އިންޓަ އޮފީސް ބިލިއާޑް މުބާރާތުގެ ޓީމު އިވެންޓުގެ ޗެމްޕިއަންކަން ދިވެހި ސިފައިންގެ ކުލަބުން ހޯދިއިރު، އަންހެން ބައިގެ ޗެމްޕިއަންކަން ކަސްޓަމްސް ރެކްރިއޭޝަން ކުލަބުން ހޯދައިފި އެވެ.
މިދިޔަ މަހުގެ 30 ގައި ފެށި އިންޓަ އޮފީސް ބިލިއާޑް މުބާރާތުގެ ފިރިހެން ބައިގައި 15 އޮފީހަކުން އަދި އަންހެން ބައިގައި ފަސް އޮފީހަކުން މި ފަހަރު ވާދަކުރެ އެވެ. ފިރިހެން ސިންގަލްސް ކެޓަގަރީގައި 75 ކުޅުންތެރިން އަދި އަންހެން ސިންގަލްސް ކެޓަގަރީގައި ނުވަ ކުޅުންތެރިއަކު ވަނީ ވާދަކޮށްފަ އެވެ.
ނުވަ ވަނަ އިންޓަ އޮފީސް ބިލިއާޑް މުބާރާތުގެ އަންހެން ސިންގަލްސް ޗެމްޕިއަންކަން ޖެހިޖެހިގެން ތިން ވަނަ ފަހަރަށް ހޯދީ ކަސްޓަމްސް ރެކްރިއޭޝަން ކްލަބްގެ އާމިނަތު ހަލީމް (ދިލް) އެވެ. އަދި ފިރިހެން ސިންގަލްސް ޗެމްޕިއަންކަން ހޯދީ މޯލްޑިވްސް ޕޯޓްސް ލިމިޓެޑް (އެމްޕީއެލް)ގެ މުހައްމަދު ދުންޔާޒް އެވެ.
މުބާރާތުގެ އެންމެ ފޯރިގަދަ އިވެންޓު ކަމަށްވާ ޓީމު އިވެންޓުގެ ފިރިހެން ބައިގެ ޗެމްޕިއަންކަން ދިވެހި ސިފައިންގެ ކުލަބުން ހޯދީ ފައިނަލުގައި ސްޓެލްކޯ ބަލިކޮށްގެންނެވެ. ފިރިހެން ޓީމު އިވެންޓުގެ ތިން ވަނަ ހޯދީ އެމްޕީއެލް އެވެ. އެއީ ތިން ވަނަ ހޮވަން ކުޅުނު މެޗުގައި އިސްލާމިކް ބެންކް ބަލިކޮށްގެންނެވެ.
ނައިބު ރައީސް ފައިސަލް ނަސީމް ޕޫލް ބިލިއާޑް ފިރިހެން ބައިގެ ޗެމްޕިއަންކަން ހޯދި ސިފައިންގެ ކުޅުންތެރިންނާ ތަށި ހަވާލުކުރަނީ
އަންހެން ބައިގެން ޓީމު އިވެންޓުގެ ޗެމްޕިއަންކަން ހޯދީ ކަސްޓަމްސް އެވެ. ކަސްޓަމްސް ފައިނަލުގައި ވާދަކުރީ ސްޓެލްކޯ އާ އެވެ. ފައިނަލް މެޗުގެ ކުރިން ސެމީ ފައިނަލު ފުރަތަމަ މެޗުގައިވެސް ކަސްޓަމްސް އިން ވަނީ ސްޓެލްކޯ ބަލިކޮށްފަ އެވެ. ނަމަވެސް ލީގު ބުރުގައި ކުޅުނު މެޗުން ކަސްޓަމްސް ވަނީ ސްޓެލްކޯ އަތުން ބަލިވެފަ އެވެ. އަންހެން ބައިގެ ތިންވަނަ ހޯދީ ކުލަބު ވެމްކޯ އެވެ.
މުބާރާތުގެ ޗެމްޕިއަން ޓީމްތަކާއި، ކުޅުންތެރިންނަށް ޓްރޮފީ އާއި މެޑަލް އަދި ސެޓްފިކެޓް ހަވާލުކޮށްދެއްވީ ފައިނަލް މެޗުގެ ޝަރަފްވެރި މެހުމާނު ރައީސުލްޖުމްހޫރިއްޔާގެ ނައިބު ފައިސަލް ނަސީމް އެވެ.
މިފަހަރުގެ އިންޓަ އޮފީސް ބިލިއާޑް މުބާރާތަކީ ފެންވަރުގެ ގޮތުން ބަލާއިރު، މިހާތަނަށް ކުޅުނު އެންމެ ފޯރިގަދަ އަދި އެންމެ ވާދަވެރި މުބާރާތްކަމަށް ބިލިއާޑް އެސޯސިއޭޝަނުން މައުލޫމާތު ދެ އެވެ.
އިންޓަ އޮފީސް މުބާރާތަށްފަހު ދެން މިއަހަރު އޮތީ ކުރިއަށް އޮތީ މިމަހުގެ ފަހުކޮޅު އޮންނަ އެސޯސިއޭޝަން ކަޕެވެ.
