މި އަހަރު ރާއްޖޭން ހައްޖަށް ދާ ފުރަތަމަ ގުރޫޕް މިރޭ ފުރަން ފަށައިފި އެވެ.
ހައްޖުވެރިންގެ ދަތުރު ހަމަޖެހިފައިވަނީ ތިން ގްރޫޕަކަށް ބަހަލާއިގެން ސައުދީ އެއާލައިންގެ ތިން ފްލައިޓެއްގައި ދަތުރު ކުރާ ގޮތަށެވެ. އެއީ މިރޭ ފުރާ ގްރޫޕްގެ އިތުރުން އަންނަ ބުދަ ދުވަހާއި ހޮނިހިރު ދުވަހު ފުރާ ގްރޫޕެކެވެ.
އިސްލާމިކް މިނިސްޓްރީން ބުނީ މިރޭ ޖުމްލަ 157 ހައްޖާޖީން ފުރާނެ ކަމަށެވެ.
އެގޮތުން މިރޭ ހައްޖުވެރިންގެ ފްލައިޓް ފުރާނީ ރާއްޖެގަޑިން 11:15ގަ އެވެ. ޖިއްދާއަށް ދެވޭނީ މެންދަމު 2:35 ގަ އެވެ. އެއީ ރާއްޖެގަޑިން ފަތިހު 4:35 އެހާކަންހާއިރު އެވެ.
1443 ވަނަ އަހަރުގެ ހައްޖުވެރިންގެ ފުރަތަމަ ގްރޫޕް އެއާޕޯޓަށް ދިއުމުގެ ތެރެއިން-- ފޮޓޯ: އިސްލާމިކް މިނިސްޓްރީ
ހައްޖުވެރިން ހައްޖަށް ފުރުމަށް ހަމަޖެހިފައިވާ ދުވަސްތަކުގައި މާލޭގެ ބައެއް މަގުތަކުގެ ޓްރެފިކް ފްލޯއަށް ވަނީ ބަދަލު ގެނެސްފަ އެވެ. ހައްޖުވެރިން ފުރަން ހަމަޖެހިފައިވާ ރޭތަކުގެ ރޭގަނޑު 7:00 އިން 8:00 އަށް މަޖީދީމަގާއި އަމީނީ މަގު އަދި އޯކިޑްމަގުގެ ޓްރެފިކް ފްލޯއަށް ވަނީ ބަދަލު ގެނެސްފަ އެވެ.
ރާއްޖެއަށް މި ފަހަރު ހައްޖަށް މީހުން ގެންދަން ސައުދީ ސަރުކާރުން ދޫކުރީ 453 މީހުންގެ ކޯޓާއެކެވެ. އޭގެ ތެރެއިން 353 ކޯޓާއަށް ކަނޑައެޅީ ހައްޖު ކޯޕަރޭޝަންގެ ކިއޫ ތަރުތީބުގައި ހިމެނޭ ފުރަތަމަ 353 މީހުންނަށެވެ. އަނެއް 100 ކޯޓާ އާންމުކޮށް ހުޅުވާލީ އެވެ.
މި އަހަރު ހައްޖުގެ އަޅުކަމަށް މީހުން ފޮނުވަން ހުއްދަ ދިނީ ވެސް ހައްޖު ކޯޕަރޭޝަނަށް އެކަންޏެވެ. އަމިއްލަ ކުންފުނިތަކަށް އެހެން ފަހަރުތަކުގައި ފުރުސަތު ދިނަސް މި ފަހަރު ފުރުސަތެއް ނުދެ އެވެ.
މި އަހަރުގެ ހައްޖުވެރިންގެ ފުރަތަމަ ގްރޫޕް އެއާޕޯޓަށް ދިއުމުގެ ތެރެއިން-- ފޮޓޯ: އިސްލާމިކް މިނިސްޓްރީ
އިސްލާމިކް މިނިސްޓްރީން ބުނި ގޮތުގައި މި ފަހަރު އެ ކަމަށް ހުޅުވާލައި ފުރުސަތު ދޭން ވަގުތު ނުލިބޭ ކަމަށެވެ. ކޯޓާ ކަނޑައެޅުމަށް ފަހު ސައުދީ ސަރުކާރުން އެންގީ ހައްޖުގެ އަޅުކަމަށް ގާތްގަނޑަކަށް މަސް ދުވަސް ވެފައިވަނިކޮށެވެ.
ހައްޖުގެ އަޅުކަން އަދާކުރުމަށްފަހު އެނބުރި ރާއްޖެ އަންނަ ފުރަތަމަ ފްލައިޓް އޮތީ ޖުލައި މަހުގެ 20 ވަނަ ދުވަހުގަ އެވެ. ދެވަނަ ފްލައިޓް އޮތީ ޖުލައި މަހުގެ 23 ވަނަ ދުވަހުގަ އެވެ. އަދި ފަހު ފްލައިޓް އޮތީ ޖުލައި މަހުގެ 27 ވަނަ ދުވަހުގަ އެވެ.
