ރާއްޖޭގައި ބާއްވާ 54 ވަނަ އޭޝިއަން ބޮޑީބިލްޑިން އެންޑް ފިޒީކް ޗެމްޕިއަންޝިޕް، ރަސްމީކޮށް މިރޭ ކ.މާފުށީގައި ބޭއްވި ކުލަގަދަ އިވެންޓެއްގައި ރައީސް އިބްރާހިމް މުހައްމަދު ސޯލިހު އިފްތިތާހުކޮށްދެއްވައިފި އެވެ.
ކ. މާފުށީ ބީޗްގައި މިރޭ ބޭއްވި ހަފްލާގައި އޭޝިއަން ބޮޑީ ބިލްޑިން ފެޑެރޭޝަން (އޭބީބީއެފް) އިން ރައީސް ސޯލިހު އާއި ކުޅިވަރާބެހޭ ވަޒީރު އަހުމަދު މަހުލޫފް ބޮޑީބިލްޑިން ކުރިއަރުވަން ކުރައްވާ މަސައްކަތުގެ އަގުވަޒަންކުރުމުގެ ގޮތުން ހާއްސަ އެވޯޑެއް އެރުވި އެވެ. މީގެ ކުރިން، ދުނިޔޭގެ ބޮޑީބިލްޑިން ފެޑެރޭޝަން (ޑަބްލިއުބީޕީއެފް) ގެ ހާއްސަ ރަން މެޑަލް ކަމަށްވާ ޑިސްޓިންގުއިޝް ސާވިސް އެވޯޑް، 2019 ވަނަ އަހަރުގެ ޑިސެމްބަރު މަހުގެ ތެރޭގައި ރައީސް ސޯލިހަށް އަރުވައިފަ އެވެ.
އޭޝިއާގެ އެންމެ ބޮޑު ބޮޑީބިލްޑިން އިވެންޓް ހުޅުވުމަށް ބޭއްވޭ އިވެންޓްގައި ވާހަކަ ދައްކަވަމުން މިނިސްޓަރު މަހުލޫފް ވިދާޅުވީ، އެއްވެސް ކުޅިވަރެއް ތަފާތު ކުރުމެއްނެތި ރާއްޖޭގެ ސަރުކާރުން ފުރުސަތު ފަހިކޮށްދޭ ކަމުގެ ހެއްކަކީ އެކިއެކި ކުޅިވަރުގެ ބައިނަލްއަގުވާމީ މުބާރާތްތައް ރާއްޖޭގައި ހޯސްޓްކުރުން ކަމަށެވެ.
ރައީސް އިބްރާހިމް މުހައްމަދު ސޯލިހު (ވ.2) އަށް އޭބީބީއެފްގެ ހާއްސަ އެވޯޑް އަރުވަނީ.--- ފޮޓޯ: މުހައްމަދު ޝާބިން/ އަދަދު
ބޮޑީބިލްޑިން ކުރިއެރުވުމުގެ ގޮތުން ގައުމީ ޓީމަށް ހާއްސަ ޖިމް ފެސިލިޓީގެ ކަންކަން ކުރެވެމުން އަންނަކަން ފާހަގަކުރައްވައި، މިނިސްޓަރު މަހުލޫފު ވަނީ އަށް ރަށެއްގައި ވެސް ރަނގަޅު ޖިމް ފެސިލިޓީތަކެއް ގާއިމްކުރާނެ ކަމަށް ވިދާޅުވެފަ އެވެ.
އަދި މި ފަަހަރުގެ ބޮޑީބިލްޑިން މުބާރާތް ރާއްޖޭގައި ހޯސްޓްކުރާއިރު، މީގެ ކުރިން ގައުމީ ބޮޑީބިލްޑިން އެތުލީޓުން ހޯދި ކާމިޔާބީތަކަށް ވުރެ ހާއްސަ ވަނަތަކެއް މި ފަހަރުގެ ހޯދައިދިނުމަށް އެދޭ ކަމަށް މިނިސްޓަރު ވިދާޅުވި އެވެ.
