ސަރުކާރާ އިދިކޮޅު ފަރާތްތަކުގެ ހަބަރުތައް ގެނެސްދޭ ކަމަށް މަޝްހޫރުވެފައިވާ "ދިޔަރެސް" ނޫހުގެ ނޫސްވެރިޔާ އަހްމަދު އަޒާން ލިޔެފައިވާ ލިޔުމަކާ ގުޅިގެން އޭނާގެ މައްޗަށް ޖިނާއީ ތުހުމަތުކޮށް ފުލުހަށް ހާޒިރުކުރާތީ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިން ކަންބޮޑުވުން ފާޅުކޮށްފި އެވެ.
އަޒާން ފުލުހަށް ހާޒިރުވުމަށް އަންގާފައި ވަނީ އެ ނޫހުގައި ޝާއިއުކޮށްފައިވާ "ބޮޑު އިހުމާލެއް: އައިޖީއެމްއެޗްއަށް ދައްކާ ހުރިހާ ބަލި މީހުންގެ ރެކޯޑުތައް ލީކުވެއްޖެ" ލިޔުމާ ގުޅޭ ތުހުމަތުތަކާ ގުޅިގެންނެވެ.
އައިޖީއެމްއެޗްގެ ޕޭޝަންޓް ޕޯޓަލް ފަރުމާ ކުރުމުގައި ދިމާވެފައިވާ މައްސަލައެއްގެ ސަބަބުން ކޮންމެ މީހަކަށް ވެސް އައިޖީއެމްއެޗް އިން ސިއްހީ ފަރުވާ ހޯދަމުންދާ ކޮންމެ މީހެއްގެ މައުލޫމާތު ބެލެން އޮންނަ ކަމަށް އެ ނޫހުގައި ރިޕޯޓް ކޮށްފައި ވަނީ ނަން ހާމަކުރަން ނޭދޭ ދާއިރާގެ ތަޖުރިބާކާރަކާ ހަވާލާދީ އެވެ.
އެމްޖީއޭއިން މިރޭ ނެރެފައިވާ ބަޔާނެއްގައި ވަނީ ހަމައެކަނި ނޫހުގައި ލިޔާ ލިޔުމަކާ ގުޅިގެން ނޫސްވެރިންގެ މައްޗަށް އެފަދަ ގޮތަކަށް ޖިނާއީ ތުހުމަތައް ކުރެވުމަކީ އެ ޖަމިއްޔާއިން ކަންބޮޑުވާ ކަމެކެވެ. އޭގެ ސަބަބުން ނޫސްވެރިންނަށް ބިރު ދެއްކުމުގެ ސަގާފަތެއް އުފެދިދާނެ ކަމަށް އެމްޖޭއޭގެ ބަޔާނުގައިވެ އެވެ.
"މި ޖަމިއްޔާއިން ކަމާ ބެހޭ އިދާރާތަކަށް ގޮވާލަނީ ނޫސްވެރިންނަށް ފަހި މާހައުލެއް ކަށަވަރުކޮށް ދިނުމަށް މިހާރަށް ވުރެ ބޮޑަށް މަސައްކަތް ކުރުމަށާއި ނޫސްވެރިންނަށް ބިރު ދެއްކުމާއި ހުރަސް އެޅުމުގެ އެންމެހާ އަމަލުތައް ވަގުތުން ހުއްޓާލުމަށެވެ." އެމްޖޭއޭގެ ބަޔާނުގައިވެ އެވެ.
މީގެ އިތުރުން "ދިޔަރެސް" ގެ ނޫސްވެރިޔާ ހަތިމާ ޔޫސުފްއަށް ފުރައްސާރަކޮށް އިންޒާރު ދެމުންދާ މައްސަލައެއް ވެސް އެމްޖޭއޭގެ ސަމާލު ކަމަށް އައިސްފައިވާ ކަމަށާއި އެ މައްސަލަ ވެސް ތަހުގީގުކޮށް އޭގައި ހިމެނޭ މީހުނަށް ފިޔަވަޅު އެޅުމަށް އެ ޖަމިއްޔާއިން ގޮވާލާފައިވެ އެވެ.
އެމްޖޭއޭއިން ވަނީ ހަބަރާއި މައުލޫމާތު ފެތުރުމުގައި ނޫސްވެރިން ވެސް ޒިންމާދާރުވުމަށާއި ނޫސްވެރިން ހިފަހައްޓަން ޖެހޭ ސުލޫކާއި އަހުލާގީ މިންގަނޑު ހިފެހެއްޓުމަށް ވެސް އެންމެހާ ނޫސްވެރިންނަށް އިލްތިމާސްކޮށްފަ އެވެ.
