އަހަރުގެ ފުރަތަމަ ދެ ކުއާޓަރު ނިމުނު އިރު ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)އަށް ސާފު ފައިދާގެ ގޮތުގައި 305 މިލިއަން ރުފިޔާ ލިބިފައިވާ ކަމަށް އެ ކުންފުނިން ބުނީ އިއްޔެ އެވެ.

އެސްޓީއޯގެ ދެވަނަ ކުއާޓާ ރިޕޯޓުން ދައްކާ ގޮތުގައި އެ ކުންފުންޏަށް ނިމުނު ކުއާޓަރުގައި 4.9 ބިލިއަން ރުފިޔާގެ އާމްދަނީއަކުން 155 މިލިއަން ރުފިޔާ ސާފު ފައިދާވި އެވެ.

މިއީ އަަހަރުގެ ފުރަތަމަ ކުއާޓަރުގައި ސާފު ފައިދާގެ ގޮތުގައި ލިބުނު 149.9 މިލިއަން ރުފިޔާއަށް ވުރެ ބޮޑު އަދަދެކެވެ. އަދި ނިމުނު އަހަރުގެ ދެވަނަ ކުއާޓަރުގައި ލިބުނު 110 މިލިއަން ރުފިޔާއަށް ވުރެ ވެސް ބޮޑު އަދަދެކެވެ.

އާމްދަނީ ފަސް ބިލިއަނާ ގާތްކުރި ނަމަވެސް އޭގެން ބޮޑު ބަޔަކީ ވިޔަފާރި ކުރުމަށް ހަރަދުވީ 4.4 ބިލިއަން ރުފިޔާ އެވެ. އެހެންވެ ނިމުނު ކުއާޓަރުގައި ޖުމްލަ ފައިދާގެ ގޮތުގައި ލިބުނީ 457.5 މިލިއަން ރުފިޔާ އެވެ.

އެސްޓީއޯގެ ދެވަނަ ކުއާޓަރުގެ މާލީ އުސްއަލިތައް

އާމްދަނީ: 4.9 ބިލިއަން ރުފިޔާ

ހަރަދު: 268 މިލިއަން ރުފިޔާ

ސާފު ފައިދާ: 155 މިލިއަން ރުފިޔާ

ހިއްސާއަކަށް ޖެހޭ އާމްދަނީ: 138ރ.

ކުންފުނީގެ ހިންގުމުގެ ހަރަދުތައް ކެނޑުމަށްފަހު ހިންގުމުގެ ފައިދާއަށް ލިބުނީ 216.5 މިލިއަން ރުފިޔާ އެވެ. މީގެން ކުންފުނީގެ ފައިނޭންސިން ހަރަދަށް ކެނޑުމަށް ފަހު ފައިދާވީ 187.8 މިލިއަން ރުފިޔާއަށް ވިޔަފާރި ފައިދާ ޓެކުހަށް 32.5 މިލިއަން ރުފިޔާ ދެއްކި އެވެ.

ޖުމްލަކޮށް ބަލާއިރު، ނިމުނު ކުއާޓަރުގެ ކުންފުނީގެ ވިޔަފާރި ހުރިހާ ގޮތަކުން ވެސް ރަނގަޅެވެ. އާމްދަނީ އާއި ފައިދާ ވެސް ކުރީގެ ކުއާޓަރުތަކަށް ވުރެ މައްޗެވެ.

އެ ކުއާޓާގައި އެސްޓީއޯ އާއި އެ ކުންފުނީގެ ސަބްސިޑަރީތަކުން ވަނީ ވިޔަފާރި ފުޅާކުރަން ބޮޑެތި އިންވެސްޓްމަންޓްތަކެއް ވެސް ކޮށްފަ އެވެ. އެގޮތުން މޯލްޑިވްސް ސްޓޭޓް ޝިޕިންގެ ތިން ވަނަ އާގުބޯޓު އެމްއެސްއެސް ގްރެފީން ގަތުމާއި، އެސްޓީއޯ ކްރެޑިޓް ސްކީމުގައި އަމިއްލަ ވިޔަފާރިތައް ބައިވެރިކުރުމުގެ އިތުރުން އިނގިރޭސިވިލާތުގެ ރަސްލް ހޮބްސް ބްރޭންޑުގެ އެޕްލަޔަންސްތައް ރާއްޖޭގެ ބާޒާރަށް ތައާރަފުކުރުން ފާހަގަކޮށްލެވެ އެވެ.

އޭގެ އިތުރުން އެ ކުންފުނިން ވަނީ މިދިޔަ ސަރުކާރުގައި ފެށި "ހިޔާ" މަޝްރޫއުގެ ދަށުން އަޅަން އެ ކުންފުންޏާ ހަވާލުކޮށްފައިވާ ފްލެޓުގެ މަސައްކަތް 18 މަސް ތެރޭގައި ނިންމަން ބަޔަކާ ހަވާލުކޮށްފަ އެވެ.

ބައެއް މުހިންމު ހަބަރުތައް

• މިއަހަރުގެ ފުރަތަމަ ދެ ކުއާޓާގައި އެމްޓީސީސީއަށް 130 މިލިއަން ރުފިޔާގެ ފައިދާއެއް ލިބިފައިވާ ކަމަށް އެ ކުންފުނީގެ ރިޕޯޓުތަކުން ދެއްކީ އިއްޔެ އެވެ.

• ރާއްޖެއިން ފެނުނީ މަންކީޕޮކްސްއަށް ޝައްކުވާ މީހެއް ނޫން ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ އިއްޔެ އެވެ.

• ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ވެރިކަމުގައި އެއްވެސް މީހަކަށް ނޭނގި ނަމަވެސް, އަނިޔާއެއް ދެވިފައިވާ ނަމަ މާފަށް އެދޭ ކަމަށް އެ މަނިކުފާނު ވިދާޅީ އިއްޔެ އެވެ.

ދުވަހުގެ ކޯޓޭޝަން

އިއްޔެ ކުރެއްވި ޓްވީޓެއްގައި ކުރީގެ ރައީސް ޑރ. މުހައްމަދު ވަހީދު ވިދާޅުވީ:

އަޅުގަނޑާއި އާއިލާއަށް އަނިޔާވެރި ބަސްތަކާ އަމަލުތަކުން ރައްދު ދެއްވި ހުރިހާ ފަރާތްތަކަށް މާފު ދެމެވެ. އަދި އަޅުގަނޑުގެ ރައީސް ކަމުގައި އެއްވެސް ފަރާތަކަށް ނުހައްގު އަނިޔާއެއް ދެވުނު ނަމަ މާފަށް އެދެމެވެ.

ދުވަހުގެ ފޮޓޯ

ކޮމަންވެލްތު ގޭމްސްގައި ރާއްޖޭގެ އަންހެން ޓޭބަލް ޓެނިސް ޓީމުގެ ފާތިމަތު ދީމާ އަލީ މޮރިޝަސްގެ ކުޅުންތެރިޔަކާ ދެކޮޅަށް ކުޅެނީ. ކުޅުނު ފުރަތަމަ ދެ މެޗުން ވެސް ރާއްޖޭގެ ޓީމު ވަނީ ބަލިވެފައި --- ފޮޓޯ: މޯލްޑިވްސް އޮލިމްޕިކް ކޮމިޓީ