ޖަލްސާތަކަށް ހަތް މިލިއަން ރުފިޔާ، ދެބައިކުޅަ އެއްބައި ރައީސް އޮފީހުން

ރައީސް އޮފީހުން އިންތިޒާމުކޮށްގެން ކައުންސިލަރުންނަށް ބޭއްވި "ވިއަވަތި" ކޮންފަރެންސްގެ ތެރެއިން: މި އަހަރު ޖަލްސާތަކާއި ބައްދަލުވުންތަކަށް ރައީސް އޮފީހުން ހަތަރު މިލިއަނަށް ވުރެ ގިނަ ރުފިޔާ ހަރަދުކޮށްފި. -- ފޮޓޯ: ރައީސް އޮފީސް

ރައީސް އޮފީހުން އިންތިޒާމުކޮށްގެން ކައުންސިލަރުންނަށް ބޭއްވި "ވިއަވަތި" ކޮންފަރެންސްގެ ތެރެއިން: މި އަހަރު ޖަލްސާތަކާއި ބައްދަލުވުންތަކަށް ރައީސް އޮފީހުން ހަތަރު މިލިއަނަށް ވުރެ ގިނަ ރުފިޔާ ހަރަދުކޮށްފި. -- ފޮޓޯ: ރައީސް އޮފީސް

ސަރުކާރުގެ ވުޒާރާތަކާއި އިދާރާތަކުން ޖަލްސާތަކާއި ބައްދަލުވުންތައް ބާއްވަން އަހަރުގެ މިހާތަނަށް ހަތް މިލިއަން ރުފިޔާ ހަރަދުކޮށްފައިވާ ކަމަށް ފިނޭންސް މިނިސްޓްރީން ބުނެފި އެވެ.

މައުލޫމާތު ހޯދާ ލިބިގަތުމުގެ ހައްގުގެ ދަށުން "އަދަދު" ނޫހުން ހުށަހެޅި "ރައިޓް ޓު އިންފޯމޭޝަން" (އާރްޓީއައި)ގެ ޖަވާބުގައި ފިނޭންސް މިނިސްޓްރީން ހިއްސާކުރި މައުލޫމާތުން ދައްކާ ގޮތުގައި، އެންމެ ބޮޑު ހޭދައެއް ކުރީ ރައީސް އޮފީހުންނެވެ.

އެ އޮފީހުން ބޭއްވި ޖަލްސާތަކަށް ހަތަރު މިލިއަނަށް ވުރެ ގިނަ ރުފިޔާ ހަރަދުވެއްޖެ އެވެ. މިއީ އަހަރުގެ މިހާތަނަށް ހަރަދުވީ ފައިސާގެ 58 ޕަސެންޓެވެ.

Advertisement

ޖަލްސާތަކާއި ބައްދަލުވުންތަކަށް ކުރި ހަރަދު

  • 2017 - 22,717,616.96ރ.
  • 2018 - 8,270,038.50ރ.
  • 2019 - 17,699,956.21ރ.
  • 2020 - 2,680,842.75ރ.
  • 2021 - 7,140,215.08ރ.
  • 2022 (މިހާތަނަށް) - 7,000,597.74ރ.

ޖަލްސާތަކާއި ބައްދަލުވުންތައް މި އަހަރު މިހާ ބޮޑު އެއްޗެއް ހޭދަވީ ނަމަވެސް، ވޭތުވި ފަސް އަހަރުގެ ތެރޭގައި އެންމެ ބޮޑަށް ހަރަދުކުރި 2017 ވަނަ އަހަރާ އަޅާކިޔާނަމަ މިގޮތަށް ކުރާ ހޭދަ ވަނީ ބޮޑުތަނުން މަދުވެފަ އެވެ. އެ އަހަރު 22.7 މިލިއަން ރުފިޔާ ހަރަދުވެފައިވާއިރު، ހެލްތު މިނިސްޓްރީން އެކަނިވެސް 15 މިލިއަން ރުފިޔާ ހަރަދުކުރި އެވެ.

ފިނޭންސުން ހިއްސާކުރި މައުލޫމާތުން މިއީ ކޮންކަމަކަށް ކުރި ހަރަދެއްކަން ނޭނގޭތީ އެ ތަފްސީލުތައް ހޯދަން ހެލްތު މިނިސްޓްރީއަށް ވަނީ ހުށަހަޅާފަ އެވެ. އޭގެ އިތުރުން އެ އަހަރު ހޯމް އެފެއާޒް މިނިސްޓްރީ އާއި އިކޮނޮމިކް މިނިސްޓްރީން ވެސް ވަނީ މިލިއަނަކަށް ވުރެ ގިނަ ރުފިޔާ ޖަލްސާތަކާއި ބައްދަލުވުންތަކަށް ހަރަދުކޮށްފަ އެވެ.

