ޒުވާނުންގެ މެދުގައި މާލީ ހޭލުންތެރިކަން އިތުރުކުރުމުގެ ޕްރޮގްރާމެއް ހިންގުމަށް ވިލާ ކޮލެޖުން މޯލްޑިވްސް ޕެންޝަން އޮފީހާއެކު އެއްބަސްވުމެއްގައި ސޮއިކޮށްފި އެވެ.
މިދިޔަ ބުރާސްފަތި ދުވަހު ސޮއިކުރި މި އެއްބަސްވުމަކީ ޒުވާނުންގެ މެދުގައި މާލީ ހޭލުންތެރިކަން އިތުރުކޮށް، ފަހަށް ފައިސާ ރައްކާކުރުމާއި އިންވެސްޓްކުރުން ފަދަ ކަންކަން ކުރުމަށް ބޭނުންވާ މައުލޫމާތު ފޯރުކޮށްދީ، އިގްތިސާދީ ގޮތުން ބާރުވެރި ޖީލެއް ބިނާކުރުމުގެ މަގްސަދުގައި ހިންގޭ ޕްރޮގްރާމެއް ކަމަށް ޕެންޝަން އޮފީހުން ބުންޏެވެ.
ވިލާ ކޮލެޖުގެ ދަރިވަރުންގެ އިތުރުން ޒުވާނުންނަށް ވެސް އަމާޒުކޮށްގެން ހިންގާ މި ޕްރޮގްރާމްގެ ތެރެއިން ކޮލެޖު، ޔުނިވާސިޓީތަކުގެ ދަރިވަރުންނާއި ޒުވާނުންނަށް މައުލޫމާތު ދިނުމަށް އެކި ކަންކަން ހިންގުމަށް ވަނީ ހަމަޖެހިފަ އެވެ.
މިގޮތުން، މީޑިއާގެ ވަސީލަތްތައް މެދުވެރިކޮށް މައުލޫމާތު ފޯރުކޮށްދިނުމާއި މައުލޫމާތު ދިނުމުގެ ސެޝަންތަކާއި ސެމިނާތައް ހިންގުމަށް ވަނީ ހަމަޖެހިފަ އެވެ. އަދި ޕެންޝަން ނިޒާމު ކުރިއެރުވުމަށް ބޭނުންވާ ދިރާސާތައް ކުރުން ފަދަ ކަންކަން ކުރިއަށް ގެންދިއުމަށް ވެސް ރޭވިފައިވާ ކަމަށް ޕެންޝަން އޮފީހުން ބުނެފައިވެ އެވެ.
ބުރާސްފަތި ދުވަހު ޕެންޝަން އޮފީހުގައި ބޭއްވި ރަސްމިއްޔާތުގައި ވިލާ ކޮލެޖްގެ ފަރާތުން ސޮއިކުރެއްވީ އެ ކޮލެޖުގެ ވައިސް ރެކްޓަރ ޑރ. އަލީ ނަޖީބެވެ. އަދި ޕެންޝަން އޮފީހުގެ ފަރާތުން ސޮއިކުރެއްވީ އެ އޮފީހުގެ އެކްޓިން ޗީފް އެގްޒެކެޓިވް އޮފިސަރ ސުޖާތާ ހަލީމެވެ.
