ކުރީގެ ރައީސް މައުމޫން އަބްދުލް ގައްޔޫމްގެ އޮފީސް ހިންގަން ދައުލަތުން ދޫކުރާ ފައިސާ ހަރަދުކޮށްފައިވާ ގޮތުގެ ތަފްސީލްތަކަށް އެދުމުން އެ މައުލޫމާތު ނުދިން މައްސަލައެއް އިންފޮމޭޝަން ކޮމިޝަނަރުގެ އޮފީސް (އައިކޮމް)އަށް ހުށަހަޅައިފި އެވެ.
މައުލޫމާތު ހޯދައި ލިބިގަތުމުގެ ގާނޫނުގެ ދަށުން މި މައްސަލަ އައިކޮމްއަށް ހުށަހެޅީ އަހްމަދު އައިމަން ލަތީފް އެވެ. އައިކޮމްއަށް މައްސަލަ ގެންދިޔައީ މައުލޫމާތުތަކަށް އެދުނުތާ މަސް ދުވަސް ވީއިރު ވެސް އެ މައުލޫމާތުތައް ފޯރުކޮށްދީފައެއް ނުވެ އެވެ.
އޭނާ އެދިފައިވަނީ 2017، 2018، 2019، 2020، 2021 ވަނަ އަހަރުގެ އެ އޮފީހުގެ އަހަރީ ރިޕޯޓްއާއި އެ އަހަރުތަކުގައި އެ އޮފީހުން ދައުލަތުން ދިން ފައިސާ ހަރަދުކޮށްގެން ކުރި މަސައްކަތުގެ ތަފްސީލްތައް ދިނުމަށެވެ.
އެ އޮފީހުގައި އިއްޔެ ބޭއްވި އަޑުއެހުމަކަށް މައުމޫންގެ އޮފީހުގެ ފަރާތުން ހާޒިރުކޮށް މައުލޫމާތު ނުދިން ސަބަބު ސާފުކުރަން ވަނީ ސުވާލުކޮށްފަ އެވެ. މައުމޫންގެ ވަކީލް މުހައްމަދު ފައިސަލް ވިދާޅުވީ އެއީ އެ އޮފީހުގެ މައްޗަށް ލާޒިމު ކަމެއް ކަމުގައި ނުދެކޭ ކަމަށެވެ.
"އަޅުގަނޑުމެންނަކީ ދައުލަތުގެ އިދާރާއެއް ނޫން، އަޅުގަނޑުމެންގެ މައްޗަށް ލާޒިމެއް ނުވާނެ މި ގާނޫނުގެ ދަށަކުން މައުލޫމާތު މި ގޮތަށް ދޭކަށް ނުޖެހޭނެ، އަޅުގަނޑުމެން ހާޒިރުކޮށް މިފަދަ މައްސަލައެއް ވެސް ގެންދެވޭނެ ކަމަކަށް ނުދެވޭނެ،" ފައިސަލް ވިދާޅުވި އެވެ.
ނަމަވެސް އިންފޮމޭޝަން ކޮމިޝަނަރުގެ އޮފީހުގެ އޮފިޝަލް ވިދާޅުވީ އެ އޮފީހުން ދެކޭ ގޮތުގައި ކުރީގެ ރައީސް މައުމޫންގެ އޮފީސް ވެސް ހިމެނެނީ ދައުލަތުގެ އިދާރާތާކުގެ ތެރޭގައި ކަމުގަ އެވެ. އޭނާ ހަވާލާދެއްވީ ގާނޫނުގެ 72ވަނަ މާއްދާގެ (ޅ) އަށެވެ.
އެ އަޑުއެހުން ނިންމާލައްވަމުން އައިކޮމްގެ އޮފިޝަލް ވިދާޅުވި ގޮތުގައި ދެން އޮންނާނީ އެ މައްސަލާގައި އެ އޮފީހުގެ ނިންމުން އިއްވުން ކަމުގަ އެވެ. އެ ކަމަށް އެހެން ދުވަހަކަށް އަޑުއެހުމެއް ތާވަލު ކުރާނެ ކަމަށް ވިދާޅުވި އެވެ. ނަމަވެސް ތާވަލު ކުރާނެ ވަކި ދުވަހެއް ވިދާޅެއް ނުވެ އެވެ.
t
އައިކޮމްގެ ނިންމުމަކާ މެދު ހިތްހަމަނުޖެހޭނަމަ ހައި ކޯޓުގައި މައްސަލަ އިސްތިއުނާފް ވެސް ކުރެވޭނެ އެވެ. މި ގާނޫނުގެ ދަށުން ހުށަހަޅާ މައްސަލަތައް ވެސް ސުޕްރީމް ކޯޓާ ހަމައަށް އިސްތިއުނާފް ކުރުމުގެ ހައްގު މައްސަލައިގައި ހިމެނޭ ދެ ފަރާތަށް ވެސް ލިބިގެންވެ އެވެ.
ކުރީގެ ރައީސުންނަށް ދައުލަތުގެ ބަޖެޓުން ދޫކުރާ އިނާޔަތްތަކުގެ ތެރޭގައި އެ ބޭފުޅުންގެ އޮފީސް ހިންގުމުގެ ހަރަދު ވެސް ހިމެނެ އެވެ. އޮފީސް ހިންގުމުގެ ހަރަދުތަކަށް ދެނީ މަހަކަށް 75،000 ރުފިޔާ އެވެ.
ކުރީގެ ރައީސުންނަށް ދައުލަތުން މާލީ އިނާޔަތުގެ ގޮތުގައި ދެނީ ޖުމުލަ 175،000 ރުފިޔާ އެވެ. އެއީ މަހަކު 50،000 ރުފިޔާގެ މުސާރައާއި، ދިރިއުޅޭ ތަނުގެ ހަރަދަށް މަހަކު 50،000 ރުފިޔާއާއި، ޗެރިޓީ މަސައްކަތްތަކަށް ހުޅުވާ އޮފީސްތައް ހިންގުމަށް 75،000 ރުފިޔާ އެވެ.
