ޕީޕީއެމް ޕީއެންސީ އިން އެހެން ޕާޓީއެއްގެ ނުވަތަ އެހެން ޕާޓީއެއްގެ ލީޑަރެއްގެ ފަހަތަށް އަރާނެ އެއްވެސް ފޯމިއުލާއެއް ނެތް ކަމަށް ބުނީ އިއްޔެ އެވެ.

އެ ޕާޓީން މިހެން ބުނީ ޕާޓީގެ ލީޑަރު, ކުރީގެ ރައީސް އަބްދުالله ޔާމީން ޖަލަށްލުމަށް ހުކުމްކޮށްފިނަމަ, ޕީޕީއެމްގެ ތާއިދު ޖުމްހޫރީ ޕާޓީގެ ލީޑަރު ގާސިމް އިބްރާހިމަށް އޮންނާނެ ކަމަށް ބުނެ ނޫހެއްގައި ލިޔެފައިވާ ރިޕޯޓަކަށް ރައްދުދީ އެވެ.

އެ ޕާޓިން އިއްޔެ ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ރައީސް އަބްދުއްރަހީމް އަބްދުﷲ (އަދުރޭ) ވިދާޅުވީ ރައީސް ޔާމީން ޖަލަށްލުމަށް ވަރަށް ބޮޑަށް ކޯޓުތަކަށް ނުފޫޒު ފޯރުވަމުން ގެންދޭ ކަމަށެވެ. އެކަމުގައި ގާސިމްގެ އަތެއްވާ ކަމަށް އޭނާ ތުހުމަތު ކުރެއްވި އެވެ.

"ކޯޓު ތަކަށް ކަޅު ފައިސާ އަޅާ ނުފޫޒު ފޯރުވާފައިވާކަން އެނގޭ, ރައީސް ޔާމީން ޖަލަށް ލުމަށް ހައްގު ނޫން ގޮތުގައި މިހާރު ވެސް ގާސިމް އާއި އަދި ވާދަވެރި ފަރާތްތަކުން އެގެންދަނީ މަސައްކަތް ކުރަމުން، އެކަން ކާމިޔާބެއް ނުވާނެ," އަބްދުއްރަހީމް ވިދާޅުވެފައިވެ އެވެ.

އަބްދުއްރަހީމް ވިދާޅުވި ގޮތުގައި ޕީޕީއެމްގެ 2023 ގެ ރިޔާސީ ކެންޑިޑޭޓަކީ ރައީސް ޔާމީން ކަމަށާއި ރައީސް ޔާމީންގެ ނަންފުޅު ވޯޓު ކަރުދާހުގައި އޮންނާނެ އެވެ.

"ރައީސް ޔާމީން ޖަލަށް ލައިގެން ޖުމްހޫރީ ޕާޓީ އަދި އެހެން ޕާޓިއަކުން ވެސް އަދި ލީޑަރަކު ވެސް އެމީހުންގެ ފަހަތަށް ޕީޕީއެމް ޕީއެންސީ އިން އަރާފާނެ ކަމަށް ނުވަތަ އެމީހުންގެ ރިޔާސީ ކެންޑިޑޭޓަށް ތާއީދުކޮށް މި ކޯލިޝަން ފަހަތަށް ޖެހޭނެކަމަށް ހީކުރުމަކީ ދެކޭ ހުވަފެނެއް، އެކަމެއް މިކޯލިޝަނުން ނުކުރާނެ," އޭނާ ވިދާޅުވި އެވެ.

"ރައީސް ޔާމީނަށް ވާދަ ނުކުރެވޭނެ ފޯމިއުލާއެއް ވާދަވެރި ފަރާތްތަކަށް ނުނެރެވޭނެ, އަދި ރައީސް ޔާމީނަށް ވާދަ ނުކުރެވޭނެ ހާލަތަކަށް އައި ނަމަވެސް، ޕީޕީއެމް އިން ކަންކުރާނެ ގޮތް ޕީޕީއެމްގެ އަސާސީ ގަވާއިދުގައި އޮންނާނެ,"

އަބްދުއްރަހީމް ފާހަގަ ކުރެއްވި ގޮތުގައި އެންމެ ފަހުން އޮތް ރައްޔިތުންގެ މަޖިލީހުގެ އިންތިހާބުގައި ގާސިމް ޕީޕީއެމްއަށް ލަނޑުދިން ގޮތް އެ ޕާޓިން ހަނދާނެއް ނުނެތޭނެ އެވެ.