ރާއްޖޭގެ 20 ވަރަކަށް އެތުލީޓުން ބައިވެރިވާ، އޭޝިއާގެ އެންމެ ބޮޑު ބޮޑީބިލްޑިން މުބާރާތަށް ރާއްޖޭން ތައްޔާރުވީ މެލޭޝިއާގެ ކުރީގެ ކުޅަދާނަ ބޮޑީބިލްޑަރު، މިހާރު ކޯޗިންގައި ކާމިޔާބު ހޯދަމުން އަންނަ ވޮން ހޮންގްގެ ބެލުމުގެ ދަށުންނެވެ.
މި ފަހަރުގެ މުބާރާތް ބޭއްވުމަށް 2019 ވަނަ އަހަރު ބިޑް ކުރިއިރު، އިވެންޓް ބާއްވަން އެންމެ ފުރަތަމަ ހޯސްޓަކަށް ކަނޑައެޅީ މާފުށީގަ އެވެ. އެކަމަކު، ފަހުން އަންހެން ކެޓަގަރީގެ އިވެންޓްތައް ވަނީ ކްރޮސްރޯޑްސްގައި ބާއްވަން ނިންމައިފަ އެވެ.
ބޮޑީބިލްޑިން މުބާރާތް ފެށުމުގެ އިވެންޓްގައި މިނިސްޓަރު މަހުލޫފް ވާހަކަ ދައްކަވަނީ.--- ފޮޓޯ: މުހައްމަދު ޝާބިން/ އަދަދު
އޭޝިއާގެ ބޮޑީބިލްޑިން މުބާރާތް އެންމެ ފަހުން ހޯސްޓްކުރީ 2019 ވަނަ އަހަރު އިންޑޮނީޝިއާގެ ބަތާމްގަ އެވެ. އެކަމަކު، ކޮވިޑް-19 އާއި އެކިއެކި ސަަބަބުތަކާ ހުރެ މި އަހަރަށް ފަސްކުރަން ޖެހުނީ އެވެ. މިއީ ރާއްޖޭގައި ބޭއްވޭ ބައިނަލްއަގުވާމީ ދެ ވަނަ ބޮޑީބިލްޑިން މުބާރާތެވެ. އެންމެ ފުރަތަމަ މުބާރާތް ބޭއްވީ 2001 ވަނަ އަހަރު ދެކުނު އޭޝިއާގެ ގައުމުތަކުގެ މެދުގައި ބަނޑޮހުގަ އެވެ.
ބޮޑީބިލްޑިން އެސޯސިއޭޝަންގެ ރައީސް އިބްރާހިމް ހަމީދު (އިއްބެ) ވިދާޅުވީ މިއީ ބޮޑީބިލްޑިން އިން ރާއްޖެ ހޯދަމުން އަންނަ ރަން ވަނަތައް އަމިއްލަ ގައުމުގައި ދައްކާލަން ލިބޭ ބޮޑު ފުރުސަތެއް ކަމަށެވެ.
ބޮޑީބިލްޑިން އަކީ ރާއްޖެ އަށް ގިނަ ރަން މެޑަލްތަކެއް ގެނެސްދީފައިވާ ކުޅިވަރެކެވެ. އޭޝިއާގެ މުބާރާތުން ވެސް ރާއްޖެ ވަނީ ރަން މެޑަލް ހޯދައިފަ އެވެ. އަމިއްލަ ގައުމުގައި އޭޝިއާގެ ބޮޑު މުބާރާތް ބޭއްވުމުން ދިވެހި ބޮޑީބިލްޑަރުންނަށް ކާމިޔާބު ހޯދުމަށް ފަސޭހަވެގެންދާނެ އެވެ. މީގެ ކުރިން ބީބީއޭއެމުން މި ފަހަރުގެ އޭޝިއާ މުބާރާތަށް ކަނޑައެޅި ރާއްޖޭގެ މެޑަލް ޓާގެޓަކީ 10 އެކެވެ. އެކަން ހާސިލްވެއްޖެނަމަ މިއީ ބޮޑީބިލްޑިން ތާރީހުގައި ރާއްޖެ އަށް އެންމެ ކާމިޔާބު މުބާރާތަށް ވާނެ އެވެ.
