ވޮލީބޯލް އެސޯސިއޭޝަން ކަޕްގެ އަންހެން ޑިވިޝަނުގައި މިހާތަނަށް ކުޅުނު ހުރިހާ މެޗަކުން މޮޅުވެ، ފައިނަލުގެ ފުރަތަމަ ޖާގަ ލިބުނުއިރު، ސެމީ ފައިނަލުގައި ވަރުގަދަ ޗެލެންޖެއް ކުރިމަތިވުމަކީ ހިތްހަމަޖެހުމެއްގެ ގޮތުގައި ދެކޭ ކަމަށް ވެމްކޯގެ ކޯޗު އައިޝަތު ނާޒިމާ ބުނެފި އެވެ.
ވެމްކޯ އިން މި ފަހަރުގެ މުބާރާތުގެ ގްރޫޕް ސްޓޭޖުގައި ކުޅުނު ހަތަރު މެޗުން ވެސް މޮޅުވީ ސީދާ ތިން ސެޓުންނެވެ. އެކަމަކު، ސެމީ ފައިނަލުގައި ރޭ ވެމްކޯ އިން ދެ ސެޓު ގެންގޮސްފައިވަނިކޮށް ޕޮލިހުން ފަހަތުން އަރައި، ދެ ސެޓު ގެންގޮސް މެޗު އެއްވަރުކުރި އެވެ. އެހެން ނަމަވެސް އަލުން ފޯމަކަށް އެޅި ނަތީޖާ ނެރެން ކުޅުނު ސެޓުގައި ވެމްކޯ ތަފާތު ދައްކައި، މެޗުން މޮޅުވެ ފައިނަލަށް ދަތުކުރީ އެވެ.
ސެމީ ފައިނަލް މެޗަށް ފަހު "އަދަދު" އަށް ނާޒިމާ ބުނީ ފުރަތަމަ ދެ ސެޓު ގެންގޮސްފައި ޓީމަށް މައްސަލަ ދިމާވީ ތިން ވަނަ ސެޓުގައި ސާވިސްތަކުގައި ގޯސް ހެދެން ފެށުނު ހިސާބުން ކަމަށެވެ. އެ ގޮތަށް އެކަން ނުދިޔަ ނަމަ ތިން ވަނަ ސެޓު ގެންގޮސް ވެމްކޯ ފަސޭހައިން މެޗުން މޮޅުވާނެ ކަމަށް ނާޒިމާ ވަނީ ބުނެފަ އެވެ.
ތިން ސެޓުން މޮޅުނުވެ، ވާދަވެރިކޮށް ފަސް ސެޓު ކުޅެގެން މޮޅުވުމުން ވެސް ނާޒިމާ އަށް ހިތްހަމަޖެހުމެއް އެބައޮތެވެ.
"ވަރަށް އީޒީ މެޗުތަކެއް ކުޅެފައި ސެމީއާ ހިސާބަށް މި އައީ، ސެމީގައި މި ވަރުގެ މެޗެއް ކުޅެން ލިބުނީމަ، ފައިނަލުގެ ކުރިއަށް ހަމަ ވަރަށް ބޮޑު، އެކްސްޕީރިއަންސެއް މިއީ، ފަސް ސެޓަށް ދާން ޖެހުމާ އަނެއްކާ އެ ކުދިން ހާސްކަމެއްގެ ތެރެއަށް ވެސް ގޮސްފައި، އެހެން ބަލާއިރު މިއީ ފައިނަލަކަށް ތައްޔާރުވާން ލިބުނު އެންމެ ރަނގަޅު އެއް ޕްރެކްޓިސްގެ ގޮތުގައި ދެކެނީ،" ނާޒިމާ ބުންޏެވެ.
"މިއީ ފައިނަލަށް ދާން ބަލާއިރު ރަނގަޅު އެކްސްޕީރިއަންސެއް، ފައިނަލުގައި އިރާދަކުރެއްވިއްޔާ މި އަށް ވުރެ ރަނގަޅު ފައިޓެއް ދޭން ނުކުންނާނީ،،"
ވެމްކޯ އިން 2019 ވަނަ އަހަރު އެސޯސިއޭޝަން ކަޕްގެ ޗެމްޕިއަންކަން ހޯދިއިރު، އެ ޓީމަށް މޮޅު ކުޅުމެއް ދެއްކި ކުޅުންތެރިން މި ފަހަރު ވެސް ޓީމުގައި ހިމެނެ އެވެ. އޭގެ ތެރޭގައި އައިޝަތު މާޖިދާ އާއި އައިމިނަތު އަރީޝާ އަދި ލިބަރޯ، ސިލްމާ ޒާހިރު ހިމެނެ އެވެ. ޓީމުގެ ކެޕްޓަނަކަށް މި ފަހަރު ހުރި ސޮފާ ނާޒް ވެސް ވަނީ ޗެމްޕިއަންކަން ހޯދި ވެމްކޯ ޓީމަށް ރަނގަޅު ކުޅުމެއް ދައްކައިފަ އެވެ.
މި ފަހަރުގެ އެސޯސިއޭޝަން ކަޕްގެ ފައިނަލުގައި އަންނަ ބުރާސްފަތި ދުވަހުގެރޭ ވެމްކޯ ކުޅެން ޖެހޭ ޓީމެއް އެނގޭނީ މިރޭ ކުޅޭ ތިން ވަނަ ސެމީ ފައިނަލަށް ފަހު އެވެ. ތިން ވަނަ ސެމީ ފައިނަލުގައި މިރޭ ޕޮލިހާއި ކްލަބް އީގަލްސް ބައްދަލުކުރާ މެޗު ފަށާނީ 20:15 ގަ އެވެ.
