މިދިޔަ އަހަރު ފެށި ޑުބާއީ އެކްސްޕޯގެ ތެރެއިން ރިސޯޓު ތަރައްގީކުރަން ކުއްޔަށް ދޭން ބީލަން ހުޅުވާލި 18 ރަށުގެ ތެރެއިން ވިކުނު ހަތަރު ރަށުން އެކުއިޒިޝަން ކޮސްޓުގެ ގޮތުގައި 154.5 މިލިއަން ރުފިޔާގެ އާމްދަނީއެއް ލިބިއްޖެ އެވެ.
ޑުބާއި އެކްސްޕޯގައި ބީލަން ހުޅުވާލި ރަށްތަކުގެ ތެރެއިން ނުވަ ރަށަކަށް 18 ބީލަމެއް ލިބުނެވެ. ބީލަންތައް އިވެލުއޭޓުކުރުމަށް ފަހު އެވޯޑުކުރަން ނިންމީ ހަތް ރަށެކެވެ.
ނަމަވެސް އެތަނުން ތިން ރަށަކަށް ބިޑު ހުށަހެޅި ފަރާތުގެ "ޕްރޫފް އޮފް ފަންޑްސް"އަކީ އެންމެ ރަށަކަށްވާ ވަރުގެ އަދަދެއް ކަމުން ތިން ރަށުގެ ތެރެއިން ބޭނުން ރަށެއް އިހުތިޔާރުކުރަން ފުރުސަތު ދިނީ އެވެ. މިހެންވެ އޮފާ ލެޓާ ދިނީ ފަސް ރަށަކަށެވެ.
އޮފާ ލެޓާ ދިން ރަށްތަކުގެ ތެރެއިން ޓޫރިޒަމް މިނިސްޓްރީން ދިން 60 ދުވަހުގެ މުއްދަތުގެ ތެރޭގައި ފުރިހަމަކުރަންޖެހޭ ކަންކަން ފުރިހަމަ ނުކުރުމުން ހއ. އަލިދުއްފަރުފިނޮޅުގެ ބީލަން ކާމިޔާބުކުރި ފަރާތުގެ ބިޑް ސެކިޔުރިޓީ "ފޯފިޓް" ކުރުމުގެ ކަންކަން ފަށާފައިވާ ޓޫރިޒަމް މިނިސްޓްރީން ބުންޏެވެ.
މި ރަށްތައް ކުއްޔަށް ދީގެން ލިބުނު އެކުއިޒިޝަން ކޮސްޓުގެ ގޮތުގައި ލިބުނު އާމްދަނީގެ އިތުރުން ޓޫރިޒަމް ޓްރޭނިން ފަންޑަށް 9.5 މިލިއަން ރުފިޔާ ވަނީ ލިބިފަ އެވެ.
ރިސޯޓު ތަރައްގީކުރަން ހަވާލުކުރި ރަށްތައް
- ފ. އެނބުލުފުށި
- ނައިޑް ޓްރޭޑިން ޕްރައިވެޓް ލިމިޓެޑް
- ލީސް އެކުއިޒިޝަން ކޮސްޓުގެ ގޮތުގައި 3،601،155.00 ޑޮލަރު
- ޓޫރިޒަމް ޓްރެއިނިން ފަންޑަށް 150،000.00 ޑޮލަރު
ފ. އެނބުލުފުށީ: މިއީ ބިލެތްދޫ ކައިރިން ބޮޑު ފަޅެއްގައި އޮންނަ ކުޑަކުޑަ ރަށެއް. -- ފޮޓޯ: ގޫގްލް އާތް
- ފ. ޖިންނަތުގައު
- އަކިރި ހޯލްޑިންގްސް ޕްރައިވެޓް ލިމިޓެޑް
- ލީސް އެކުއިޒިޝަން ކޮސްޓުގެ ގޮތުގައި 2,021,121.00 ޑޮލަރު
- ޓޫރިޒަމް ޓްރެއިނިން ފަންޑަށް 200،121.00 ޑޮލަރު
ފ. ޖިންނަތުގައު: މި ރަށް އޮންނަނީ މިހާރު ފ. އަތޮޅުގައި ހިންގާ ހަމައެކަނި ރިސޯޓު ފިލިތެޔޮ ކައިރީގަ. -- ފޮޓޯ: ގޫގްލް އާތް
