ރ. މަޑުއްވަރީގައި މިދިޔަ އަހަރު، ޓީޗަރަކާއި އިތުރު ބަޔަކުވެގެން ސްކޫލު ކުއްޖަކު ރޭޕްކުރި ކަމަށް ބުނާ މައްސަލަ ޕްރޮސެކިއުޓާ ޖެނަރަލް އޮފީހުން ރިވިއު ކުރަންޖެހޭ ސަބަބެއް އޮތްތޯ ބަލަމުން އަންނަ ކަމަށް އެ އޮފީހުން ބުނީ އިއްޔެ އެވެ.

އެ މައްސަލައާ ގުޅިގެން ތުހުމަތުކުރެވޭ މީހުންނަށް ދައުވާކުރުމަށް ހެކި ނެތް ކަމަށް ބުނެ ޕީޖީ އޮފީހުން މައްސަލަ ފޮނުވާލުމުން އެ މައްސަލަ ފުލުހުން އޮތީ ފައިލްކޮށްފަ އެވެ. ނަމަވެސް އަނިޔާ ލިބުނު ކުއްޖާގެ އާއިލާގެ ފަރާތުން ވަނީ އެ މައްސަލަ އަލުން ރިވިއުކޮށްދިނުމަށް އެދިފަ އެވެ.

އެއީ އެ މައްސަލައަށް ބަޔަކު ނުފޫޒު ފޯރުވައި މައްސަލަ އޮއްބާލުމަށް އުޅޭ ކަހަލަ ވާހަކަތަކެއް އިވޭ ކޯލް ރިކޯޑިންތަކެއް ލީކުވެފައިވާތީ ކަމަށް އާއިލާއިން ބުނެ އެވެ.

އިއްޔެ ޖެންޑަ މިނިސްޓަރު އާއިޝަތު މުހައްމަދު ދީދީ ސޮއިކުރައްވާ އެ އާއިލާއަށް ފޮނުވި ސިޓީއެއްގައި ވިދާޅުވެފައި ވަނީ އެ މައްސަލައާ ގުޅިގެން ގާނޫނީ އިމުގެ ތެރެއިން އަޅަން ޖެހޭ ފިޔަވަޅުތައް އެޅުމަށް ކަމާ ގުޅުންހުރި ދައުލަތުގެ މުއަސަސާތަކަށް އެ މިނިސްޓްރީން އަންގާފައިވާ ކަމަށެވެ.

އެކަމާ ގުޅިގެން ސުވާލު ކުރުމުން ޕީޖީ އޮފީހުގެ އޮފިޝަލަކު އިއްޔެ "އަދަދު" އަށް ވިދާޅުވީ ކުއްޖާގެ އާއިލާއިން މައްސަލަ ރިވިއުކޮށްދޭން އެދިފައި ކަމަށާއި ނިންމުން ބަދަލު ކުރަންޖެހޭ ސަބަބެއް އޮތް ނަމަ އެކަން ކުރާނެ ކަމަށެވެ.

"ރިވިއުކޮށް ޑިޒިޝަން ބަދަލުކުރަން ޖެހޭ ސަބަބެއް އޮތިއްޔާ ރިވިއު ކުރާނަން،" އޭނާ ވިދާޅުވި އެވެ.

މިދިޔަ އަހަރު މާޗް މަހުގެ ތެރޭގައި ހިނގި އެ ހާދިސާގައި އެ އަންހެން ކުއްޖާ ރޭޕް ކުރުމުގައި ފުލުހަކާއި މަޑުއްވަރީ ސްކޫލުގެ ޓީޗަރަކާއި އިތުރު މީހަކު ބައިވެރިވެފައިވާ ކަމަށް ތުހުމަތު ކުރެ އެވެ.

މަޑުއްވަރީ ސްކޫލުގެ ގުރޭޑް އަށެއްގައި ކިޔަވަމުން އައި އެ ކުއްޖާ ރޭޕް ކޮށްފައިވަނީ ސުކޫލް ކައިރީގައި ހިންގާ ގެސްޓް ހައުސްއަކަށް ގެންގޮސްގެން ކަމަށާއި ކުއްޖާ އެތަނަށް ގެންދިޔައީ ތުހުމަތުކުރެވޭ ޓީޗަރު ކަމަށް ވެސް މަޑުއްވަރީ ބައެއް މީހުން ބުނެ އެވެ. އެ ދުވަހު ކަން ހިނގާފައިވާ ގޮތް ކުއްޖާ ވަނީ ތަހުގީގީ އިދާރާތަކަށް ކިޔާދީފަ އެވެ. އާއިލާ ވަނީ ޑޮކްޓަރުންގެ ރިޕޯޓުން ވެސް ކުއްޖާ ރޭޕްކޮށްފައިވާ ކަމަށް ބުނެފަ އެވެ.

