ބ. އަތޮޅުގެ ފަޅުރަށެއްގައި ދެ ބިދޭސީއެއްގެ މެދުގައި ހިނގި ހަމަނުޖެހުމެއްގައި އެކަކަށް ތޫނު އެއްޗަކުން ހަމަލާދީފި އެވެ.
މިކަމާ ގުޅިގެން ފުލުހުން ބުނީ، ބ. އަތޮޅުގެ ފަޅު ރަށެއްގައި ދެ ބިދޭސީންގެ މެދުގައި މާރާމާރީއެއް ހިންގައި އެތަނުން އެކަކަށް ތޫނު އެއްޗަކުން ހަމަލާދީފައިވާ ކަމުގެ މައުލޫމާތު ފުލުހުންނަށް ލިބުނީ ރޭ 9:57 ހާއިރު ކަމަށެވެ.
މާރާމާރީ ހިނގާފައި ވަނީ އުމުރުން 45 އަހަރުގެ މީހަކާއި އުމުރުން 43 އަހަރުގެ މީހަކާ ދެމެދު އެވެ. ތޫނު އެއްޗަކުން ހަމަލާ ދިނުމުގެ ސަބަބުން ޒަހަމްވެފައި ވަނީ އުމުރުން 45 އަހަރުގެ މީހާއަށެވެ. އޭނާއަށް މިހާރު ދަނީ އޭދަފުށީގައި ހުންނަ ބ. އަތޮޅު ހޮސްޕިޓަލުގައި ފަރުވާ ދެމުންނެވެ.
ހޮސްޕިޓަލާ ހަވާލާދީ ފުލުހުން ބުނީ، ފަރުވާ ދެމުންދާ ބިދޭސީ މީހާގެ ހާލު ކްރިޓިކަލް ކަމަށެވެ.
މާރާމާރިއާ ގުޅިގެން ފުލުހުން ވަނީ 43 އަހަރުގެ މީހާ ހައްޔަރުކޮށް، މައްސަލަ ތަހުގީގު ކުރަން ފަށާފަ އެވެ.
