ކ. ގުރައިދޫގެ ގެސްޓްހައުސްއެއްގެ ތެރޭގައި ފަތުރުވެރިޔަކު މަރުވެފައި އޮއްވާ އިއްޔެ ފެނިއްޖެ އެވެ.
ގުރައިދޫ ގެސްޓްހައުސްއެއް ތެރޭ ފަތުރުވެރިޔާ މަރުވެފައި އޮއްވާ ފެނިފައި ވަނީ އެ ކޮޓަރިން ކުނި ވަސް ދުވާތީ ބެލި ބެލުމުންނެވެ. މަރުވެފައިވާ އޮއްވާ ފެނުނީ އިނގިރޭސިވިލާތަށް ނިސްބަތްވާ އުމުރުން 57 އަހަރުގެ އަންހެނެކެވެ.
ފަތުރުވެރިޔާ މަރުވީ އޭނާގެ ހަށިގަނޑު އިއްޔެ ފެނުނުތާ މަދުވެގެން އެއް ދުވަސް ކުރިން ކަމަށް ޑޮކްޓަރުން ބުނެފައިވާ ކަމަށް ގުރައިދޫ ކައުންސިލުގެ ރައީސް ހުސެއިން ޔާމީން މުހައްމަދު "އަދަދު" އާ ވާހަކަ ދައްކަވަމުން ވިދާޅުވި އެވެ.
ޔާމީން ވިދާޅުވީ ފަތުރުވެރިޔާ ނިޔާވެފައި އޮއްވާ ފެނުމުގެ ދެ ދުވަހެއް ކުރިން އޭނާ ބަލިވެގެން ޑޮކްޓަރަށް ދެއްކި ކަމަށެވެ. އަދި ޑޮކްޓަރަށް ދެއްކުމަށްފަހު އަނބުރާ ގެސްޓްހައުސްއަށް ގޮސް އޭނާއަށް އުނދަގޫ ނުކުރުމަށާއި، ކާއެއްޗެހި ވެސް ކޮޓަރީގެ ދޮރު ކައިރީ ބަހައްޓައި ދިނުމަށް އެދުނު ކަމަށެވެ. އޭނާ ވިދާޅުވީ ފަތުރުވެރިޔާ އޮތް ކޮޓަރީގައި އޭރުއްސުރެ ހުރީ "ޑޫ ނޮޓް ޑިސްޓާބް" ލޭބަލް އަޅުވާފައި ކަމަށެވެ.
ފަތުރުވެރިޔާ ގުރައިދޫއަސް ޒިޔާރަތް ކުރީ އެކަނި ކަމަށް ޔާމީން ވިދާޅުވި އެވެ.
އެ މައްސަލައިގައި ފުލުހުން ބުނީ ގުރައިދޫ ގެސްޓްހައުސްއެއްގެ ކޮޓަރިއަކުން ކުނިވަސް ދުވާކަމުގެ މައުލޫމާތު ފުލުހުންނަށް ލިބިގެން ގޮސް ބެލިއިރު މަރުވެފައި އޮތް އަންހެނަކު ފެނިފައިވާ ކަމަށެވެ.
ފުލުހުން މި މައްސަލަ އިތުރަށް ތަހުގީގު ކުރަމުންދާއިރު، ރޭގެ ވަގުތެއްގައި ފަތުރުވެރިޔާގެ ހަށިގަނޑު ވަނީ މާލެއަށް ގެނެސްފަ އެވެ. މިގޮތަށް ރާއްޖޭގައި ނިޔާވާ ފަތުރުވެރިންގެ ހަށިގަނޑު ފޮނުވާލަނީ އެމީހުންގެ އާއިލާ ގާތަށް، އެމީހުންގެ ގައުމަށެވެ.
