައިކަން ތަފްސީލްކޮށް ބަޔާންކުރުން
- މަސްދަރު ހާމަކުރުން މަޖުބޫރު ކުރެވޭ އަނެއް ހާލަތް ކަމަށްވާ "ގައުމީ ސަލާމަތް" ގާނޫނުން އެއްކޮށް އުނިކުރުން
- 'އިމިނެންޓް ތްރެޓް' (ކުއްލި ނުރައްކަލެއް) އޮތް ފަދަ ހާލަތެއްގައި އެކަނި މަސްދަރު ހާމަކުރަން ޖެހޭ ގޮތަށް އިސްލާހު ގެނައުން
- ތުހުމަތު ކުރެވޭ ފަރާތްތަކަށް ވެސް މަސްދަރު ހާމަކުރަން އެދުމުގެ ފުރުސަތު އޮތް އޮތުން ގާނޫނުން އުނިކުރުން
- މަދަނީ މިންގަނޑުން ސާބިތުކުރަން ލާޒިމް ކުރުމުގެ ބަދަލުގައި 'ނެސެސިޓީ' އަދި "ޕްރޮޕޯޝަނަލިޓީ"ގެ އުސޫލުތަކުގެ ތެރެއިން ކަންކަން ސާބިތުކުރުމަށް ލާޒިމްކުރުން
މި ބައްދަލުވުމުގައި ހެއްކާ ބެހޭ ބިލާ ގުޅިގެން ނޫސްވެރިންގެ ހުރި ކަންބޮޑުވުންތައް ހައްލުކޮށްދެއްވަން މަސައްކަތް ކުރައްވާނެ ކަމުގެ ޔަގީންކަން ރައީސް ސޯލިހު ދެއްވި ކަމަށް އެމްޖޭއޭއިން ބުންޏެވެ.
ހެކީގެ ގާނޫނު އޮތް ގޮތުން ޓެރަރިޒަމް އަދި ގައުމީ ސަލާމަތާ ގުޅޭ މައްސަލަތަކުގައި މަސްދަރު ހާމަކުރުމަށް ކޯޓަށް ނޫސްވެރިޔާގެ މައްޗަށް އަމުރު ކުރެވިދާނެ އެވެ. ގައުމީ ސަލާމަތަކީ އެއްވެސް ގާނޫނެއްގައި މާނަކޮށްފައިނުވާ ވަރަށް ފުޅާ ގޮތެއްގައި ދޫކޮށްލާފައިވާ ކަމެއްކަމުން, އެކަމުގެ ކަންބޮޑުވުން ނޫސްވެރިންގެ ވަރަށް ބޮޑަށް އެބަ އޮތެވެ.
އެމްޖޭއޭ އާއި މޯލްޑިވްސް މީޑިއާ ކައުންސިލް (އެމްއެމްސީ) އިން ވަނީ އެ މާއްދާ އެއްކޮށް އުނިކޮށް ދިނުމަށް ދިރާސާ މަރުހަލާގައި ޖުޑީޝަރީ ކޮމިޓީގައި އެދުނެވެ.
ޓެރަރިޒަމްގެ ވަކި ހާއްސަ ކުށްތަކަކާ ގުޅޭ މަސްދަރެއް ނޫނީ ހާމަކުރަން ނޭންގޭނެ ގޮތަށް އިސްލާހު ކުރުމާއި އެ ހާލަތުގައި ވެސް ގިނަ ކަންތައްތަކެއް ސާބިތު ކުރެވިގެން މެނުވީ ނޫސްވެރިޔާގެ މަސްދަރު ހާމަކުރަން ކޯޓަކަށް އެންގިގެން ނުވާނެކަމުގެ ޔަގީންކަން ބިލުގައި ހިމެނުމަށް ނޫސްވެރިންގެ ޖަމިއްޔާއިން ބިލު ފާސްކުރުމުގެ ކުރިން އެދުނެވެ.
އެ ބިލު މަޖިލީހުން ފާސްކުރި ދުވަހު މަޖިލިސް ކުރިމަތީގައި ނޫސްވެރިން އިހުތިޖާޖު ވެސް ކުރި އެވެ. އަދި، އެ މާއްދާ އިސްލާހު ނުކޮށް ތަސްދީގު ނުކުރުމަށް ގޮވާލައި ޕެޓިޝަނެއް ވެސް ރައީސް އޮފީހަށާއި އެޓާނީ ޖެނެރަލްގެ އޮފީހަށް ހުށަހެޅި އެވެ. އެ ޕެޓިޝަންގައި ޖުމުލަ 158 މީހަކު ސޮއިކުރި އެވެ.
ހެކީގެ ބިލު ތަސްދީގު ނުކުރަން އެމްޖޭއޭގެ އިތުރަށް އެޑިޓާސް ގިލްޑާއި މޯލްޑިވްސް މީޑިއާ ކައުންސިލް (އެމްއެމްސީ) އިން އެދުނެވެ.
