ބަޔަކު އެއްޖިއްސުން ގުޅުން ހިންގާ މަންޒަރު ފެންނަ ވީޑިއޯތައް ލީކްކުރި މީހުން ފުލުހުންނަށް ފާހަގަކުރެވިފައިވާ ކަމަށާއި މިދިޔަ މާޗްމަހުގެ ފަހުކޮޅު އެ މައްސަލަ ބަލަން ފަށާފައިވާ ކަމަށް ފުލުހުން މިއަދު ބުނެފި އެވެ.
އިސްކަންދަރު ކޮށީގައި މިއަދު ބޭއްވި މީޑިއާ ބްރީފިންއެއްގައި އެސިސްޓެންޓް ކަމިޝަނާ އޮފް ޕޮލިސް މުހައްމަދު ރިޔާޒް ވިދާޅުވީ ވީޑިއޯތައް ބައެއް ފަރާތްތަކުން މިހާރު ވެސް އަޕްލޯޑްކުރަމުންދާ ކަން ފާހަގަ ކުރެވޭ ކަމަށެވެ. އެކަމާ ގުޅުން ހުރި މީހުން އުޅޭކަން ފުލުހުންނަށް އެނގޭ ކަމަށް ވެސް އޭނާ ވިދާޅުވި އެވެ.
"މިހާރު ވެސް އެބަ ފާހަގަކުރެވޭ، ބައެއް ވީޑިއޯތައް ހަމަ ބައެއް ފަރާތްތަކުން އަޕްލޯޑްކުރަމުން އެބަދޭ. މިކަމާ ގުޅުން ހުރި މީހުން އުޅޭކަން އަޅުގަނޑުމެންނަށް ވެސް އެބަ އެނގޭ. ދެން އަޅުގަނޑުމެން ، ކުރިން މި ދެންނެވިހެން އަޅުގަނޑުމެން ކަވާޓްލީ ކުރަމުން އައި ތަހުގީގުގެ ތެރެެއިން، މިކަމާ ގުޅުން ހުރި މައުލޫމާތުތައް މިވަގުތަށް ވެސް އެއްކުރެވިފައި ވަނީ،" ރިޔާޒް ވިދާޅުވި އެވެ.
އެއްޖިއްސުން ގުޅުން ހިންގާ މަންޒަރު ފެންނަ ވީޑިއޯގައި އެ ކުށްކުރި ކަމަށް ތުހުމަތު ކުރެވޭ ފަރާތްތައް ހައްޔަރު ނުކުރާތީ އާއްމުން ދަނީ ފުލުުހުންނަށް ވަރަށް ބޮޑަށް ފާޑުކިޔަމުންނެވެ.
އެކަމާ ގުޅިގެން މިއަދުގެ މީޑިއާ ބްރީފިން އަށް ފަހު "އަދަދު" އިން ކުރި ސުވާލަކަށް ޖަވާބު ދެއްވަމުން ރިޔާޒު ވިދާޅުވީ އެ މައްސަލައިގެ ތަހުގީގު އެކަށީގެންވާ ވަރަށް ވުރެ ދިގުލައިގެން ގޮސްފައިވާ ކަމަށް ގަބޫލު ނުކުރައްވާ ކަމަށެވެ. އޭނާ ވިދާޅުވި ގޮތުގައި މީގެ ކުރިން ވެސް އެފަދަ ތަހުގީގުތަކަށް ދިގު މުއްދަތެއް ހޭދަވެފައިވާ ކަމަށެވެ.
މީޑިއާ ބްރީފިން ގައި ނޫސްވެރިއަކު ކުރި ސުވާލަކަށް ޖަވާބު ދެއްވަމުން އޭނާ ވިދާޅުވީ މިކަހަލަ ތަހުގީގެއް ބައްޓަން ކުރަން ޖެހެނީ ހެކި ހޯދަން ކަމަށާއި އެއްޖިއްސުން ގުޅުން ހިންގި މައްސަލައިގެ ތަހުގީގު ކުރިއަށް ގެންދަނީ އެގޮތަށް ކަމަށެވެ.