ޖެހިގެން އައި 2018 ވަނަ އަހަރު މި ހޭދަ ވަނީ 8.2 މިލިއަން ރުފިޔާއަށް މަދުވެފަ އެވެ. އެ އަހަރު އެންމެ ބޮޑު ހޭދައެއް ކުރީ އެންވަޔަރަމަންޓް މިނިސްޓްރީންނެވެ. އެއީ 3.2 މިލިއަން ރުފިޔާ އެވެ. ދެން އެންމެ ބޮޑު ހޭދައެއް ކުރީ ޓޫރިޒަމް މިނިސްޓްރީންނެވެ. އެ މިނިސްޓްރީން 950،809ރ. ހަރަދުކުރި އެވެ.

އެފަހުން 2019 ގައި ޖަލްސާތަކާއި ބައްދަލުވުންތަކަށް ކުރި ހޭދަ ވަނީ 17.9 މިލިއަން އިތުރުވެފަ އެވެ. މި ހަރަދުގެ ތެރެއިން 8.3 މިލިއަން ހަރަދުކުރީ ފޮރިން މިނިސްޓްރީންނެވެ. ދެން އެންމެ ބޮޑު ހަރަދެއް ކުރީ ހޯމް އެފެއާޒް މިނިސްޓްރީންނެވެ. އެއީ 1.1 މިލިއަން ރުފިޔާ އެވެ.

ކޮވިޑު ބަލިމަޑުކަން ލައިގަތް އަހަރު މިގޮތަށް ކުރި ހޭދަތައް ވަރަށް ކުޑަ އެވެ. މުޅި އަހަރުގެ ތެރޭގައި ހަރަދުވީ އެންމެ 2.6 މިލިއަން ރުފިޔާ އެވެ. މިއީ އެ ނޫން އަހަރުތަކުގައި އެވަރެޖުކޮށް ހަރަދުވީ 12.5 މިލިއަން ރުފިޔާއަށް ވުރެ 4.6 ގުނަ ކުޑަ އަދަދެކެވެ.

މި އަހަރުގެ ތެރޭގައި ޖަލްސާތަކާއި ބައްދަލުވުންތަކަށް ކުރި ހޭދަ މިހާ މަދުވީ، ކޮވިޑު ފެތުރުން ކޮންޓްރޯލް ކުރަން އަޅާފައިވާ ފިޔަވަޅުތަކުގެ ތެރެއިން ގިނަ މީހުން އެއްވެ އުޅޭ ބައްދަލުވުންތަކާއި އިވެންޓުތައް ބޭއްވުން އަހަރުގެ ބޮޑު ބަޔެއްގައި މަނާކޮށްފައި އޮތުމުންނެވެ.

އެގޮތުން، 2021 ގައި މި ހުރަސްތައް ނެތުމާ އެކު، ހަރަދުވީ ވަރު ވަރު 7.1 މިލިއަން ރުފިޔާއަށް އަރާފަ އެވެ. އޭގެ ތެރެއިން އެންމެ ބޮޑު ހޭދައެއް ކުރީ ހޯމް މިނިސްޓްރީންނެވެ. އެއީ 1.9 މިލިއަން ރުފިޔާ އެވެ. ދެން އެންމެ ބޮޑު ހޭދައެއް ކުރި ޑިފެންސް މިނިސްޓްރީން ހަރަދުކުރީ 1.2 މިލިއަން ރުފިޔާ އެވެ.

ޖަލްސާތަކާއި ބައްދަލުވުންތަކުގެ އެންމެ ހަރަދު ބޮޑު ވުޒާރާ/އިދާރާތައް

  • ހެލްތު މިނިސްޓްރީ - 15,943,485.24ރ.
  • ފޮރިން މިނިސްޓްރީ - 8,336,960.91ރ.
  • ހޯމް މިނިސްޓްރީ - 6,008,242.48ރ.
  • ރައީސް އޮފީސް - 5,924,581.10ރ.
  • އެންވަޔަރަމަންޓް މިނިސްޓްރީ - 3,927,730.92ރ.

