އެމެރިކާ އާއި އިޒްރޭލު ގުޅިގެން ދިން ހަމަލާއެއްގައި އިރާނުގެ ރޫހާނީ ލީޑަރު، އާޔަތުالله ހާމަނާއީ އަވަހާރަކޮށްލި ކޮށްލުން ކުރީގެ ރައީސް، މައުމޫން އަބްދުލްގައްޔޫމް ކުށްވެރިކުރައްވައިފި އެވެ.
އެކްސްގައި މިރޭ އެމަނިކުފާނު ކުރެއްވި ޕޯސްޓެއްގައި ވިދާޅުވީ ހާމަނާއީ އަވަހާރަކޮށްލި ކޮށްލުން އިހުލާސްތެރި މުސްލިމެއްގެ ހައިިސިއްޔަތުން ކުށްވެރިކުރައްވާ ކަމަށެވެ.
"އިހުލާސްތެރި މުސްލިމެއްގެ ހައިސިއްޔަތުން، އީރާނުގެ އެންމެ މަތީ ލީޑަރު އާޔަތުﷲ އަލީ ހާމަނާއީ އަވަހާރަކޮށްލި އަވަހާރަކޮށްލުން އަޅުގަނޑު ކުށްވެރިކުރަން. މާތްﷲ އެމަނިކުފާނުގެ ފުރާނަފުޅަށް ބަރަކާތް ލައްވައި، މި ފުން ހިތާމައިގެ ވަގުތުގައި އެމަނިކުފާނުގެ އާއިލާއަށާއި ރައްޔިތުންނަށް ކެތްތެރިކަން މިންވަރުކުރައްވާށި،" މައުމޫން ކުރެއްވި ޕޯސްޓުގައި ލިޔުއްވާފައިވެ އެވެ.
ދިވެހިރާއްޖޭގެ ވެރިކަން 1978 އިން 2008 އަކާ ހަމައަށް ކުރެއްވި މައުމޫންއަކީ މެދުއިރުމަތީގެ ގައުމުތަކާ ގާތް ގުޅުން ބޭއްވެވި ވެރިއެކެވެ.
ހާމަނާއީ އަވަހާރަކޮށްލި ކޮށްލުން މައުމޫން ކުށްވެރިކުރައްވާފައިވާއިރު، މި ވަގުތާ ހަމައަށް ވެސް އެކަމާ ގުޅިގެން ދިވެހިރާއްޖޭގެ ސަރުކާރުން އަދި ރައީސުލްޖުމްހޫރިއްޔާ މުހައްމަދު މުއިއްޒު އެއްވެސް އެއްޗެއް ވިދާޅުވެފައެއް ނުވެ އެވެ. އެކަމާ ގުޅިގެން ސަރުކާރަށާއި މުއިއްޒުއަށް ވަނީ ގިނަ ބައެއްގެ ފާޑުކިޔުން އަމާޒުވެފަ އެވެ.
މިއަދު ހެނދުނު ރައީސް އޮފީހުގައި އޮތް ނޫސްވެރިންގެ ބައްދަލުވުމުގައި ވެސް އެމަނިކުފާނާ އެ ސުވާލު އަމާޒުކުރުމުން ސީދާ ޖަވާބެއް ދެއްވަން އެމަނިކުފާނު އިންކާރު ކުރެއްވި އެވެ.
ހާމަނާއީ އަވަހާރަކޮށްލުމާ ގުޅިގެން އެއްޗެއް ވިދާޅުވުމުގެ ބަދަލުގައި މުއިއްޒު ވިދާޅުވީ މެދުއިރުމަތީގައި ހުރި އެމެރިކާގެ އަސްކަރީ މަރުކަޒުތަކަށް އިރާނުން ދެމުން ގެންދާ ހަމަލާތައް ކުށްވެރިކުރައްވާ ކަމަށެވެ. އެއަށްފަހު އެމަނިކުފާނު ވަނީ އިޒްރޭލާއި އެމެރިކާއިން ދޭ ހަމަލާތައް ވެސް ގޯސް ކަމަށް ވިދާޅުވެފަ އެވެ.