އެ ކުއްޖާ މިހާރު ކިޔަވަމުން އަންނަނީ މާލެ ސްކޫލެއްގަ އެވެ. ޖެންޑާ މިނިސްޓްރީން ދަނީ ކުއްޖާގެ މައްސަަލަ މޮނިޓާކުރަމުންނެވެ. މިނިސްޓްރީން ބުނީ އެ ކުއްޖާ މިހާރު އުޅޭ މާހައުލަކީ ރައްކާތެރި މާހައުލެއް ކަމަށެވެ.

ބައެއް މުހިންމު ހަބަރުތައް

• ބައިނަލްއަގުވާމީ ޔޯގާ ދުވަސް ފާހަގަކުރަން ޖޫން 21، ގައި ގަލޮޅު ދަނޑުގައި ބޭއްވި ހަރަކާތަށް ހުރަސް އަޅައި ހަމަނުޖެހުން ހިންގި މައްސަލައިގައި އޭރު ހައްޔަރުކޮށްފައިވާ ޝައިހު އާދަމް ނިޝާންގެ ބަންދުގެ މުއްދަތު 16 ދުވަހަށް އިތުރުކުރީ އިއްޔެ އެވެ.

• ސަރުކާރާ އިދިކޮޅު ފަރާތްތަކުގެ ހަބަރުތައް ގެނެސްދޭ ކަމަށް މަޝްހޫރުވެފައިވާ "ދިޔަރެސް" ނޫހުގެ ނޫސްވެރިޔާ އަހްމަދު އަޒާން ލިޔެފައިވާ ލިޔުމަކާ ގުޅިގެން އޭނާގެ މައްޗަށް ޖިނާއީ ތުހުމަތުކޮށް ފުލުހަށް ހާޒިރުކުރާތީ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ކަންބޮޑުވުން ފާޅުކުރީ އިއްޔެ އެވެ.

• ސަރުކާރުގެ އަމާޒަކީ ރާއްޖެއާއި ރާއްޖޭން ބޭރުން ތައުލީމާއި ހުނަރު ލިބިގަތުމުގެ ގިނަ ފުރުސަތުތަކެއް ދިވެހި ދަރިވަރުންނަށް ފަސޭހަކަމާއެކު ހޯދައިދިނުން ކަމަށް ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހް ވިދާޅުވީ އިއްޔެ އެވެ.

ދުވަހުގެ ކޯޓޭޝަން

ރައީސުލްޖުމްހޫރިއްޔާގެ ހާއްސަ ސްކޮލާޝިޕްއާއި ހައި އެޗީވާސް ސްކޮލާޝިޕް ލިބޭ ދަރިވަރުންނަށް ސްކޮލާޝިޕް ހަވާލު ކުރުމަށް ބޭއްވި ރަސްމިއްޔާތުގައި ރައީސް ސޯލިހް ވިދާޅުވީ:

ސަރުކާރުގެ އަމާޒަކީ ރާއްޖެއާއި ރާއްޖެއިން ބޭރުން ތަޢުލީމާއި ހުނަރު ލިބިގަތުމުގެ ގިނަ ފުރުޞަތުތަކެއް ދިވެހި ދަރިވަރުންނަށް ފަސޭހަކަމާއެކު ހޯދައިދިނުން،

ދުވަހުގެ ފޮޓޯ

ރައީސް އިބްރާހިމް މުހައްމަދު ސޯލިހު އަަލަށް އެކުލަވާލި ގައުމީ ބޮޑީބޯޑިން ސީނިއާ ޓީމާ ބައްދަލުކުރެއްވުން. ޓީމާ ބައްދަލު ކުރައްވައި ރައީސް ދެއްކެވި ވާހަކަފުޅުގައި ވަނީ ރާއްޖޭގައި މޫދުކުޅިވަރުގެ ހަރަކާތްތައް ބޭއްވުމަށް ސަރުކާރުން ހާއްސަ އިސްކަމެއް ދެއްވާކަން ފާހަގަކުރައްވައިފަ. --- ފޮޓޯ: ރައީސް އޮފީސް