މައުލޫމާތު ހޯދި ފަސް އަހަރާއި މި އަހަރުގެ މިހާތަނަށް ކުރި ހޭދައަށް ބަލާއިރު، އެންމެ ބޮޑު ހޭދައެއް ކޮށްފައިވަނީ ހެލްތު މިނިސްޓްރީންނެވެ. އެ މިނިސްޓްރީން މި މުއްދަތުގެ ތެރޭގައި 15.9 މިލިއަން ރުފިޔާ ޖަލްސާ ބާއްވަން ހޭދަކޮށްފި އެވެ. އެކަމަކު އޭގެ 90 ޕަސެންޓަކީ 2017 ގައި ކުރި ހަރަދެވެ.

ދެން އެންމެ ބޮޑު ހޭދައެއް ކުރީ ފޮރިން މިނިސްޓްރީންނެވެ. އެ މިނިސްޓްރީން މި މުއްދަތުގެ ތެރޭގައި 8.3 މިލިއަން ރުފިޔާ ހަރަދުކޮށްފައިވާއިރު، އޭގެ 90 ޕަސެންޓަށް ވުރެ ހިއްސާކުރަނީ 2019 ގައި އެ މިނިސްޓްރީން ކުރި ހަރަދެވެ.

ޖަލްސާއަށް ބޮޑު ހޭދަކުރާ ލިސްޓުގެ ތިންވަނައިގައި އޮތް ހޯމް މިނިސްޓްރީން ހަ މިލިއަން ހަރަދުކޮށްފައިވާއިރު ހަތަރު ވަނައިގައި އޮތް ރައީސް އޮފީހުން 5.9 މިލިއަން ރުފިޔާ ހަރަދުކޮށްފި އެވެ. ފަސް ވަނައިގައި އޮތް އެންވަޔަރަމަންޓް މިނިސްޓްރީން ހަރަދުކުރީ 3.9 މިލިއަން ރުފިޔާ އެވެ.

ހުރިހާ ވުޒާރަތަކާއީ އިދާރާތަކުގެ ޖުމްލައަށް ބަލާއިރު، ފަސް އަހަރުގެ ތެރޭގައި ޖަލްސާތަކާއި ބައްދަލުވުންތައް ބާއްވަން ދައުލަތުގެ ބަޖެޓުން 65.5 މިލިއަން ރުފިޔާ ވަނި ހަރަދުކޮށްފަ އެވެ.

ކޮމެންޓް

ފަހުގެ ޚަބަރު

ދިރާގު ރޯޑް ރޭސް 5،500އަށްވުރެ ގިނަ ދުވުންތެރިންނާއެކު ބާއްވައިފި

ދިރާގު މޯލްޑިވްސް ރޯޑް ރޭހުގެ 17 ވަނަ އެޑިޝަން 5،500 އަށްވުރެ ގިނަ ދުވުންތެރިންނާއެކު ހުޅުމާލެ ސެންޓްރަލް ޕާކުގައި ވަނީ ބާއްވާފައެވެ. މި ދުވުމުގެ ލައިވް އަޕްޑޭޓްތަކާއި، ނަތީޖާ އަދި ދުވުންތެރިންގެ ރޭންކިންގ ބަލައިލުމުގެ ފުރުސަތު ދިރާގުން ވަނީ ޚާއްޞަ މޮބައިލް އެޕްލިކޭޝަނެއް މެދުވެރިކޮށް ފަހިކޮށްދީފައެވެ.

ޕީއެންސީގެ މެންބަރުންގެ އަދަދު ލައްކައަކަށްވުރެ ދަށަށް

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އެރިތާ 24 ގަޑިއިރު ނުވަނީސް، އަލުން އެ އަދަދު ލައްކައަކަށް ވުރެ ދަށަށް ގޮސްފިއެވެ. އިދިކޮޅު ފަރާތްތަކުން ތުހުމަތުކުރާ ގޮތުގައި މި އަދަދު ހަމަކުރުމަށްޓަކައި ވަޒީފާގެ ބިރުދެއްކުމާއި ރިޝްވަތުގެ ގޮތުގައި ފައިސާ ބޭނުންކޮށްފައިވެއެވެ. އީސީގެ ތަފާސްހިސާބުތަކުން ދައްކާގޮތުގައި އެ ޕާޓީގެ މެންބަރުންގެ އަދަދު މިހާރު ވަނީ 99,930 އަށް ތިރިވެފައެވެ.

ރަސްމާލޭގެ ޑީލުގައި ސޮއިނުކުރަން އެދި އަލައްބާރަށް ސިޓީއެއް

ރަސްމާލެ މަޝްރޫއުގެ މިހާރުގެ ޝަރުތުތަކާއި ގާނޫނުއަސާސީއާ ފުށުއެރުންތަކެއް ހުރި ކަމަށާއި، އެކަމުގައި އެކަށީގެންވާ ގޮތެއްގައި ރައްޔިތުންގެ ހިޔާލު ހޯދާފައި ނުވާތީ، ދެން އަންނަ ސަރުކާރަކުން ވެސް މި މަޝްރޫއުގެ އެއްބަސްވުން އަލުން މުރާޖައާކުރުމަށް ނުވަތަ އެއްކޮށް ބާތިލުކުރުމުގެ ފުރުސަތު އޮތް ކަމަށް އެ ސިޓީގައި ބުނެފައިވޭ.

