ބައިނަލްއަގުވާމީ ޔޯގާ ދުވަސް ފާހަގަކުރަން ޖޫން 21، ގައި ގަލޮޅު ދަނޑުގައި ބޭއްވި ހަރަކާތަށް ހުރަސް އަޅައި ހަމަނުޖެހުން ހިންގި މައްސަލައިގައި އޭރު ހައްޔަރުކޮށްފައިވާ ޝައިހު އާދަމް ނިޝާންގެ ބަންދުގެ މުއްދަތު 16 ދުވަހަށް އިތުރުކޮށްފި އެވެ.
ފުލުހުން ބުނީ ނިޝާން އިތުރު 16 ދުވަހަށް ބަންދުގައި ބައިތިއްބަން ކްރިމިނަލް ކޯޓުން މިއަދު އަމުރުދީފައިވާ ކަމަށެވެ.
ނިޝާންގެ ބަންދުގެ މުއްދަތު 16 ދުވަހަށް އިތުރުކުރި އިރު ޔޯގާ ހަމަނުޖެހުމާ ގުޅިގެން ހައްޔަރުކުރި ހަ މީހަކު އިއްޔެ ވަނީ ދޫކޮށްލައިފަ އެވެ. ފުލުހުންގެ މީޑިއާ އޮފިޝަލަކު އިއްޔެ ވިދާޅުވީ އެ ހަމަނުޖެހުމާ ގުޅިގެން ހައްޔަރުކޮށްފައި ތިބި މީހުންގެ ތެރެއިން ހަ މީހަކު މިއަދު ދޫކޮށްލީ ތަހުގީގުގައި ބަލަން ޖެހޭ ކަންތައްތައް ބެލުމަށް ފަހު ކަމަށެވެ. އެމީހުން ދޫކޮށްލި ނަމަވެސް އެ މައްސަަލައިގެ ތަހުގީގު އަދިވެސް ކުރިއަށްދާ ކަމަށް ވިދާޅުވެފައިވެ އެވެ.
ޖޫން 21 ވަނަ ދުވަހުގެ ހެނދުނު 6:30 ގައި ފެށި އެ ހަރަކާތާ ދެކޮޅަށް އަޑުއުފުލި މީހުންގެ ތެރެއިން ބަޔަކު ގަލޮޅު ދަނޑަށް ގަދަކަމުން ވަދެ ތަކެއްޗަށް ގެއްލުންދީ އެއްވެފައި ތިބި މީހުންނަށް ހަމަލާ ދިނެވެ. އެ ހަރަކާތް ފެށުމަށް ބޭއްވި ރަސްމިއްޔާތުގައި ޔޫތު މިނިސްޓަރު އަހްމަދު މަހްލޫފް ވާހަކަ ދައްކަވަން ހުއްޓައި ބަޔަކު ދަނޑަށް ވަދެގަނެ އަޑު ގަދަކުރަމުން އެ ހަރަކާތް ހުއްޓުވި އެވެ. އދ. އިން ރާއްޖެއަށް ކަނޑައަޅާފައި ހުންނަވާ ދާއިމީ މަންދޫބާއި ބައެއް ގައުމުތަކުގެ ޑިޕްލޮމޭޓުން ވެސް އޭރު ދަނޑުގައި ތިއްބެވި އެވެ.
ގިނަ އަދަދެއްގެ ޑިޕްލޮމެޓުން ތިއްބައި, ފުލުހުންގެ ސަފުތައް ފޫއަޅުވައި އެ ބޭފުޅުންނާ ހަމައަށް ހަމަލާ ދޭން ބަޔަކަށް ވަދެވުމުން ފުލުހުންނަށް ވެސް ފާޑުކިޔުންތަކެއް ވަނީ އަމާޒުވެފަ އެވެ. އަދި, އެ ހަރަކާތުގެ މައުލޫމާތު ކުރިން ލިބިފައިވާއިރު, އެކަމަށް ފުލުހުންނަށް ތައްޔާރުވެފައި ނެތް ކަމަށް ބުނެ ވެސް ގިނަ ބަޔަކު ދަނީ ފާޑުކިޔަމުންނެވެ.
އެ މައްސަލައިގައި ފުލުހުން އަމަލުކުރި ގޮތާ މެދު ޕޮލިސް ކޮމިޝަނަރު މުހައްމަދު ހަމީދު ވެސް ވަނީ ކަންބޮޑުވުން ފާޅުކުރައްވާފަ އެވެ. އަދި އެކަން ހިނގައިދިޔަ ގޮތް ބަލަން ކުރިޔަށް ގެންދާ ރިވިއުއަކަށް ފުރިހަމައަށް އެއްބާރުލުން ދެއްވާނެ ކަމަށް ވިދާޅުވި އެވެ.
ގަލޮޅު ދަނޑަށް ވަދެގަތް މީހުންގެ ހަމަލާ އަމާޒުވި މީހުންގެ ތެރޭގައި އިންޑިއާ ހައިކޮމިޝަނުގެ މުވައްޒަފަކު ވެސް ހިމެނެ އެވެ. ނަމަވެސް، އެއްވެސް ޑިޕްލޮމެޓަކަށް އަނިޔާ ވެފައެއް ނުވެ އެވެ.
އެ މީހުން ދަނޑަށް ވަދެގަތީ ދަނޑުގެ ބޭރުގައި ޖަހާފައި ހުރި ފެންސް ވެސް ހަލާކުކޮށްލުމަށް ފަހު އެވެ. އެ ތަނުގައި ޖަހާފައި ހުރި ބައެއް ބޯޑުތަކަށް ވެސް ގެއްލުން ދިނެވެ. ފުލުހުންނަށް އެ މީހުން ބޭރުކޮށްލެވުނީ 40 ވަރަކަށް މިނެޓު ފަހުންނެވެ. އަދި، އެއްވި މީހުން ފޮނުވާލަން ކަރުނަ ގޭސް ވެސް ޖެހި އެވެ.
އެ މައްސަލައިގައި ޖުމުލަ 21 މީހަކު ހައްޔަރުކުރި އެވެ.
titledesc