އެ އިންތިހާބުގައި އެމްޑީޕީން ހުރިހާ ދާއިރާއަކަށް ކުރިމަތިލާން ނިންމުމުން ޖުމްހޫރީ ޕާޓީން ނުރަސްމީ ކޯލިޝަނެއް ޕީޕީއެމްއާއެކު ހަދައި, ދާއިރާތަކަށް ބަހާލައިގެން ވާދަކުރި އެވެ. އޭގެ ސަބަބުން އެމްޑީޕީއަށް ފައިދާވެ, ގިނަ ދާއިރާތަކެއް ޕީޕީއެމްއަށް ގެއްލުނުކަން އެ ޕާޓީން ގަބޫލު ކުރެ އެވެ.

"ޔާމީން ޖަލަށް ލުމުން އެންމެ އުފާވާނީ ޕީޕީއެމްގެ އިސް ބޭފުޅުން"

ރައީސް އަބްދުالله ޔާމީން ޖަލަށްލުމަށް ހުކުމްކޮށްފިނަމަ, އެކަމާ އެންމެ އުފާވާނީ ޕީޕީއެމްގެ އިސްބޭފުޅުން ކަމަށް ޖޭޕީން ވަނީ އިއްޔެ ބުނެފަ އެވެ.

"ރައީސް ޔާމީން ޖަލަށް ލުމަށް ހުކުމެއް އައުމަކީ އެންމެ ބޮޑަށް ޕީޕީއެމްގެ އިސްވެރިން، އުފާކުރައްވާނެ ކަމެއް، ރިޔާސީ ރޭހުގައި ވާދަކުރެއްވުމަށް ޓަކައި ނުވަތަ އޭގެ އުންމީދުގައި ތިބީ ގާތްގަނޑަކަށް ހަތެއް ނުވަތަ އަށް ބޭފުޅުން [ޕީޕީއެމްގައި] އެބަތިއްބެވި،" ޖޭޕީން އިއްޔެ ބޭއްވި ނޫސްވެރިންގެ ބައްދަލުވުމުގައި ޖޭޕީގެ ލީޑަރުގެ އެޑްވައިޒާ އިލްހާމް އަހުމަދު ވިދާޅުވި އެވެ.

އިލްހާމް ވިދާޅުވި ގޮތުގައި އެ ބޭފުޅުން އަންނަނީ ޔާމީން ޖަލަށް ލުމަށް ޓަކައި އެ ބޭފުޅުންނަށް "ކުރެވުނުހާ މަސައްކަތެއް" ކުރަމުންނެވެ. އަދި މި ކަމުގެ ތަފްސީލް ރައީސް ޔާމީނަށް އެނގިވަޑައިގަންނަވާނެ ކަމަށް ވިދާޅުވި އެވެ.

"މިއަދު އެ ވާހަކަ ދެއްކެވި ބޭފުޅުންނަކީ ރައީސް ޔާމީނަށް ޖަލުގެ ހުކުމެއް ހޯއްދެއްވުމަށް ރެއާއި ދުވާލު މަސައްކަތް ކުރާ މީހުން، އަޅުގަނޑުމެންނަކަށް ނުލިބޭ ރިޔާސީ ކެންޑިޑޭޓު ކަމެއް ރައީސް ޔާމީން ޖަލަށް ލުމަކުން، ރައީސް ޔާމީން ޖަލަށް ލުމަކުން އަޅުގަނޑުމެންގެ ޕާޓީއަކަށް ވެރިކަމެއް ނުލިބޭ،" އިލްހާމް ވިދާޅުވި އެވެ.

