ބައިނަލްއަގްވާމީ ޔޯގާ ދުވަސް ފާހަގަ ކުރުމަށް ބޭއްވި ހަފްލާއަށް ވަދެގަނެ ހަމަނުޖެހުމާއި މާރާމާރީ ހިންގި މައްސަލައިގައި ޝެއިހު އާދަމް ނިޝާން ފުލުހުން މިރޭ ހައްޔަރުކޮށްފި އެވެ.
ޔޯގާއަކީ ކުފުރު ކަމަށް ބުނެ، އިއްޔެ ގަލޮޅު ދަނޑުގައި ބޭއްވި ހަރަކާތަށް ހުރަސް އަޅައި މީހުންނާއި ތަކެއްޗަށް ގެއްލުންދީ އަމަން ނަގާލި މައްސަލައިގައި ފުލުހުން އިއްޔެ ވެސް ހަ މީހަކު ހައްޔަރު ކުރި އެވެ.
ސޯޝަލް މީޑިއާގެ ޕްލެޓްފޯމްތަކުގައި ދަރުސް ދެމުންދާ، ފޭސްބުކްގައި 20،000 އަށް ވުރެ ގިނަ މީހުން ފޮލޯ ކުރާ ނިޝާން ހައްޔަރު ކުރީ ރެހެންދި ފްލެޓް ކައިރިން ކޯޓު އަމުރެއްގެ ދަށުންނެވެ. ފުލުހުންގެ ހާއްސަ ޓެކްޓިކަލް ޓީމުތައް ނެރެގެން މިރޭ ކުރިއަށްގެންދަމުންދާ ހާއްސަ އޮޕަރޭޝަނުގައި މިހާތަނަށް ނިޝާނާއެކު ހަ މީހަކު ހައްޔަރުކޮށްފި އެވެ.
ހައްޔަރު ކުރި މީހުންގެ ތެރޭގައި ޝެއިހު ފަޒްލޫން މުހައްމަދު ވެސް ހިމެނެ އެވެ. ނިޝާން އާއި ފަޒްލޫން ވަނީ ޔޯގާ ދުވަސް ފާހަގަ ކުރި ގަލޮޅު ދަނޑު ކައިރިއަށް މީހުން އެއްވުމަށް ގޮވާލައި، އެ ސަރަހައްދުގައި ލައުޑްސްޕީކަރު ބޭނުންކޮށްގެން ވާހަކަ ދައްކައިފަ އެވެ.
ޝެއިހް ނިޝާން އާއި ފަޒްލޫނުގެ އިތުރުން ޕީޕީއެމްގެ ކައުންސިލް މެމްބަރު އަދި ރައްޔިތުންގެ މަޖިލީހުގެ ހޯރަފުށީ ދާއިރާގެ ކުރީގެ މެމްބަރު މުހައްމަދު އިސްމާއިލާއި އެ ޕާޓީގެ އެކްޓިވިސްޓު އިބްރާހިމް ރައްޒާން (ޓަކީ) ވެސް ފުލުހުން މިރޭ ހައްޔަރު ކުރި އެވެ.
އެނގިފައިވާ ގޮތުގައި މިހާތަނަށް ހައްޔަރު ކުރި ހަ މީހުންގެ އިތުރުން ވެސް ހަމަނުޖެހުން ހިންގި ކަމަށް ތުހުމަތު ކުރެވޭ ބަޔަކު ފުލުހުން މިރޭ ހައްޔަރު ކުރާނެ އެވެ.
