ބޮޑު ޗުއްޓީ އަހަރުގެ މެދަށް، ޖޫން/ޖުލައި އަށް ބަދަލުކުރީ ތައުލީމީ ދާއިރާ އާއި އެ ދާއިރާގެ ވަރަށް ގިނަ ބައެއްގެ ހިޔާލު ހޯދުމަށްފަހު ހެދި ސާވޭ އަކަށް ފަހު ކަމަށް އެޑިޔުކޭޝަން މިނިސްޓްރީން ބުނެފި އެވެ.
ކޮވިޑާ ގުޅިގެން ދިރާސީ އަހަރުގެ ކިޔެވުމަށް ގެނައި ބަދަލު ދާއިމީކޮށް، ދިރާސީއާ އަހަރުގެ ކިޔެވުން އޮގަސްޓް މަހުގައި ފަށާ ގޮތަށް ރަސްމީކޮށް ބަދަލުކޮށްފައި ވަނީ މިދިޔަ އަހަރު އެވެ.
އެ ނިންމުމާ ދެކޮޅަށް ބައެއް މީހުން ވާހަކަ ދައްކަމުންދާއިރު، އެޑިޔުކޭޝަން މިނިސްޓްރީގެ ޑެޕިއުޓީ މިނިސްޓަރު މުހައްމަދު އިހުސާން "އަދަދު"އަށް ވިދާޅުވީ އެ ނިންމުން ނިންމާފައި ވަނީ ވަރަށް ބޮޑު ސާވޭއެއް ކުރުމަށްފަހު ކަމަށެވެ.
"ޗުއްޓީ ބަދަލު ކުރީ ވަރަށް ފުޅާ ދާއިރާއެއްގަ މަޝްވަރާ ކުރުމަށްފަހު. ތައުލީމީ ދާއިރާގައި މަސައްކަތް ކުރާ ފަރާތްތަކާއި މި ދާއިރާއާ ގުޅުންހުރި މީހުންނާ މަޝްވަރާ ކުރުމަށްފަހު. ގާތްގަނޑަކަށް 17،000 އެއްހާ މީހުންގެ ހިޔާލު ހޯދާ، ސާވޭއެއް ކޮށްފައި މި ނިންމުން ނިންމީ،" ޗުއްޓީއަށް ބަދަލު ގެނައި ސަބަބު ހާމަކުރައްވަމުން އިހުސާން ވިދާޅުވި އެވެ.
އޭނާ ވިދާޅުވީ އެ ސާވޭގެ ތެރެއިން ގިނަ ފަރާތްތަކުން މިގޮތަށް މި ބަދަލު ގެނައުމަށް ތާއިދު ކުރި ކަމަށެވެ. އަދި މިކަމާ ގުޅިގެން ތައްޔާރުކުރެވުނު ކަރުދާހާ ގުޅިގެން ތަޖުރިބާކާރުންނާ ވާހަކަ ދައްކާ މަޝްވަރާ ކުރެވުނު ކަމަށް އިހްސާން ވިދާޅުވި އެވެ.
މިހާރު ބަދަލުކޮށްފައިވާ ޗުއްޓީ ދުވަސްވަރަކީ ޖޫން/ޖުލައިގެ ގަދަ ވިއްސާރައާ ދިމާވާ ދުވަސްވަރު ކަމަށް ބެލެނިވެރިން ބުނި ނަމަވެސް މިނިސްޓްރީ މި ނިންމުން ނިންމީ މެޓްއޮފީހާވެސް މަޝްވަރާކޮށް ދިރާސާ ކުރުމަށްފަހު ކަމަށް އިހުސާން ވިދާޅުވި އެވެ.
"އެކަޑެމިކް ކަލަންޑަރު ބަދަލުކުރުމުގެ ކުރިން މެޓް އޮފީހާ އެކު ފާއިތުވި 10 އަހަރުގެ މޫސުން ދިރާސާކުރި. ވަރަށް މަދު އަހަރެއްގަ ޖޫން/ ޖުލައިގަ ވިއްސާރައާ ދިމާވަނީ. އެހެންކަމުން މާޒީއަށް ބަލާ ޖޫން/ޖުލައި މަހަކީ ރާއްޖެ އަށް ވިއްސާރަ ދުވަސްވަރެއް ކަމަށް ބުނެވޭކަށް ނެތް،" އޭނާ ވިދާޅުވި އެވެ.
ނަމަވެސް މިދިޔަ އަހަރުވެސް ޖޫން/ޖުލައިގައި ލިބުނު ޗުއްޓީ ދިމާވީ ވިއްސާރަ މޫސުމާ އެވެ. އަދި މިދިޔަ މަހުގެ 30 ގައި ސްކޫލުތައް ބަންދުކުރި ގޮތަށް ފާއިތުވި ހަފްތާއެއްހާ ދުވަސް އެއްކޮށް ދިޔައީ ވިއްސާރަކޮށެވެ. އަދި ކުރިއަށް އޮތް ދުވަސްތަކުގައި ވެސް ވިއްސާރަ އަލިވާން ނެތް ކަމަށް މެޓުން ބުނެ އެވެ. އެކަމުގެ ކަންބޮޑުވުންތައް ޓީޗަރުންނާއި ބެލެނިވެރިން ވެސް ފާޅުކޮށްފައިވެ އެވެ.
ނަމަވެސް ޗުއްޓީއަށް އިތުރު ބަދަލެއް ގެނައުމުގެ ވިސްނުމެއް ނެތް ކަމަށް މިނިސްޓްރީން ބުނެ އެވެ.
"ވަރަށް ގިނަ ކަންކަމަށް ބެލުމަށްފަހު މިހާރު މި އޮތްގޮތަށް ޗުއްޓީ ބަދަލުކުރީ. އަލުން ކުރީގެ ގޮތަށް ޗުއްޓީ ބަދަލު ކުރުމުގެ އެއްވެސް ވިސްނުމެއް ނެތް. ނުކުރާނެ ބަދަލެއް. މިހާރު މި އޮތް ގޮތަށް އޮންނާނީ ދެން ހަމަ ކޮންމެ އަހަރަކުވެސް،" އިހުސާން ވިދާޅުވި އެވެ.
