ކީރިތި ރަސޫލާއަށް ފުރައްސާރަކޮށް އިންޑިއާގެ ވެރިކަންކުރާ ޕާޓީ ކަމުގައިވާ ބީޖޭޕީގެ ތަރުޖަމާނު ދެއްކި ވާހަކަ، ދިވެހި ސަރުކާރުން ކުށްވެރިކޮށްފައިނުވާތީ އެކަން ސަރުކާރުގެ ސަމާލުކަމަށް ގެނައުމަށް މަޖިލީހަށް ހުށަހެޅި ކުއްލި މައްސަލަ ބޭރުކޮށްލަން، މަޖިލީހުގެ ސުޕަމެޖޯރިޓީ އޮންނަ އެމްޑީޕީން ވިޕެއް ނެރުމުން، މާފަންނު މެދު ދާއިރާގެ މެމްބަރު އިބްރާހިމް ރަޝީދު (ބޮންޑޭ) މިއަދު ވަރަށް ބޮޑަށް ހިތްހަމަނުޖެހުންފާޅުކުރައްވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި މި ކުއްލި މައްސަލަ ހުށަހަޅއްވާފައިވަނީ މަޑުއްވަރީ ދާއިރާގެ މެންބަރު އާދަމް ޝަރީފް އުމަރެވެ. މި މައްސަލަ މަޖިލީހުން ބޭރުކޮށްލާފައިވަނީ 33 މެންބަރުންގެ ވޯޓުންނެވެ. މައްސަލަ ބަލައިގަންނަން ފެންނަ ކަމަށް ވޯޓު ދެއްވީ 10 މެންބަރުންނެވެ.
"މިހާރު ވިޕް އޮންނަނީ މާ ވަރުގަދަ ބައެއްގެ އަތުގައި، ސަރުކާރު އަތުގައި ވިޕް އޮންނަނީ، ރައްޔިތުންގެ މަޖިލީހާއި ސަރުކާރާއި ބާރުތައް ވަކިކުރެވިފައި ވަނީ އެހެންނަމަވެސް ރައްޔިތުންގެ މަޖިލީހާއި ސަރުކާރުގެ ބާރުތައް އެއްވެފަ މި އޮތީ، ސަރުކާރުން އަންގާ ގޮތަކަށް ވިޕް ނެރެނީ،" ބޮންޑޭ ވިދާޅުވި އެވެ.
އެމްޑީޕީގެ ޕީޖީ ގުރޫޕުގެ ބައްދަލުވުންތައް ބާއްވަނީ ސިއްރުން ކަމަށާއި ޖަލްސާ ބާއްވާ ކަން ނުވެސް އެނގޭ ކަމަށް ވިދާޅުވި އެވެ. އަދި މިފަދަ މައްސަލަތައް ބޭރުކޮށްލުމުން ވެއްޓެނީ މަޖިލީހުގެ ރައީސް މުހައްމަދު ނަޝީދުގެ އަގު ކަމަށް ބޮންޑޭ ވިދާޅުވި އެވެ.
"[ބަދަލުކުރަން ޖެހޭ] މިކަހަލަ މައްސަލަތަކުގައި ސަރުކާރުން ވިޕްނުނެރެވޭ ގޮތަށް، މަޖިލިސް ރައީސް އިންނެވީ ރިޔާސަތުގައި، ދެން ހުރިހާ އެންމެން އިނގިލި ދިއްކުރަނީ ރައީސް ކުރާ ކަމެއް ކަމަށް،" ބޮންޑޭ ވިދާޅުވި އެވެ.
