ބަދަލު ކުޅުންތެރި އަރުވައިގެން އިންތިހާބު ކާމިޔާބު ނުކުރެވޭނެ ކަމަށް ވިދާޅުވެ އެމްޑީޕީގެ ރިޔާސީ ކެންޑިޑޭޓް ރައީސް އިބްރާހިމް މުހައްމަދު ސޯލިހު, އެ ޕާޓީގެ ކުރީގެ ރައީސް މުހައްމަދު ނަޝީދަށް ބަހުގެ ހަމަލާ ދެއްވައިފި އެވެ.
ރިޔާސީ އިންތިހާބުގެ ކެމްޕޭނުގައި ރ. ހުޅުދުއްފާރަށް ވަޑައިގެން ވާހަކަ ދައްކަވަމުން ރައީސް ސޯލިހު ވިދާޅުވީ އެމްޑީޕީ ދޫކޮށް ވަކިން ވާދަކުރައްވާ ކެންޑިޑޭޓުންނާ ދޭތެރޭ ރައްޔިތުންގެ ވިސްނުން ހުރި ގޮތް ސާފުކޮށް އެނގި ވަޑައިގަންނަވާ ކަމަށެވެ.
ދަ ޑިމޮކްރެޓްސްގެ ނަން ވިދާޅު ނުވިޔަސް، އެ ޕާޓީގެ ކެންޑިޑޭޓު އިލްޔާސް ލަބީބަށް ނިސްބަތް ކުރައްވައި ރައީސް ސޯލިހު ވިދާޅުވީ އިލްޔާސް އިންތިހާބުގައި ތިން ވަނަ އަށް ވެސް ނުދަނެ ކަމަށެވެ.
"އަޅުގަނޑުމެންގެ ތެރެއިން ނިކުމެގެން އެ ވާދަކުރައްވާ ބޭފުޅުންނާ ދޭތެރޭގައި ރާއްޖޭގެ އެކި ރަށްރަށުގައި މީހުންގެ ވިސްނުން ހުރި ގޮތް އަޅުގަނޑުމެންނަށް ވަރަށް ސާފުކޮށް އެބަ އެނގޭ. އެކެއް, ދޭއް, ތިނެއް, މިހިސާބަށް ވެސް އަޅުގަނޑުމެން އަދި ކިޔާނެ ކަމެއް ނެތް. މިއިން ހިސާބަކަށް ވެސް އަޅުގަނޑު ހިތެއް ނުބުނޭ އަދިއެއް އެ ބޭފުޅުންނަކަށް މިފަހަރަކު އާދެވޭނެ ކަމަށް،" ރައީސް ސޯލިހު ވިދާޅުވި އެވެ.
ދަ ޑިމޮކްރެޓްސް އަކީ މިއަހަރުގެ ރިޔާސީ އިންތިހާބަށް ވާދަކުރާނެ ކެންޑިޑޭޓަކު ހޮވަން އެމްޑީޕީން ބޭއްވި ޕްރައިމަރީން ބަލިވެވަޑައިގެންނެވުމުން, ރައީސް ނަޝީދު އިސްވެ ހުންނަވައިގެން އުފެއްދި ޕާޓީއެކެވެ.
ފުޓްބޯޅައިން މިސާލު ނަންގަވާ ރައީސް ސޯލިހު ވިދާޅުވީ ރިޔާސީ އިންތިހާބަކީ އޭ ޑިވިޝަނުގެ މެޗެއް ކަމަށެވެ. އެހެންކަމުން ބަދަލު ކުޅުންތެރިން އަރުވައިގެން އިންތިހާބު ކާމިޔާބު ނުކުރެވޭނެ ކަމަށް އެމަނިކުފާނު ވިދާޅުވި އެވެ.
"ރަނގަޅަށް ވާދަކޮށްލަން ބޭނުން ކަމަށް ވަންޏާ މިއުޅެނީ އޭ ޑިވިޝަނުގެ މެޗެއް. އިނގިރޭސިވިލާތުގެ ވެއްޖިއްޔާ ޕްރެމިއާ ލީގު މިކުޅެނީ. ބަދަލު ކުޅުންތެރިން އަރުވައިގެން ކާމިޔާބެއް ނުވާނެ. ފުލް ޓީމް ކުޅެން އަރަންވާނީ. އަޅުގަނޑުމެން މިތިބީ ފުލް ޓީމް އަރުވައިގެން،" މި ރިޔާސީ އިންތިހާބު އެއްބުރުން ބޮޑު ތަފާތަކުން ކާމިޔާބު ކުރައްވާނެކަން ފާހަގަކުރައްވާ ރައީސް ވިދާޅުވި އެވެ.
