ބައިނަލްއަގްވާމީ ޔޯގާ ދުވަސް ފާހަގަނުކުރުމަށް އިސްލާމިކް މިނިސްޓްރީން ނުވަތަ ދައުލަތުގެ އެހެން މުއައްސަސާއަކުންވެސް އަންގާފައި ނުވާ ކަމަށް ޔޫތު މިނިސްޓްރީން ބުނެފި އެވެ.
ޔޫތު މިނިސްޓްރީން މިހެން ބުނީ ޔޯގާ ދުވަސް ފާހަގަކުރުމަށް ބޭއްވި ހަރަކާތް ހުއްޓުވުމަށް އިސްލާމިކް މިނިސްޓްރީން ފުލުހުންނަށް ފޮނުވި ސިޓީއެއް ސޯޝަލް މީޑިއާގައި އާންމުވެފައިވަނިކޮށް ނެރުނު ނޫސްބަޔާނެއްގަ އެވެ.
އެ ނޫސްބަޔާނުގައި ބުނީ ޔޯގާ ދުވަސް ފާހަގަކޮށްފައި ވަނީ 2014 ވަނަ އަހަރުން ފެށިގެން ކޮންމެ އަހަރަކުވެސް އެ ދުވަސް ފާހަގަކުރަމުންދާ އުސޫލުގެ ދަށުން ކަމަށެވެ. އަދި 2014 ވަނަ އަހަރުން ފެށިގެން އެ މިނިސްޓްރީން ވެސް އެކަމުގައި ބައިވެރިވަމުންދަނީ ޔޯގާއަކީ ކުޅިވަރާއި ކަސްރަތުގެ ތެރޭގައި ހިމަނާފައިވާ ކަމަކަށްވާތީ، އެހެން ގައުމުތަކުގެ ވެސް ކުޅިވަރު މިނިސްޓްރީން ބައިވެރިވާ އުސޫލުން ކަމަށެވެ.
ޔޯގާ ދުވަސް ފާހަގަ ނުކުރުމަށް އެއްވެސް އިދާރާއަކުން އަންގާފައި ނުވާކަން ފާހަގަކޮށް ޔޫތު މިނިސްޓްރީން ބުނީ، ކަނޑައެޅިގެން އިސްލާމް ދީނުގައި ހަރާމްކުރައްވާފައިވާ ކަންކަމާއި، ރާއްޖޭގެ ގާނޫނުއަސާސީއާއި ގާނޫނުތަކާއި ހިލާފުވާނެ އެއްވެސް ކަމެއް އެ މިނިސްޓްރީގެ ފަރާތުން ނުހިންގާނެ ކަމަށެވެ.
އަދި ބައެއް މައްސަލަތަކަކީ އިލްމުވެރިންގެ މެދުގައި ހިލާފު އުފެދިފައިވާ ކަންތައްތަކެއް ކަމުން، ކަނޑައެޅިފައިވާ އުސޫލުތަކުގެ ތެރެއިން އެފަދަ މައްސަލަތަކާ ގުޅޭގޮތުން ކަމާގުޅޭ އިދާރާތަކުން ސާފުކޮށް ރައުޔު ކަނޑައެޅުމަކީ މުހިންމު ކަމެއް ކަމަށެވެ.
ޔޯގާ މައްސަލާގައި ޔޫތު މިނިސްޓްރީން ނޫސްބަޔާނެއް ނެރެފައިވާއިރު ޔޯގާ އަކީ ހަރާމް އެއްޗެއް ކަމަށާއި، އެއީ ހިންދޫ ދީނުގެ އަޅުކަމުގެ ތެރޭގައި ހިމެނޭކަމެއް ކަމަށް ބުނެ، އެ ހަރަކާތް ހިންގާ ފަރާތްތަކާމެދު ފިޔަވަޅު އަޅައި ދިނުމަށް އެދި އިސްލާމިކް މިނިސްޓްރީން ވަނީ މިމަހު 16ގައި ފުލުހުންނަށް ސިޓީއެއް ފޮނުވާފަ އެވެ.
ރާއްޖޭގެ ދީނީ އެއްބައިވަންތަކަމުގެ ގާނޫނުގައިވާ ގޮތުން މިފަދަ ދީނީ ހިޔާލުތަފާތުވުންތައް ހިމެނޭ މައްސަލަތަކުގައި މިނިސްޓްރީން އަމަލު ކުރަން ޖެހޭ ގޮތަކީ ފަތުވާ މަޖިލީހުގެ ބަހެއް ހޯދުމެވެ. ނަމަވެސް، ޔޯގާ މައްސަލަގައި އިސްލާމިކް މިނިސްޓްރީން ފަތުވާ މަޖިލީހުގެ ބަހެއް ހޯދާފައި ނުވާކަން ވަނީ ހާމަވެފަ އެވެ.
ޔޯގާ މައްސަލައިގައި ފަތުވާ މަޖިލީހުން ފަތުވާއެއް ނުނެރެވުނީ "އަދަދު"އަށް އެނގިފައިވާ ގޮތުގައި ގާނޫނުގައި ބުނާ ކޯރަމް ހަމަނުވާތީ އެވެ. ފަތުވާ މަޖިލީހުގެ މެމްބަރުން އައްޔަން ކުރަނީ ފަސް އަހަރަށް ކަމަށް ވާއިރު، އަލުން އައްޔަން ކުރި ފަހުން އެ މުއްދަތު ހަމަނުވެ މިހާރު ހުންނެވީ އެމަޖިލީހުގެ ރައީސް ޑރ. މުހައްމަދު ރަޝީދު އިބުރާހީމް އެކަންޏެވެ.
