ލަންކާގެ އާ ރައީސް ރަނިލް ވިކްރަމަސިންހައާ އެކު ލަންކާ ރައްޔިތުން ތަހައްމަލު ކުރަމުންދާ އުނދަގޫތައް ހައްލުވުމުގެ އުއްމީދު ކުރައްވާ ކަމަށް ކުރީގެ ރައީސް އަދި ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ރައީސް ނަޝީދު މިހެން ވިދާޅުވީ ދިގު ސިޔާސީ ކެރިއަރުގައި ފުރަތަމަ ފަހަރަށް ރައީސްކަމަށް ހޮވިވަޑައިގަތް ރަނިލްއަށް ޓްވިޓާ މެދުވެރިކޮށް ފޮނުއްވި މަރުހަބާގެ މެސެޖެއްގަ އެވެ. އެ ޓްވީޓުގައި ނަޝީދު އިތުރަށް ވިދާޅުވީ، ރާއްޖެ އަބަދުވެސް އޮންނާނީ ލަންކާ ރައްޔިތުންނާ އެކުގައި ކަމަށެވެ.
ނަޝީދު މިހެން ވިދާޅުވެފައި މިވަނީ، މިފަހުން ސިއްރިއްޔާތުގައި ލަންކާ ދޫކޮށް ވަޑައިގެންނެވި އެ ގައުމުގެ ކުރީގެ ރައީސް ގޮތަބަޔަ ރާޖަޕަކްސަ މައްސަލައިގައި ކުރި ޓްވީޓަކާ ގުޅިގެން އެމަނިކުފާނަށް ލަންކާ ރައްޔިތުންގެ ނުރުހުން އަމާޒުވެފައިވާ ދަނޑިވަޅެއްގަ އެވެ.
ލަންކާ ރައްޔިތުންގެ ނުރުހުން އަމާޒުވީ ގޮތަބަޔަ ދަތުރުކުރެއްވި އަސްކަރީ ފްލައިޓަށް ކްލިއަރަންސް ދިނުމުގައި ދިވެހި ސަރުކާރުން އަމަލުކުރި ގޮތަށް ތައުރީފު ކުރުމުންނެވެ. ގޮތަބަޔަ ގައުމު ދޫކޮށް ވަޑައިގެންނެވީ ލަންކާގައި މުޒާހަރާކުރަމުން ދިޔަ މީހުން އެ ގައުމުގެ ރިޔާސީ ގަނޑުވަރަށް ވަދެގައްތާ ދުވަސްތަކެއް ފަހުންނެވެ.
އެ މީހުން މުޒާހަރާ ކުރަމުން ދިޔައީ ލަންކާ އިގުތިސޯދީ ކާރިސާއެއްގެ ތެރެއަށް ވެއްޓި ބަނގުރޫޓުވުމާ ގުޅިގެންނެވެ. މީގެ ސަބަބުން އެ ގައުމުގެ ކާނާ އާއި ބޭހާއި އަސާސީ ތަކެތީގެ އަގު އިންތިހާއަށް އުފުލި، ގައުމަށް ބޭނުންވާ ޕެޓްރޯލާއި ޑީސަލް ނުގަނެވޭ ހިސާބަށް ވަނީ ކަންކަން ގޮސްފަ އެވެ.
މުޒާހަރާކުރާ މީހުންގެ ތުހުމަތަކީ މިއީ ގޮތަބަޔަ އާއި އެމަނިކުފާނުގެ ބޭބެފުޅު މަހިންދަ ރާޖަޕަކްސް ސަރުކާރުގެ އިހުމާލާއި ކޮރަޕްޝަނުގެ ސަބަބުން ގައުމަށް ދިމާވި ހާލަތެއް ކަމަށެވެ. މިހާރު ވެސް އެ މީހުން ދަނީ ހުއްޓުމެއްނެތި މުޒާހަރާކުރަމުންނެވެ. އަދި ރަނިލްއަކީ ރައީސް ކަމުގައި ބަލައިގަންނަން ދެކޮޅުހަދާ ކަން ވެސް އިއުލާންކޮށްފަ އެވެ.
