ރައީސް އިބްރާހިމް މުހައްމަދު ސޯލިހް މިއަދު ނޫސްވެރިންނާ ބައްދަލު ކުރައްވާ ގޮތަށް ހަމަޖައްސަވައިފި އެވެ.
ރައީސް އޮފީހުގައި ނޫސްވެރިންނާ އެންމެ ފަހުން ބައްދަލުކުރެއްވީ އޮގަސްޓް 11، 2021 ގަ އެވެ.
ހާއްސަކޮށް ރާއްޖޭގެ އިގުތިސޯދީ ހާލަތާއި ދަރަންޏާ ގުޅޭގޮތުން ރައްޔިތުންގެ މެދުގައި އެތަކެއް ސުވާލުތަކެއް ގައުމުގެ ހާލަތާ ގުޅިގެން އުފެދިފައިވާއިރު އެ ސުވާލުތައް ރައީސްއާ އަމާޒުކުރުމުގެ ފުރުސަތު ނުލިބި ގިނަ ދުވަސްވެފައިވާތީ ނޫސްވެރިން ވަނީ ކަންބޮޑުވުންވެސް ފާޅުކޮށްފަ އެވެ.
މިއަދު މި ހޭދަވަނީ ނޫސްވެރިންގެ ބައްދަލުވުމެއް ނުބާއްވާތާ 303 ވަނަ ދުވަހެވެ.
ރައީސް ނޫސްވެރިންނާ ބައްދަލު ކުރައްވަން ހަމަޖެހިފައިވަނީ މިއަދު ހަވީރު 4:00ގަ އެވެ. ނޫސްވެރިންނަށް ސުވާލު ކުރުމުގެ ފުރުސަތު ހުޅުވާލާ ގޮތަށް ބާއްވާ މި ޕްރެސް ޓީވީތައް މެދުވެރިކޮށް ލައިވް ކުރާ ގޮތަށް ވަނީ ހަމަޖެހިފަ އެވެ.
ރައީސް ނޫސްވެރިންނާއި ބައްދަލު ކުރައްވާއިރު، ދުނިޔޭގެ އިގްތިސޯދަށް ކުރިމަތިވެފައިވާ ނުރައްކަތަކާ ގުޅިގެން ރާއްޖެއިން މިކަމަށް އަޅާނެ ފިޔަވަޅުތަކާ ގުޅޭގޮތުންވެސް މައުލޫމާތު ހިއްސާ ކުރައްވާނެކަމަށް ބެލެވެ އެވެ.
