މާފުށީ ޖަލުގައި 50 ގޮޅީގެ ހައި ސެކިއުރިޓީ ވިންގަކާއި 18 ގޮޅި އަދި ސެކިއުރިޓީ ޕޯސްޓެއް އިމާރާތްކުރަން ނޮވެމްބަރު 2022، ގައި ހޯމް މިނިސްޓްރީގެ ފަރާތުން ޕޮލިސް ކޯޕަރޭޓިވް ސޮސައިޓީ (ޕޮލްކޯ) އާ ހަވާލުކޮށްފައިވަނީ ދައުލަތަށް މާލީ ގޮތުން ގެއްލުން ލިބޭ ގޮތަށް ކަމަށް އޮޑިޓު ރިޕޯޓުން ހާމަވެއްޖެ އެވެ.
އޮޑިޓު އޮފީހުން ވަނީ ހޯމް މިނިސްޓްރީގެ 2022 އަދި 2023 ވަނަ އަހަރުގެ ކޮމްޕްލަޔަންސް އޮޑިޓު ރިޕޯޓު މިއަދު ހާމަކޮށްފަ އެވެ. އެ ރިޕޯޓުން އެނގޭ ގޮތުގައި އެ މަޝްރޫއު ހަވާލުކުރީ ސިންގަލް ސޯސް ޕްރޮކިއުމަންޓުގެ އުސޫލުން ވާދަވެރި ބީލަމަކާ ނުލަ އެވެ. ނޮވެމްބަރު 24، 2022 ގައި ޕޮލްކޯއާ އެ މަސައްކަތް ހަވާލުކުރީ 45،485،435ރ. އަށެވެ.
އެހެން ނަމަވެސް، އެ މަޝްރޫއުގެ ހުރިހާ މަސައްކަތެއް ޕޮލްކޯއިން ކުރިއަށްގެންދިޔައީ އެހެން ކުންފުންޏަކަށް ސަބް ކޮންޓްރެކްޓް ކޮށްގެންނެވެ. އެ ކުންފުންޏަށް ޕޮލްކޯއިން މަސައްކަތް ހަވާލުކުރީ 1،243،173ރ. އަށެވެ.
މަޝްރޫއުގެ ބީއޯކިއު ހުރި މައުލޫމާތާއި ކުރެހުމުގައި ހުރި މައުލޫމާތާ ތަފާތުތަކެއް ހުރިކަން ވެސް އޮޑިޓަށް ވަނީ ފާހަގަކުރެވިފަ އެވެ. އެކަމުގެ ސަބަބުން ދައުލަތުން ދައްކަން ނުޖެހޭ ފައިސާއެއް ދައްކާފައިވާ ކަމަށް ބެލެވެ އެވެ.
އޭގެ އިތުރުން، 50 ގޮޅީގެ ވިންގު ހެދުމަށް ނިންމާފައި އޮތް ސަރަހައްދުގައި ހުރި އިމާރާތެއް ތަޅާލައި ސާފުކުރުމަށް ބީއޯކިއުގައި 2،920،082ރ. އަށް ހިމަނާފައިވާއިރު އެއީ އެ މަސައްކަތް ޕޮލްކޯއާ ހަވާލުކުރުމުގެ ކުރިން އެ ތަނުގައި ހުރި އިމާރާތެއް ނޫން ކަމަށް އޮޑިޓުގައި ވަނީ ފާހަގަކޮށްފަ އެވެ.
އެ މަސައްކަތަށް ފައިސާ ދީފައިވާއިރު އެއީ ނުކުރާ މަސައްކަތަކަށް ދޫކޮށްފައިވާ 2.9 މިލިއަން ރުފިޔާކަން އޮޑިޓު ރިޕޯޓުގައި ބުނެފައިވެ އެވެ. އެ މައްސަލަ އިތުރަށް ބެލުމަށް އެންޓި ކޮރަޕްޝަން ކޮމިޝަން (އޭސީސީ) އަށް ހުށަހެޅުމަށް ވެސް އޮޑިޓު އޮފީހުން ވަނީ ލަފާ ދީފަ އެވެ.
