ވޮލީބޯޅަ ސީޒަންގެ އެންމެ ފޯރިގަދަ މުބާރާތް ކަމަށްވާ އިންޓަ ރިސޯޓް ވޮލީބޯޅަ މުބާރާތް އަންނަ މަހު ބާއްވަން ތައްޔާރުވެއްޖެ އެވެ.
އެ ގޮތުން، 25 ވަނަ އިންޓަ ރިސޯޓް ވޮލީބޯޅަ މުބާރާތް ފެށުމަށް މިހާރު ހަމަޖެހިފައި އޮތީ އަންނަ މަހުގެ 18ގަ އެވެ. މި މުބާރާތަކީ ރިސޯޓުތަކުން އަބަދުވެސް ވަރަށް ދުރާލާ ތައްޔާރުވާ މުބާރާތެކެވެ.
ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން ބުނީ މި އަހަރުގެ އިންޓަ ރިސޯޓް މުބާރާތް ހާއްސަކޮށްލަން ބޭނުންވަނީ ހުރިހާ ރިސޯޓްތަކުގެ މުވައްޒަފުންނާއި ރާއްޖޭގެ ފަތުރުވެރިކަމުގެ ދާއިރާގައި މަސައްކަތްކުރާ ހުރިހާ ފަރާތްތަކަކަށް ކަމަށެވެ. ސަބަބަކީ މި އަހަރަކީ ރާއްޖޭގެ ފަތުރުވެރިކަމަށް 50 އަހަރު ފުރޭ އަހަރަށް ވެފައި އަބަދުވެސް ވޮލީބޯޅައިގެ އެންމެ މުހިންމު އެއް ބަޔަކީ ރިސޯޓްތައް ކަމަށް ވުމެވެ.
އެހެން އަހަރުތަކެކޭ އެއް ގޮތަށް މުބާރާތުގައި ފުރަތަމަ ކުރިއަށްދާނީ ޒޯން ބުރެވެ. އޭގެ ފަހުން ޗެމްޕިއަނުންގެ މެދުގައި ކުޅޭ ޗެމްޕިއަންސް ލީގު ކުރިއަށްދާނެ އެވެ.
އެންމެ ފަހުން 2019 ގައި ބޭއްވި އިންޓަ ރިސޯޓް ވޮލީބޯޅަ މުބާރާތުގެ ގަވާއިދަށް މި ފަހަރު ބަދަލެއް ގެނެސްފައި ނުވާއިރު، ކޮންމެ ރިސޯޓަކަށް ވެސް ގައުމީ ސްކޮޑުގައި ހިމެނޭ ދެ ކުޅުންތެރިއަކު ޓީމުގައި ހިމެނޭނެ އެވެ.
މި އަހަރުގެ މުބާރާތް އެންމެ ހާއްސަވަނީ ބަޑޮސް އައިލެންޑް ރިސޯޓަށެވެ. އެންމެ ފަހުން 2018 އަދި 2019 ގައި ބޭއްވި މުބާރާތުގެ ޗެމްޕިއަންކަން ހޯދި ޓީމު މިއަހަރު ނުކުންނާނީ ތަށި މިލްކުކުރާށެވެ. މިދިޔަ ދެ އަހަރު، 2020 އާއި 2021 ގައި ކޮވިޑްގެ ސަބަބުން އިންޓަ ރިސޯޓް މުބާރާތް ބާއްވާފަ އެއް ނުވެ އެވެ.
ރިސޯޓް ވޮލީބޯޅަ މުބާރާތަކީ ވޮލީގެ މައި އެއް ތަބެވެ. ގައުމީ ޓީމުތަކުން ކުޅުންތެރިންނަށް މުސާރަ ދިނުމުގެ އޮނިގަނޑު އެކުލަވާލުމުގެ ކުރިން ގައުމީ ޓީމުގެ ކުޅުންތެރިންނަށާއި އެހެން ހުނަރުވެރި ކުޅުންތެރިންނަށް ފައިސާ ލިބޭ މައިގަނޑު ގޮތަކީ ރިސޯޓް މުބާރާތެވެ.
އަނެއްކޮޅުން، މި މުބާރާތަށް ޓީމް ވަރުގަދަކުރުމަށް ޒުވާން ހުނަރުވެރި ކުޅުންތެރިން ރިސޯޓްތަކަށް ދާއިމީ ވަޒީފާތަކަށް ގެންދިޔުމަކީ ވެސް ރިސޯޓުތަކުން މީގެ ކުރިން ބޮޑު އިސްކަމެއް ދީގެން ކުރި ކަމެކެވެ. އެހެންކަމުން، ވޮލީބޯޅައިން ކުރިއަށްދާން ބޭނުންވާ ޒުވާނުންނަށް ވަޒީފާ ހޯދައިގެން ކުޅިވަރުގެ ތެރެއިން ކުރިއަށްދިއުމަށް ބަލާއިރު، ރިސޯޓް މުބާރާތަކީ ޓާގެޓެކެވެ.
