އެމެރިކާއިން ރާއްޖެއަށް ހާއްސަކޮށް ފުރަތަމަ ފަހަރަށް ސަފީރެއް ކަނޑައަޅައިފި އެވެ.
މީގެ ކުރިން އެެމެރިކާއިން ސަފީރުން ކަނޑައަޅަމުން އައީ އަވަށްޓެރި ސްރީލަންކާއަށާއި ރާއްޖެއާ ދެގައުމަށް އެއް ސަފީރު ހުންނަވާ ގޮތަށެވެ.
އެމެރިކާގެ ރިޔާސީ ގަނޑުވަރު ވައިޓްހައުސް އިން އިއްޔެ ނެރުނު ބަޔާނެއްގައި ބުނީ ރާއްޖެއަށް ކަނޑައަޅުއްވާ ހުންނަވާ "އެެމްބެސެޑާ އެެކްސްޓްރާ އޯޑިނަރީ އެންޑް ޕްލިނިޕޮޮޓެންޝަރީ"ގެ މަގާމަށް ހޫގޯ ޔޮން ހަމަޖައްސަވަން އެގައުމުގެ ރައީސް ޖޯބައިޑުން ނިންމަވާފައިވާ ކަމަށެވެ.
އެމެރިކާގައި ވެސް ގައުމުތަކަށް ކަނޑައަޅާ ސަފީރުންނަށް ޕާލަމެންޓްގެ ރުހުން ހޯދަން އޮންނާތީ ހޫގޯ ޔޮން ސަފީރުކަމާ ހަވާލުވެވަޑައިގަންނަވާނީ ޕާލަމެންޓްގެ ރުހުން ލިބުމުންނެވެ.
ރާއްޖެއަށް ހާއްސަ ސަފީރެއް އެމެރިކާއިން ކަނޑައަޅާފައި މި ވަނީ އެ ގައުމުގެ އެމްބަސީއެއް ރާއްޖޭގައި ހެދުމަށް ވެސް ނިންމާފައި އޮއްވަ އެވެ.
ވައިޓްހައުސް އިން ނެރުނު ބަޔާނުގައިވާ ގޮތުން ހޫގޯ ޔޮން އަކީ އެގައުމުގެ ފޮރިން ސާވިސްގައި އިސް މަގާމުތަކެއް ފުުރުއްވާފައިބާ ބޭފުޅެކެވެ. އޭނާ މިހާރު ހުންނެވީ އެމެރިކާގެ ސްޓޭޓް ޑިޕާޓްމަންޓްގެ އަންޑަ ސެކްރެޓަރީ އޮފް އިކޮނޮމިކް ގްރޯތު އެނަޖީ އެންޑް އެންވަޔަރްމަންޓްގެ އޮފީހުގެ އެޑްވައިޒަރަކަށެވެ. އޭގެ ކުރިން އޭނާ ހުންނެވީ ސްޓޭޓް ޑިޕާޓްމަންޓްގެ ބިއުރޯ އޮފް އިންޓަނޭޝަނަލް އޯގަނައިޒޭޝަން އެފެއާޒް ޕްރިންސިޕަލް ޑެޕިއުޓީ އެސިސްޓެންޓް ސެކްރެޓަރީގެ މަގާމުގަ އެވެ.
ޔޮން އަދާކުރެއްވި އެހެން މަގާމުތަކުގެ ތެރޭގައި ޑެޕިއުޓީ އެސިސްޓެންޓް ސެކްރެޓަރީ ފޯ ޓްރާންސްޕޮޓޭޝަން އެފެއާޒްކަމާއި ޑައިރެކްޓާ ފޯ އިންޓަނޭޝަނަލް އިކޮނޮމިކްސް އެންޑް ފައިނޭންސްގެ މަގާމު އަދި ޑިރެކްޓާ ފޯ އިންޑިއާ އެންޑް ސަބްކޮންޓިނެންޓްގެ މަގާމު ހިމެނެ އެވެ.
އެމެރިކާގެ ސްޓޭޓް ޑިޕާޓްމަންޓްގެ އިސް އެހެން އެތައް މަގާމެއް ވެސް ޔޮން ވަނީ ކުރިން އަދާކުރައްވައިފަ އެވެ.