- ގދ. ކަނޑަހަލަގަލާ
- ޕަޔޮނިޔާ މޯލްޑިވްސް ޕްރައިވެޓް ލިމިޓެޑް
- ލީސް އެކުއިޒިޝަން ކޮސްޓުގެ ގޮތުގައި 2،800،000.00 ޑޮލަރު
- ޓޫރިޒަމް ޓްރެއިނިން ފަންޑަށް 150،000.00 ޑޮލަރު
ގދ. ކަނޑަހަލަގަލާ: ކުއްޔަށް ދިން ރަށްތަކުގެ ތެރެއިން އެންމެ ބިން ބޮޑު ރަށަކީ މިއީ. -- ފޮޓޯ: ގޫގްލް އާތް
- މ. ސީދީހުރާ (މ. ސީދީހުރާ ވެލިގަނޑާ އެކު)
- މާކެޓެކް މޯލްޑިވްސް ޕްރައިވެޓް ލިމިޓެޑް
- ލީސް އެކުއިޒިޝަން ކޮސްޓުގެ ގޮތުގައި 1,599,999.00 ޑޮލަރު
- ޓޫރިޒަމް ޓްރެއިނިން ފަންޑަށް 120،000.00 ޑޮލަރު
މ. ސީދިހުރާ އާއި ސީދިހުރާ ވެލިގަނޑު: މި ރަށް އޮންނަނީ ހަކުރާހުރާ ކައިރީގައި. -- ފޮޓޯ: ގޫގްލް އާތް
މިފަހަރު ކުއްޔަށް ދޫކުރި ރަށްތަކުގެ ތެރޭގައި ގިނައީ ނިސްބަތުން ރިސޯޓުތައް މަދު އަތޮޅުތަކެވެ. އެ އަތޮޅުތަކުން ގިނަ ރަށްތަކެއް ކުއްޔަށް ދޫކޮށްފައި ހުރި ނަމަވެސް، ގިނައީ އަހަރުތަކެއް ވަންދެން މަސައްކަތް ހުއްޓިފައި ނޫނީ އެއްވެސް ވަރަކަށް މަސައްކަތް ކުރިޔަށް ނުދާ ރަށްތަކެވެ.
ރަށްތައް ކުއްޔަށް ނެގި ފަރާތްތަކުގެ ތެރޭގައި ވެސް ގިނައީ މި ދާއިރާއަށް އާ ވިޔަފާރިތަކެވެ. އެކަމަކު ގިނަ ފަހަރު މިހެން ލީސް ނަގާ ފަރާތުން ރަށްތައް އަމިއްލައަށް ތަރައްގީކުރުމުގެ ބަދަލުގައި އެހެން ބަޔަކަށް ލީސް އެއްކޮށް ވިއްކާލަނީ އެވެ.
- މާކެޓެކް މޯލްޑިވްސް - ވޮލްވޯ ޕެންޓާ ބްރޭންޑުގެ ސޯލް ޑިސްޓްރިބިއުޓަރު، ހަރަކާތްތެރިވަނީ މެރިން އިންޖިނިއަރިން ދާއިރާގައި
- ޕަޔޮނިޔާ މޯލްްޑިވްސް - އާރްއެމްއެލްއެސް ލެބޯޓްރީ ހިންގާ ކުންފުނި، ހަރަކާތްތެރިވަނީ މެޑިކަލް ޑައިގްނޯސްޓިކްސް އަދި ލެބޯޓްރީ ސާވިސަސް ދާއިރާގައި
- އަކިރި ހޯލްޑިންގްސް - ލަގްޒެމްބާގު ސެކުއިރިޓީސް އަދި އިންވެސްޓްމަންޓް ފަންޑެއްގެ ހިއްސާ އޮންނަ ކުންފުންޏެއް، ރަޖިސްޓްރީކުރި ކަމަށް ބެލެވެނީ ރިސޯޓު ލީސް ހޯދަން
- ނައިޑް ޓްރޭޑިން - ޕޭޖް ހާޑްވެއާ ހިންގާ ކުންފުނި، ހަރަކާތްތެރިވަނީ ކޮންސްޓްރަކްޝަނާއި ހާޑްވެއާ ސާމާނު ވިއްކުމުގެ ވިޔަފާރީގައި
