މުދަލާއި ހިދުމަތުގެ އަގު އިންތިހާއަށް އަގުބޮޑުވަމުން އަންނާތީ، ތަކެތީގެ އަގުހެޔޮ ކުރުމަށް ގޮވާލާ ރައްޔިތުންގެ މަޖިލީހަށް މިއަދު ހުށަހެޅި މައްސަލަ ބޭރުކޮށްލައިފި އެވެ.
ރައްޔިތުންގެ މަޖިލީހަށް މި މައްސަލަ ހުށަހަޅުއްވާފައިވަނީ މަޑުއްވަރީ ދާއިރާގެ ޕީއެންސީ މެންބަރު އާދަމް ޝަރީފް އުމަރު އެވެ.
"ރާއްޖޭގައި އާންމުކޮށް ދިވެހިން ބޭނުންކުރާ މުދަލުގެ އަގު ބޮޑުވެ، ރައްޔިތުންގެ އަތް ނުފޯރާ ހިސާބަށް އަގުތައް މަތިވެ، ރާއްޖޭގެ އިންފްލޭޝަން އުފުލެމުން ދިއުމާއި ރާއްޖޭގައި އުފައްދާ ތަކެތީގެ އަގުތައް ވެސް އުފުލެމުން ދާތީ،" އާދަމް ޝަރީފް ހުށަހެޅުއްވި މައްސަލައިގައި ބުނެފައިވެ އެވެ.
މިގޮތުން، މަސްދަޅުގެ އަގާއި އިމާރާތްކުރުމުގެ ދާއިރާގައި ބޭނުންކުރާ ސިމެންތިއާއި ދަގަނޑުގެ އަގު ވެސް ބޮޑުވެފައިވާކަން ފާހަގަކޮށްފައިވެ އެވެ.
ސަރުކާރާއި ސަރުކާރުގެ ކުންފުނިތަކުން ދޭ ހިދުމަތްތަކުގެ އަގުހެޔުކޮށް، މުދަލުގެ އަގުހެޔޮ ކުރުމަށް ސަރުކާރަށް ވަނީ ގޮވާލާފަ އެވެ.
މި މައްސަލަ މަޖިލީހަށް ބަލައިގަތުމާމެދު ނެގި ވޯޓުގައި މައްސަލަ ބަލައިގަތުމަށް ފެންނަ ކަމަށް ވޯޓު ދެއްވީ ނުވަ މެންބަރުންނެވެ. ބަލައިގަތުމަށް ނުފެންނަ ކަމަށް 29 މެންބަރުން ވޯޓު ދިނުމުން މައްސަލަ ވަނީ މަޖިލީހަށް ބަލައިނުގަނެ، ބޭރުކޮށްލާފަ އެވެ.