ރައީސް ވިދާޅުވީ އެމްޑީޕީ ތެރޭގައި އައި ކުޑަ ލޮޅުމުގައި, ހުޅުދުއްފާރުގެ އެމްޑީޕީ މެންބަރުންނަށް ވެސް އޭގެ އަސަރު ކޮށްފައި އެބަހުރި ކަމަށެވެ. އެމްޑީޕީ ދޫކޮށް ޑިމޮކްރެޓްސްއާ ގުޅުނު މެމްބަރުން އިތުރަށް ވިސްނެވުމަށް އެމަނިކުފާނު އެދިވަޑައިގަތެވެ. މި އިންތިހާބަކީ ކުރިއަށް އޮތް ފަސް އަހަރު ރައްޔިތުންނަށް ހިދުމަތްކޮށް, ރައްޔިތުން ބޭނުންވާ ތަރައްގީގެ މަޝްރޫއުތައް ކުރިއަށް ގެންދިއުމުގައި ސަރުކާރެއް އެކުލަވާލުމަށް ބާއްވާ އިންތިހާބެއް ކަމަށާއި, މިއީ ކުޅޭ ކުޅޭ ކަމެއް ނޫން ވިދާޅުވި އެވެ.
"އަޅުގަނޑުމެން މި އުޅެނީ ރާއްޖޭގެ ވެރިކަމަށް މީހަކު ގެންނަން. މީއަކީ ކުޅޭކުޅޭ ކަމެއް ނޫން. ކުރިއަށް އޮތް ފަސް އަހަރު ރައްޔިތުންނަށް ހިދުމަތް ކުރުމަށް, ރައްޔިތުންނަށް ބޭނުންވެފައިވާ ތަރައްގީގެ މަޝްރޫއުތައް ކުރިއަށް ގެންދިއުމުގައި ސަރުކާރެއް އެކުލަވާލަން. މީ އަކީ އެތެރޭގެ އިންތިހާބެއް ނޫން." ކޮންމެ ވޯޓެއްގެ އަސަރު އިންތިހާބަށް ކުރާނެކަން ފާހަގަކުރައްވާ ރައީސް ވިދާޅުވި އެވެ.
އިންތިހާބުގެ ނަތީޖާގެ މިސްރާބު އޮތް ގޮތް މިހާރުވެސް އެނގިވަޑައިގަންނަވާކަން ފާހަގަކުރައްވާ ރައީސް ވަނީ އެއްވެސް ރައްޔިތެއްގެ ވޯޓު ބާކީ ނުކުރުމަށް އިލްތިމާސް ކުރައްވާފަ އެވެ.
"އަޅުގަނޑުމެންނަށް ވަރަށް ސާފުކޮށް އެނގޭ މި އިންތިހާބުގެ ނަތީޖާގެ މިސްރާބު މިހާރު އޮތްގޮތް. އަދި އެއް ވަނައިގަ, ދެ ވަނައިގަ, ތިން ވަނައިގަ, ހަތަރު ވަނައަށް އަންނާނެ ފަރާތްތައް ވެސް އެބަ އެނގޭ." ރައީސް ވިދާޅުވި އެވެ.
އެމަނިކުފާނު ވިދާޅުވި ގޮތުގައި ވިސްނުންތެރިކަމާއެކު މިކަން ނުކޮށްފިނަމަ މީގެން ނިކުންނާނެ ނަތީޖާ ވަރަށް ދެރަ އެވެ. ރައީސް ވަނީ, ރައްޔިތަކަށް ގާނޫނީ ގޮތުން ލިބޭ އެންމެ ބޮޑު ޒިންމާ ހެޔޮގޮތުގައި އަދާ ކުރުމަށް ވެސް އިލްތިމާސް ކުރައްވާފަ އެވެ.