"އެމްޑީޕީންނެއް ނޫން މި ވިޕް ނެރެފައި މިއޮތީ، ސީދާ ސަރުކާރުން އަންގައިގެން މިއޮތީ ރަސޫލާއަށް ފުރައްސާރަކުރަން ވިޕް ނެރެފަ،"
ބީޖޭޕީގެ ތަރުޖަމާނު ދެއްކި ވާހަކައާ ގުޅިގެން ހުށަހެޅުނު މައްސަލަ ބަލައިގަތުމަށް ނެގި ވޯޓުގައި ބޮންޑޭ ބައިވެރިވެވަޑައިގެންފައިނުވެ އެވެ. ނަމަވެސް, "އިންޑިއާގެ ބަޔަކު" ރަސޫލާއަށް ފުރައްސާރަކުރި މައްސަލަ މަޖިލީހަށް ހުށަހެޅީ ހެޔޮ ނިޔަތެއްގައި ނޫން ކަމަށާއި އެކަން ކުރީ ފިތުނަ އުފައްދަން ކަމަށް ބޮންޑޭ ވިދާޅުވި އެވެ. އެގޮތުން އެ މައްސަލަ ހުށަހެޅުއްވި މަޑުއްވަރީ ދާއިރާގެ މެންބަރު އާދަމް ޝަރީފް އުމަރަކީ "ފިތުނަ އުފައްދާ މެޝިނެއް"ގެ ގޮތުގައި ސިފަކުރެއްވި އެވެ.
އިންޑިއާގެ ޓީވީ ޗެނަލެއްގައި ދެއްކި ޕްރޮގްރާމެއްގައި ރަސޫލާއަށް ފުރައްސާރަކޮށް ވާހަކަ ދައްކާފައިވަނީ ބީޖޭޕީގެ ނޭޝަނަލް ސްޕޯކްސްޕާސަން ނުޕުރް ޝަރުމާ އާއި ނިއުދިއްލީގައި ހުނަން ބީޖޭޕީ ޕާޓީގެ މީޑިއާ އިންޗާޖް ނަވީން ކުމާރެވެ. އެމީހުން ދެއްކި ވާހަކަތައް ހޫނުވެ, އިސްލާމީ ގައުމުތަކުން ނުރުހުން ފާޅުކުރަން ފެށުމުން ބީޖޭޕީއިން ވަނީ ދެ މީހުންނާމެދު ފިޔަވަޅު އަޅާފަ އެވެ. އެގޮތުން, ނުޕުރް ޝަރުމާ ޕާޓީގެ ހަރަކާތްތަކުން ސަސްޕެންޑްކޮށް, ނަވީން ކުމާރު ވަނީ ޕާޓީން ވަކިކޮށްފަ އެވެ.
އިސްލާމީ ގިނަ ގައުމުތަކަކުން އެ ދެ މީހުންގެ ވާހަކަތައް ކުށްވެރިކޮށް ބަޔާން ނެރެ އިހުތިޖާޖުކޮށްފައިވާއިރު ދިވެހި ސަރުކާރުން މިކަމުގައި މިހާތަނަށް އެއްޗެއް ނުބުނެ އެވެ. އެކަމުގައި ސަރުކާރުގެ ބަހެއް ހޯދުމަށް މި ނޫހުން ރައީސް އޮފީހުގެ ތަރުޖަމާނު މަބްރޫކް އަޒީޒަށް ގުޅުމުން ޖަވާބެއް ނުދެއްވަ އެވެ.
އިސްލާމިކް މިނިސްޓަރު އަހުމަދު ޒާހިރު ވެސް ޖަވާބެއް ނުދެއްވި އެވެ.
ބީޖޭޕީގެ ވާހަކަތަކާ ދެކޮޅަށް ސަރުކާރު ކޯލިޝަންގައި އޮތް އަދާލަތު ޕާޓީއާއި ޖުމްހޫރީ ޕާޓީގެ އިތުރުން ސަލަފު ޖަމިއްޔާ އަދި ރާއްޖޭގެ ދީނީ އިލްމުވެރިން ވެސް ކުށްވެރިކޮށް ވަނީ ވާހަކަ ދައްކާފަ އެވެ. އަދާލަތު ޕާޓީން ބުނީ, ރަސޫލާއަށް ފުރައްސާރަކޮށް ދެއްކި ހަޑިމުޑުދާރު އަމަލު އަދާލަތު ޕާޓީގެ އިލްމުވެރިންގެ މަޖިލީހުގެ ފަރާތުން ހަރުކަށި އިބާރާތުން ކުއްވެރިކުރާ ކަމަށެވެ.