"އެ މީހުންގެ ތެރެއިން ސަރުކާރުގައި ތިބި ބައެއް ބޭފުޅުންނާ ބައްދަލުކުރެއްވިޔަސް ބައްދަލުކުރައްވަނީ ވެސް، ޖަލަށް ގެންދަވަނީ ކޮން އިރަކުތޯ [ބައްލަވަނީ ވެސް]،"

އަދި، ޔާމީނަށް ނިކަމެތިކޮށް، ދެރަ ގޮތެއް ވުމަށް ޖޭޕީއާއި އެ ޕާޓީގެ ލީޑަރު ގާސިމް އިބްރާހިމް ނޭދޭ ކަމަށް ވެސް އިލްހާމް ވިދާޅުވި އެވެ.

އިލްހާމް ވިދާޅުވީ ޖޭޕީގެ އަސާސީ ގަވައިދުގައި އޮންނަ ގޮތުން ކައުންސިލުން އިތުރު ގޮތަކަށް ނުނިންމާހާ ހިނދަކު އެ ޕާޓީން ރިޔާސީ ކެންޑިޑޭޓެއް ނިކުންނާނެ ކަމަށާއި އެހެންނަމަވެސް އެއީ ކޮން ކެންޑިޑޭޓެއް ކަމެއް އަދި ކަނޑައަޅާފައި ނުވާ ކަމަށެވެ.

ބައެއް މުހިންމު ހަބަރުތައް

• ގަލޮޅު ރަސްމީ ދަނޑުގައި ބައިނަލްއަގްވާމީ ޔޯގާ ދުވަސް ފާހަގަކުރުން ކުރިއަށް ދަނިކޮށް އެތަނަށް ވަދެގަނެ, ހަމަނުޖެހުން ހިންގި މައްސަލާގައި ހައްޔަރުކުރި ހޯރަފުށި ދާއިރާގެ ކުރީގެ މެންބަރު މުހައްމަދު އިސްމާއީލްގެ ބަންދަށް އިތުރު އެއް މަސް ދުވަސް ކްރިމިނަލް ކޯޓުން ޖެހީ އިއްޔެ އެވެ.

• ދުއްވާ އުޅަނދަކީ ތިމާ ދާން ބޭނުންވާ މަންޒިލަށް ދެވޭނެފަދަ ހަލަތެއްގައި ހުރި އުޅަނދެއްތޯ ޔަގީން ކުރުމަށް ފުލުހުން އިލްތިމާސްކުރީ އިއްޔެ އެވެ.

• ހދ. ކުޅުދުއްފުށީގައި 400 ހައުސިން ޔުނިޓް އަޅަން ސަރުކާރުން ބަޔަކާ ހަވާލުކުރީ އިއްޔެ އެވެ.

ދުވަހުގެ ކޯޓޭޝަން

ވެރިކަން ކުރާ އެމްޑީޕީއާ ގުޅިވަޑައިގެންނެވި ސަބަބު ހާމަކުރައްވަމުން ވިލިނގިލީ ދާއިރާގެ މެމްބަރު ސައުދު ހުސައިން ވިދާޅުވީ:

ދެ އިންތިހާބަށްފަހު ޕާޓީގެ ގުނަވަންތަކުން ހިޔާލުތަފާތުވުން ނައްތާލާ، އެންމެން އެކީގައި ކުރިއަށް ގެންދިއުމުގެ ވިސްނުން އިސްކޮށްފައި އޮތީ

ދުވަހުގެ ފޮޓޯ

ގައުމީ ވޮލީބޯޅަ މުބާރާތުގެ ފައިނަލުގައި މިރޭ 3-1 ސެޓުން، އެންމެ ފަހުގެ ޗެމްޕިއަން، ދިވެހި ސިފައިންގެ ކްލަބް ބަލިކޮށް، ސްޕޯޓްސް ކްލަބް ސިޓީން ސީޒަނުގެ ތިން މުބާރާތް ކާމިޔާބު ކުރުން. ސިޓީން އެސޯސިއޭޝަން ކަޕް ކާމިޔާބުކުރީ ވެމްކޯ ފައިނަލުގައި ބަލިކޮށްފައި. ލީގާއި ގައުމީ މުބާރާތުގައި ސިޓީ ފަހަތުން ދެ ވަނައިގައި ނިންމީ ސިފައިން. --- އިމޭޖަސް.އެމްވީ