ކޮޅުވެއްޓިއަކުން ޖެހި ރ. ހުޅުދުއްފާރު ބަނދަރުގައި ހުރި ޕެޓްރޯލްޝެޑު ފުނޑުފުނޑުވެއްޖެ އެވެ.
ހުޅުދުއްފާރު ކައުންސިލުގެ ރައީސް، މުހައްމަދު އާތިފް "އަދަދު"އަށް ވިދާޅުވީ ކޮޅުވެއްޓިއަކުން ޖެހި އެރަށު ބަނދަރުމަތީ ހުރި ޕެޓްރޯލްޝެޑު ފުނޑުފުނޑުވީ މިއަދު ހެނދުނު 11:00 ހާއިރު ކަމަށެވެ.
އާތިފް ވިދާޅުވީ ހާދިސާ ހިނގީ ކޮޅުވެއްޓީގެ ރޭމްޕުން ޖެހިގެން ކަަމަށާއި އޭގެ ސަބަބުން ޕެޓްރޯލްޝެޑު ބޭނުން ނުކުރެވޭ ވަރަށް ހަލާކުވެފައިވާ ކަމަށެވެ.
"ކޮޅުވެއްޓި ފަޅަށް ވަން އިރުވެސް އޭތީގެ ރޭމްޕް އިނީ ވައްޓާލާފައި، އުސޫލެއްގެ ގޮތުން ކޮޅުވެއްޓި އެއްޗެހި ފަޅަށް ވަނދެ ނިކުމެވާއިރު ރޭމްޕް ހުންނަން ޖެހެނީ ނަގާފައި،" އާތިފް ވިދާޅުވި އެވެ.
ހުޅުދުއްފާރު ބަނދަރަށް ވަން ކޮޅުވެއްޓި
އާތިފް އިތުރަށް ވިދާޅުވީ އެ ކޮޓުވެއްޓިއަކީ އެރަށު މަގު ހެދުމުގެ މަސައްކަތް ކުރުމަށްޓަކައި، ރުއްތަކެއް ނެގުމަށް ހައިމާކެއް ހިފައިގެން އައި ކޮޅުވެއްޓިއެއް ކަމަށެވެ.
މީގެ އިތުރުން މި ހާދިސާގައި އެއްވެސް މީހަކަށް އަނިޔާވެފައި ނުވާކަމަށް ވެސް އޭނާ ވިދާޅުވި އެވެ.