"ރަސްމާލެ މައްސަލައިގައި މުއިއްޒު ވަނީ އަނގަވަތަށް ވެއްޓިފައި"

ރަސްމާލެ މަޝްރޫއަކީ ރާއްޖޭގެ ސިޔާދަތަށް އުނިކަންލިބޭ، ބޭރުގެ ފަރާތްތަކަށް ބިން ދިނުމަށް ހިންގާ ހީލަތްތެރި ރޭވުމެއް ކަމަށް ވިދާޅުވެ ކުރީގެ ރައީސް ޔާމީން ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ. މި މަޝްރޫއުގެ ސަބަބުން ރައީސް މުއިއްޒު ރައްޔިތުންގެ ކުރިމަތީގައި ބޭޒާރުވެފައިވާ ކަމަށާއި، މި ސަރުކާރަށް ދެވަނަ ދައުރެއް ރައްޔިތުން ނުދޭނެ ކަމަށް ޔާމީން ވިދާޅުވިއެވެ.

ރަސްމާލެ ދޫކޮށްލުމާ ދެކޮޅުވެރިކަމެއް ނެތްކަމުގެ އިޝާރާތެއް

ރަސްމާލެއިން ބައެއް ބޭރުގެ ކުންފުންޏަކަށް ދޫކޮށްލުމާ ދެކޮޅު ހަދަނީ މަދު ބަޔަކު ކަމަށާއި، ދިވެހިން އަބަދުވެސް އިސްކުރަނީ ގައުމީ ތަރައްގީކަން މުއިއްޒު ފާހަގަކުރެއްވި. މީގެކުރިންވެސް ރާއްޖެއަށް އައި ބޮޑެތި ބަދަލުތަކާ ބައެއް މީހުން ދެކޮޅު ހެދި ނަމަވެސް، ގިނަ ރައްޔިތުން ތާއީދުކުރީ ގައުމީ ކުރިއެރުމަށްކަން އެމަނިކުފާނު ބަޔާންކޮށްދެއްވި.

ހުލާސާކޮށް އިއްޔެ: ސިޔާސީ ޕާޓީތަކުގެ ދަފްތަރަށް އައި ބޮޑު ބަދަލު

ޕީއެންސީގެ މެންބަރުންގެ އަދަދު އެއްލައްކައަށް އެރުމާއެކު، ޖުމްހޫރީ ޕާޓީ އާއި އަދާލަތު ޕާޓީ ފަދަ ދުވަސްވީ ޕާޓީތަކުން ގިނަ އަދަދެއްގެ މެންބަރުންނާއި އިސް ބޭފުޅުން ވަނީ ވަކިވެފައެވެ. މީގެ އިތުރުން، ރަސްމީ ޖަލްސާތަކުގެ ޕްރޮޓޮކޯލަށް ބަދަލުތަކެއް ގެނެސްފައިވާއިރު، ރަސްމާލެ މަޝްރޫއާ ގުޅޭގޮތުން އިލްމުވެރިންނާއި ސިޔާސީ ފަރާތްތަކުގެ މެދުގައި ވަނީ ޚިޔާލުތަފާތުވުންތަކެއް އުފެދިފައެވެ.

ވަޒީފާގެ ބިރުދައްކައިގެން އެއްލައްކަ މެންބަރުން ހަމަކޮށްފި

ސަރުކާރު ހިންގާ ޕީއެންސީގެ މެންބަރުންގެ އަދަދު އެއްލައްކައަށް އަރާފައިވާއިރު، މިއީ ވަޒީފާގެ ބިރުދައްކައިގެންނާއި ރިޝްވަތު ދީގެން ހޯދި އަދަދެއް ކަމަށް ވަނީ ތުހުމަތުކުރެވިފައި. އިލެކްޝަންސް ކޮމިޝަނުގެ ދަފްތަރުން ދައްކާގޮތުގައި މިދިޔަ އަހަރާ އަޅާބަލާއިރު އެ ޕާޓީގެ މެންބަރުންގެ އަދަދު ވަނީ 26،000 އަށްވުރެ އިތުރުވެފައި.

Newsletter

Get the latest news delivered straight to your inbox